គិតចាប់ពីឆ្នាំ២០០៧មកដល់បច្ចុប្បន្ន អង្គការអភិវឌ្ឍន៍អន្តរជាតិអាល្លឺម៉ង់ ហៅកាត់ថា GIZ បានបណ្តុះបណ្តាលកូនខ្មែរយ៉ាងតិច៨០នាក់ ក្នុងជំនាញអភិរក្សថ្ម និងព្យាបាលថ្មប្រាសាទបុរាណ នេះបើតាមការឱ្យដឹងពី លោក គ្រីស្តុស បៀរឃើ (Christoph BUECKER) អ្នកជំនាញអភិរក្សថ្ម របស់ GIZ។
លោក បង្ហាញថា ការបណ្តុះបណ្តាលនេះ បានបែងចែកជាវគ្គ ដែលមានរយៈពេលបីឆ្នាំម្តង។ បច្ចុប្បន្ននេះ GIZ ក៏មានគម្រោងជាច្រើនទៀត សម្រាប់បណ្តុះបណ្តាលធនធានមនុស្សនៅប្រទេសកម្ពជា។ លោក បន្ថែមថា វត្តមានរបស់ GIZនៅតំបន់អង្គរ គឺដើម្បីបង្ហាត់បង្រៀនអ្នកជំនាញខ្មែរ ដែលកំពុងបម្រើការនៅក្នុងអាជ្ញាធរជាតិអប្សរា ឱ្យចេះជំនាញសង្កេតថ្ម ជួយជំរុញបន្ថែមទៀតនូវជំនាញអភិរក្សថ្ម ការមើលចម្លាក់ថ្ម និងការព្យាបាលចម្លាក់ថ្មនៅតាមប្រាសាទបុរាណនានា។
ក្រៅពីការបណ្ដុះបណ្ដាល លោក បញ្ជាក់ថា GIZ បានប្រើប្រាស់ថវិការបស់ខ្លួន សម្រាប់ផ្គត់ផ្គង់ទាំងសម្ភារៈ ទ្រីស្តី និងបច្ចេកទេសមួយចំនួន ដែលត្រូវនាំយកពីក្រៅប្រទេស នៅពេលបើកវគ្គបង្រៀននីមួយៗនោះ។ បន្ថែមពីនោះ ក៏មានការឧបត្ថម្ភសម្ភារៈ ដល់ផ្នែកពិសោធន៍ ដោយមានម៉ាស៊ីនពិសោធន៍ ដែលអាចធ្វើតេស្តទៅលើថ្មមួយចំនួន ព្រមទាំងអាចជួយបន្សាបជាតិអំបិលនៅលើថ្ម និងពីរបៀបថាតើត្រូវដកយកជាតិអំបិលចេញ ពីថ្មដោយរបៀបណាទៀតផង។
លោក គ្រីស្តុស បៀរឃើ (Christoph BUECKER) បានសង្គត់ធ្ងន់ថា តាមរយៈការបណ្ដុះបណ្ដាលអ្នកជំនាញអភិរក្ស និងព្យាបាលថ្មនៅក្នុងតំបន់រមណីយដ្ឋានអង្គរ សព្វថ្ងៃនេះ ធនធានមនុស្សរបស់ប្រទេសកម្ពុជាជំនាន់ថ្មី មានចំនួនកើនឡើង មានសមត្ថភាពបំពេញការងារនៅតាមការដ្ឋានជួសជុលប្រាសាទដោយខ្លួនឯង ដោយពុំចាំបាច់មានអ្នកជំនាញបរទេសទាំងស្រុងដូចកាលពីមុនទៀតហើយ។ លើសពីនោះ សិក្ខាកាមទាំងអស់ បានបង្ហាញពីទឹកចិត្តស្រលាញ់កេរមរតកដូនតាខ្លួន ដោយខិតខំយកចិត្តទុករៀនសូត្ររហូតក្លាយខ្លួនជាអ្នកជំនាញ ប្រែខ្លួនពីមនុស្សម្នាក់ដែលចេះសង្កេត តាមដានថ្ម និងបន្តថែរក្សាសម្បត្តិបេតិកភណ្ឌរបស់ខ្លួនទៀតផង៕
អត្ថបទ និងរូបភាព៖ លោក ជា ស្រស់
កែសម្រួលអត្ថបទ៖ លោក សេង ផល្លី
