ក្រុមអ្នកជំនាញស្រាវជ្រាវផ្នែកហេដ្ឋារចនាសម្ព័ន្ធ និងភូមិសាស្ដ្រក្រោមដី បើកវគ្គបណ្ដុះបណ្ដាលសមត្ថភាពដល់មន្ដ្រីជំនាញនៃអាជ្ញាធរជាតិអបស្សរា ចំនួន១៥រូប ដើម្បីឲ្យមានសមត្ថភាពរុករកស្រាវជ្រាវផ្លូវទឹក និងហេដ្ឋារចនាសម្ព័ន្ធនានានៅក្រោមដីតាមរមណីយដ្ឋានបុរាណក្នុងតំបន់អង្គរ ។ ការបណ្ដុះបណ្ដាលនេះបានធ្វើឡើងរយៈពេល៤ថ្ងៃ ចាប់ពីថ្ងៃទី២៩ ខែមករា ដល់ថ្ងៃទី០២ ខែកុម្ភៈ ឆ្នាំ២០២៣ នៅក្រុងសៀមរាបដែលមានសិក្ខាកាមចំនួន១៥នាក់ ចូលរួម។
លោក ជឿង ចេយុង (Jeoung Jae Hyeung) វិស្វករផ្នែកស្រាវជ្រាវភូមិសាស្ដ្រនៃនាយករដ្ឋានស្រាវជ្រាវសុវត្ថិភាពហេដ្ឋារចនាសម្ព័ន្ធ នៃវិទ្យាស្ថាន KICT ប្រទេសកូរ៉េ បានឲ្យដឹងថា វគ្គបណ្ដុះបណ្ដាលជំនាញជួសជុល និងអភិរក្សនេះ ដោយបានសហការជាមួយមូលនិធិបេតិភណ្ឌកូរ៉េ វិទ្យាស្ថានខេអាយស៊ីធី ក្នុងគោលបំណងឲ្យពួកគាត់មានជំនាញជួសជុល និងអភិរក្សប្រាសាទបុរាណនៅតំបន់អង្គរ ។ លោកបន្ដថា ប្រព័ន្ធធារាសាស្ដ្រនៅក្នុងតំបន់អង្គរជាចំណុចដ៍សំខាន់ ដែលត្រូវបានធ្វើការសិក្សាពីវាឲ្យបានច្បាស់លាស់ និងធ្វើការអភិវឌ្ឍ ដូចជាប្រព័ន្ធធារាសាស្ដ្រនៃសំណង់បច្ចុប្បន្ននេះដែរ ។ លោកបានបន្ថែមថា ក្រុមអ្នកជំនាញនឹងធ្វើការសិក្សាប្រព័ន្ធធារាសាស្ដ្រក្រោមដីនៅប្រាសាទលានជល់ដំរី ព្រោះមានស្រទាប់ដីមិនល្អ ហើយទឹកមិនអាចជ្រាបចូលក្នុងដីបានល្អ ខណៈដែលមានទឹកភ្លៀងបានហូរចេញទៅកន្លែងផ្សេងដែលមានទំនាប ។ លោកបន្ដថា ក្នុងរយៈពេល៣ថ្ងៃកន្លងមកនេះ លោកបានផ្ដល់ចំណេះដឹងមួយចំនួនដល់សិក្ខាកាម ដែលបានសិក្សាពីស្រទាប់ដី ដូចជាការជ្រាបទឹកនៅក្រោមដី ផ្លូវហូរទឹកនៅក្រោមដី និងផ្លូវហូរទឹកនៅផ្នែកខាងលើនៅសាទលានជល់ដំរី ។ លោកសម្ដែងការសប្បាយចិត្ដដែលសិក្ខាមមកពីស្ថាប័នអាជ្ញាធរជាតិអប្សរា ដែលទទួលបានចំណេះដឹងនៃការស្រាវជ្រាវប្រព័ន្ធធារាសាស្ដ្រក្នុងក្នុងដី ហើយលោកបន្ដផ្ដល់ចំណេះដឹងបន្ថែមទៀតនាថ្ងៃក្រោយៗ។លោកបន្ថែមថា វិទ្យាស្ថានខេអាយស៊ីធីមានអ្នកជំនាញជាច្រើន រួមមានអ្នកជំនាធារាស្ដ្រ អ្នកជំនាញវិស្វកម្មផងដែរ ហើយនៅប្រាសាទលានជល់ដំរី និងប្រាសាទព្រះវិធូរ ដែលមូលនិធិបេតិភណ្ឌរបស់កូរ៉េ អង្គការKOICAកំពុងជួសជុល ត្រូវបានប្រើឧបករណ៍ សម្រាប់សិក្សាស្រាវជ្រាវទៅលើដីទៅទឹក ពីវិទ្យាស្ថានខេអាយស៊ីធីផងដែរ ។
លោក ឡៃ ប៉ូទី អនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធនៃអាជ្ញាធរជាតិអបស្រា មានប្រសាសន៍ថា ការសិក្សារយៈពេលបីថ្ងៃ អ្នកជំនាញកូរ៉េបានបង្រៀនពីឧបករណ៍បច្ចេកទេសស្កេន ការកិនបង្ហាប់ដីឱ្យត្រូវបច្ចេកទេស ដោយឧបករណ៍មួយចំនួនរបស់កូរ៉េ សម្រាប់ជួសជុលប្រាសាទនៅប្រាសាទលានជល់ដំរី សិក្សាពីស្រទាប់ដីនៅខាងក្រោមដី ដោយរកឃើញមានដីខ្សាច់និងថ្មនៅក្រោមដី និងប្រភពទឹកផងដែរ។លោកបន្ថែមថា ដោយសារលោកមានជំនាញវិស្វករស្រាប់ទើបលោកអាចបានយល់កាន់តែច្បាស់ពាក់ព័ន្ធនិងកិច្ចការស្រាវជ្រាវ លើហេដ្ឋារចនាសម្ព័ន្ធធារាស្ដ្រនេះ៕
អត្ថបទ និងរូបភាព៖ លោក បូ សាវី
