នៅថ្ងៃទី១ ខែកុម្ភៈ ឆ្នាំ២០២៣ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលក្រុងសៀមរាប ធ្វើការបិទផ្សាយ ជាសាធារណៈនូវឯកសារ នៃការវិនិច្ឆ័យការចុះបញ្ជីដីធ្លី ដែលមានលក្ខណៈជាប្រព័ន្ធ សរុបចំនួន២,៩០១ ស្ថិតនៅភូមិចំនួន ៣រួមមាន ភូមិស្រង៉ែ. ភូមិតាចក និងភូមិថ្នល់ នៃសង្កាត់ស្រង៉ែ។
មានប្រសាសន៍នៅទីតាំងបិទផ្សាយ ជាសាធារណៈ នៃបរិវេណវត្តចន្លោង សង្កាត់ស្រង៉ែនោះ លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លើកឡើងថាខេត្តសៀមរាប គឺជាខេត្តមួយក្នុងចំណោមរាជធានី-ខេត្ត ទាំង២៥ ដែលត្រូវបានអនុវត្តន៍ការចុះបញ្ជីដីធ្លីមានលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា ដែលស្ថិតក្រោមការដឹកនាំរបស់ក្រសួងរៀបចំដែនដី នគរូបនីយកម្ម និងសំណង់ និងអនុវត្តន៍ការងារដោយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ព្រមជាមួយកិច្ចសហការពីអាជ្ញាធរដែនដី ជាពិសេសតាមការចង្អុលបង្ហាញ របស់ឯកឧត្តម អភិបាលនៃគណៈអភិបាលខេត្តសៀមរាប។
លោកប្រធានមន្ទីរ បន្ថែមថា ក្នុងរយៈពេលនេះ បងប្អូនប្រជាពលរដ្ឋអាចប្តឹង ឬជំទាស់តវ៉ាមកក្រុមមន្ត្រីជំនាញ ដែលនៅប្រចាំការ ដោយមិនគិតពីថ្ងៃឈប់សម្រាក ប្រសិនបើក្នុងករណីរកឃើញថាមានកំហុសណាមួយលើទិន្ន័យក្បាលដីរបស់ខ្លួន សូមរាយការណ៍មកមន្ត្រីជំនាញ ដើម្បីធ្វើការកែសម្រួលឱ្យបានត្រឹមត្រូវឡើងវិញ។
ក្នុងឱកាសនោះ លោក នួន ពុទ្ធារ៉ា អភិបាលក្រុងសៀមរាប បញ្ជាក់ថា ការបិទផ្សាយជាសាធារណៈនូវឯកសារ នៃការវិនិច្ឆ័យនៃការចុះបញ្ជីដីធ្លី ដែលមានលក្ខណៈជាប្រព័ន្ធនេះ គឺពិតជាមានសារៈសំខាន់ណាស់ មុនពេលចេញបណ្ណកម្មសិទ្ធិដីធ្លីជូនប្រជាពលរដ្ឋដោយត្រឹមត្រូវ និងស្របច្បាប់ ហើយការចូលរួមត្រួតពិនិត្យព័ត៌មានលម្អអិតលើក្បាលដីរបស់បងប្អូន វាបានបង្កើនសុវត្ថិភាពលើការកាន់កាប់ និងប្រើប្រាស់ដីធ្លីស្របច្បាប់ ព្រមទាំងកាត់បន្ថយទំនាស់ដីធ្លីផ្សេងៗ។
សូមបញ្ជាក់ថា៖ ការបិទផ្សាយនេះ មានរយៈពេល ១៥ថ្ងៃគឺចាប់ពីថ្ងៃទី១ ដល់ថ្ងៃទី១៥ ខែកុម្ភៈ ឆ្នាំ២០២៣ ចំពោះក្បាលដីមិនមានការតវ៉ា រហូតដល់ថ្ងៃផុតកំណត់ មន្ត្រីជំនាញនឹងបន្តនីតិវិធី ដើម្បីចេញសម្គាល់បណ្ណសម្គាល់សិទ្ធិកាន់កាប់អចលនវត្ថុ។ ក្នុងករណីមានការតវ៉ា ឬកែតម្រូវលើឯកសារមិនទាន់ត្រឹមត្រូវ ក្នុងរយៈពេល១៥ថ្ងៃនេះ មន្ត្រីជំនាញនឹងរងចាំការពន្យល់ ដោះស្រាយ និងទទួលបណ្តឹង កែសម្រួលទិន្នន័យក្បាលដីទាំងនោះឱ្យបានត្រឹមត្រូវ បន្ទាប់មកទើបបន្តនីតិវិធី ដើម្បីចេញវិញ្ញាប័ណ្ណ សម្គាល់អចលនវត្ថុជូនប្រជាពលរដ្ឋយកទៅប្រើប្រាស់៕
អត្ថបទ និងរូបភាព៖ លោក ទ្រា ពន្លឺ
កែសម្រួលអត្ថបទ៖ លោក សេង ផល្លី
