នារសៀលថ្ងៃទី៧ ខែកុម្ភៈ ឆ្នាំ២០២៣ នៅសាលាខេត្តសៀមរាប មានរៀបចំពិធីប្រកាសចូលកាន់មុខតំណែង លោក ទូច ម៉ាឡា ជាប្រធានមន្ទីរអភិវឌ្ឍន៍ជនបទថ្មី ជំនួសលោក ខេង ញ៉ុល ផ្ទេរតួនាទីភារកិច្ចទៅក្រសួងអភិវឌ្ឍន៍ជនបទវិញ។
ពិធីប្រកាសនេះ ក្រោមអធិបតីភាព ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប លោក នាក់ ណេរ៉ុន អភិបាលខេត្តសៀមរាបស្ដីទី និង មន្ទីរ អង្គភាព ពាក់ព័ន្ធជុំវិញខេត្តជាច្រើនរូប។
ថ្លែងនាពេលនោះ លោក នាក់ ណេរ៉ុន បង្ហាញថា ក្រោមការដឹកនាំប្រកបដោយការទទួលខុសត្រូវ របស់ក្រុមប្រឹក្សាខេត្ត អភិបាលនៃគណៈអភិបាលខេត្ត ខេត្តសៀមរាបបានរួមគ្នាបំពេញតួនាទី ភារកិច្ច ស្របតាមបទប្បញ្ញតិ្តនានា ដែលមានចែងក្នុងច្បាប់ បទបញ្ជា សេចក្តីណែនាំ កម្មវិធីនយោបាយ យុទ្ធសាស្ត្រចតុកោណដំណាក់កាលទី៤ កម្មវិធីកំណែទម្រង់នានា ការគាំទ្រតាមគ្រប់រូបភាព ពីក្រុមការងាររាជរដ្ឋាភិបាលចុះមូលដ្ឋានខេត្ត ដើម្បីកំណើនការងារ សមធម៌ និងប្រសិទ្ធភាពនៅកម្ពុជា ជាពិសេសការលើកកម្ពស់ការផ្តល់សេវាសាធារណៈ និងការអភិវឌ្ឍន៍មូលដ្ឋាន ឆ្លើយតបនឹងសេចក្តីត្រូវការរបស់ប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម។
មានប្រសាសន៍ក្នុងឱកាសនោះដែរ ឯកឧត្តម បណ្ឌិតសភាចារ្យ អ៊ុក រ៉ាប៊ុន បញ្ជាក់ថា ការប្រកាសចូលកាន់មុខតំណែងរបស់ លោកប្រធានមន្ទីរអភិវឌ្ឍន៍ជនបទខេត្តសៀមរាបនាពេលនេះ គឺដើម្បីពង្រឹង និងបង្កើនប្រសិទ្ធភាពដឹកនាំនៅថ្នាក់ក្រោមជាតិឱ្យកាន់មានភាពល្អប្រសើរបន្ថែមទៀត។
ឯកឧត្តម បានកោតសរសើរ ចំពោះលោកប្រធានមន្ទីរ ដែលត្រូវបានក្រសួងផ្ទេរទៅកាន់មុខតំណែងថ្មី នៅថ្នាក់ជាតិ ព្រមទាំងមន្រ្តីក្រោមឱវាទ ដែលក្នុងរយៈពេលកន្លងមក បានខិតខំប្រឹងប្រែងបំពេញតួនាទី និងភារកិច្ចប្រកបដោយការទទួលខុសត្រូវតាមជំនាញវិជ្ជាជីវៈ។ ទាំងនេះគឺបង្ហាញអំពីការខិតខំប្រឹងប្រែងរបស់ថ្នាក់ដឹកនាំ និងមន្រ្តីនៃមន្ទីរអភិវឌ្ឍន៍ជនបទក្នុងការសហការសម្របសម្រួល និងបំពេញការងារ ព្រមទាំងការលះបង់កម្លាំងកាយចិត្ត ទើបធ្វើឱ្យសម្រេចបានសមិទ្ធផលគួរជាទីមោទនៈ។
ឯកឧត្តម ក៏បានណែនាំដល់ លោកប្រធានមន្ទីរដែលទើបនឹងចូលកាន់តំណែង និងមន្ត្រីក្រោមឱវាទ ត្រូវបន្តពង្រឹងប្រពៃណីសាមគ្គីភាព ឯកភាពផ្ទៃក្នុងឱ្យកាន់តែល្អប្រសើរ និងយកចិត្តទុកដាក់ អនុវត្តការងារប្រកបដោយការឈ្លាសវៃ និងត្រូវមានចក្ខុវិស័យ សមស្របទៅតាមសភាពការណ៍ទូទៅ និងត្រូវដោះស្រាយឱ្យបានទាន់ពេលវេលា។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
