យោងតាមសេចក្ដីជូនដំណឹងរួមរបស់ក្រសួងអប់រំ យុវជន និងកីឡា និងក្រសួងប្រៃសណីយ៍ និង ទូរគមនាគមន៍ ស្ដីពី ការដាក់ឱ្យប្រើប្រាស់ «វិញ្ញាបនបត្របណ្តោះអាសន្ននៃការប្រឡងសញ្ញាបត្រមធ្យម សិក្សាទុតិយភូមិ សម័យប្រឡង៖ ០៥ ធ្នូ ២០២២ ដែលមានដាក់ QR Code ស្តង់ដារ ដែលអាចផ្ទៀងផ្ទាត់បានតាមរយៈ verify.gov.kh» ចុះថ្ងៃទី០២ ខែកុម្ភៈ ឆ្នាំ២០២៣ បានឱ្យដឹងថា សិស្សានុសិស្ស ក៏ដូចគ្រឹះស្ថានឧត្តមសិក្សាទាំងអស់ អាចប្រើប្រាស់ និងផ្ទៀងផ្ទាត់វិញ្ញាបនបត្របណ្តោះអាសន្ន ដែលមានដាក់ QR Code ស្តង់ដារនេះ ដោយពុំចាំបាច់ទៅស្នើសុំដកផ្ទាល់ ឬធ្វើការបញ្ជាក់ឯកសារចម្លងឡើងវិញឡើយ។
វិញ្ញាបនបត្របណ្តោះអាសន្ននៃការប្រឡងសញ្ញាបត្រមធ្យមសិក្សាទុតិយភូមិ ឬហៅថាបាក់ឌុបនេះ អាចផ្ទៀងផ្ទាត់ពីភាពត្រឹមត្រូវ ពេញលេញជាផ្លូវការបាន តាមរយៈគេហទំព័រថ្នាលផ្ទៀងផ្ទាត់ឯកសារឌីជីថល ដែលមានអាស័យដ្ឋាន verify.gov.kh។
ចំពោះកម្រិតនៃការប្រើប្រាស់វិញ្ញាបនបត្របណ្តោះអាសន្ន មធ្យមសិក្សាទុតិយភូមិ ដែលមានដាក់ QR Code ស្តង់ដារនេះ សិស្សានុសិស្ស អាចយកទៅដាក់ពាក្យស្នើសុំចូលសិក្សានៅគ្រឹះស្ថានឧត្តមសិក្សាទាំងអស់ ដោយពុំចាំបាច់យកទៅចម្លង និងធ្វើការបញ្ជាក់ពីភាពត្រឹមត្រូវ នៃការចម្លង ឬហៅថា នីត្យានុកូលកម្មនោះឡើយ។
ព័ត៌មានជាតិ ថ្មីៗ
ដើម្បីដាក់ពាក្យស្នើសុំ វិញ្ញាបនបត្របណ្តោះអាសន្ននេះ សិស្សានុសិស្ស អាចចូលទៅកាន់ឆានែលតេលេក្រាមឈ្មោះថា «សម័យប្រឡងសញ្ញាបត្រមធ្យមសិក្សាទុតិយភូមិ៖ ថ្ងៃទី 5 ខែធ្នូ ឆ្នាំ 2022» តាមរយៈតំណភ្ជាប់ http://t.me/TemporaryBacllCertificate ហើយបំពេញព័ត៌មានចាំបាច់មួយចំនួន ឬអាចចូលទៅទទួលពាក្យស្នើសុំ ដោយផ្ទាល់នៅមន្ទីរអប់រំ យុវជន និងកីឡាខេត្ត។
តាមរយៈសេចក្ដីជូនដំណឹងរួមរបស់ក្រសួងទាំង២ខាងលើ បង្ហាញថា នេះជាការវិវឌ្ឍថ្មីមួយ ក្នុងការប្រើប្រាស់បច្ចេកវិទ្យាឌីជីថល ដើម្បីធ្វើឱ្យប្រសើរឡើងនូវការផ្ដល់សេវាសាធារណៈកាន់តែងាយស្រួល និងមានប្រសិទ្ធភាពខ្ពស់ ស្របតាមអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន និងជាជំហានថ្មីក្នុងការជំរុញការកែទម្រង់ឌីជីថលទ្រង់ទ្រាយធំក្នុងក្រសួង ស្ថាប័នរដ្ឋ ស្របតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា និងគោលនយោបាយរដ្ឋាភិបាលឌីជីថលកម្ពុជា។
សូមរំលឹកថា ការប្រឡងសញ្ញាបត្រមធ្យមសិក្សាទុតិយភូមិ កាលពីថ្ងៃទី៥ និង ទី៦ ខែធ្នូ ឆ្នាំ២០២២កន្លងទៅនេះ មានបេក្ខភាពចូលរួមប្រឡងសរុបចំនួន ១២៨,១៣៥នាក់ ក្នុងនោះស្រី ៦៨,៧៧១នាក់។ ចំពោះលទ្ធផល នៃការប្រឡងជាប់ជាស្ថាពរមានចំនួន ៧២.៣៣ភាគរយ៕
អត្ថបទ៖ ក្រុមព័ត៌មានទូរទស្សន៍
កែសម្រួល៖ លោក សេង ផល្លី
