ជុំវិញការផ្ទេរកម្មសិទ្ធកាន់កាប់ដីធ្លីស្របច្បាប់ លោក អ៊ឹង វិសាល ប្រធានការិយាលសុរិយោដី និងភូមិសាស្រ្ត នៃមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តសៀមរាប សង្កេតឃើញថា ប្រជាពលរដ្ឋបានចំណាយថវិកាជាច្រើន ដើម្បីស្វែងរកអ្នករត់ការឯកសារ។ បញ្ហានេះ លោកបញ្ជាក់ថា ប្រជាពលរដ្ឋជាភាគីផ្ទេរកម្មសិទ្ធកាន់កាប់ដីទាំងសងខាង អាចមកមកស្នើ និងបំពេញឯកសារដោយខ្លួនឯង ដោយមិនចាំបាច់មានអ្នករត់ការឡើយ។
លើកឡើងក្នុង កម្មវិធីសន្ទនាមតិ លើប្រធានបទ « នីតិវិធីផ្តល់សេវាកាត់ប្លង់ដី និងផ្ទេរកម្មសិទ្ធដីធ្លីស្របច្បាប់ » របស់មន្ទីរព័ត៌មានខេត្តសៀមរាប ថ្ងៃទី៣១ ខែមករា ឆ្នាំ២០២៣ លោក អ៊ឹង វិសាល បង្ហាញថា នីតិវិធីក្នុងការផ្ទេរកម្មសិទ្ធិ អចលនវត្ថុ ឬហៅថាកាត់ប្លង់ដី ជំហានដំបូងប្រជាពលរដ្ឋ ត្រូវដាក់ពាក្យស្នើសុំផ្ទេរកម្មសិទ្ធ នៅអង្គភាពច្រកចេញចូលតែមួយ ស្ថិតក្នុងសាលាខេត្តសៀមរាប និងរង់ចាំទទួលយកឯកសារទាំងអស់នោះ ជំហានទី២ យកឯកសារទាំងនោះ ទៅការិយាល័យរៀបចំដែនដីនគរូបនីយកម្ម និងភូមិបាលស្រុក ក្រុង ដែលទីតាំងដីនោះស្ថិតនៅ ដោយមាន ភាគីផ្ទេរ និងទទួល ឬ ទិញ និងលក់ ជាមួយសាក្សី២នាក់ និងមន្ត្រីសាលាឃុំ ឬសាលាសង្កាត់។ ជំហានទី៣ ដើម្បីកសាងឯកសារកាត់ប្លង់ដីនោះ ត្រូវឯកសារទាំងអស់នោះ ទៅចុះហត្ថលេខាពីមេឃុំ ឬ ចៅសង្កាត់ ជំហានទី៤ ត្រូវយកឯកសារដែលបានចុះហត្ថលេខានោះ មកការិយាល័យរៀបចំដែនដីនគរូបនីយកម្ម និងភូមិបាលស្រុក ក្រុងដដែលនោះវិញ បន្ទាប់ពីពិនិត្យឃើញថាត្រឹមត្រូវ ការិយាល័យរៀបចំដែនដីនគរូបនីយកម្ម និងភូមិបាលស្រុក ក្រុង នឹងបញ្ជូនឯកសារនោះ មកអង្គភាពច្រកចេញចូលតែមួយសាលាខេត្តវិញ។ ជហានទី៥ អង្គភាពច្រកចេញចូលតែមួយ នឹងបញ្ជូនឯកសារទាំងនោះ មកមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត នឹងពិនិត្យពីភាពត្រឹមត្រូវ នៃឯកសារស្នើសុំផ្ទេរកម្មសិទ្ធកាន់កាប់ដីធ្លីស្របច្បាប់។ ជំហានទី៦ ម្ចាស់ស្នើសុំ ត្រូវមកយកឯកសារនេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ទៅបង់ពន្ធប្រថាប់ត្រានៃការផ្ទេរកម្មសិទ្ធ នៅសាខាពន្ធដារខេត្ត ដោយខ្លួនឯង។ ជំហានចុងក្រោយ បន្ទាប់ពីបង់ពន្ធប្រថាប់ត្រានៃការផ្ទេរកម្មសិទ្ធរួចរាល់ ត្រូវយកឯកសារនោះ មកមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តវិញ ដើម្បីបន្តនីតិវិធី រហូតដល់បានចេញបណ្ណសម្គាល់សិទ្ធិកាន់កាប់អចលនវត្ថុ និងបញ្ជូនទៅអង្គភាពច្រកចេញចូលតែមួយ សាលាខេត្តសៀមរាប និងហៅម្ចាស់ស្នើសុំមកទទួលជាផ្លូវការ។
ជាមួយនោះ លោក អ៊ឹង វិសាល បានបញ្ជាក់ផងដែរថា មុនធ្វើការផ្ទេរកម្មសិទ្ធកាន់កាប់អចលនវត្ថុ ឬហៅថាកាត់ប្លង់ដី ប្រជាពលរដ្ឋត្រូវត្រៀមឯកសារផ្ទាល់ខ្លួនចាំបាច់មួយចំនួនដូចជា អត្តសញ្ញាណបណ្ណ ថតចម្លង និងបញ្ជាក់ត្រឹមត្រូវ សៀវភៅគ្រួសារ ថតចម្លង និងបញ្ជាក់ត្រឹមត្រូវ សេចក្ដីចម្លងសំបុត្របញ្ជាក់កំណើតត្រឹមត្រូវ ករណីដីនោះជាទ្រព្យរួមត្រូវមានសេចក្ដីចម្លងសំបុត្រអាពាហ៍ពិពាហ៍ ប្រសិនបើម្ចាស់ទ្រព្យនៅលីវ ត្រូវបញ្ជាក់ភាពនៅលីវនៅសាលាសង្កាត់ ឬសាលាឃុំរបស់ខ្លួនរស់នៅ។
គួរជម្រាបដែរថា ចំពោះរយៈពេលផ្ទេរកម្មសិទ្ធដីធ្លីមានរយៈពេល ១៥ថ្ងៃ ដោយមិនរាប់ថ្ងៃឈប់សម្រាក ដោយឡែករយៈបង់ពន្ធ អាស្រ័យលើម្ចាស់ខ្លួនឯងផ្ទាល់។ រីឯ ដីមិនទាន់ចុះបញ្ជី អាចផ្ទេរកម្មសិទ្ធដីធ្លីត្រឹមអាជ្ញាធរស្រុក ដែលមាននីតិវិធីចាប់ពីថ្នាក់ភូមិ ឃុំ ភូមិបាលស្រុក រហូតដល់អភិបាលស្រុក និងមានបង់ពន្ធប្រថាប់ត្រាដូចគ្នាដែរ។
អត្ថបទ ៖ លោក ហ៊ុន ឆៃលាង និងកញ្ញា ប្រន ស្រីនីត
កែសម្រួលអត្ថបទ៖ លោក សេង ផល្លី
