ក្រុមយុវជនចំនួន ៣ឃុំ នៅក្នុងស្រុកអង្គរជុំ ខេត្ដសៀមរាប បានរួមគ្នាផ្សព្វផ្សាយតាមរយ:ការសម្ដែងរឿងខ្លីពីការអប់រំដល់សិស្សានុសិស្ស និងអាណាព្យាបាល ព្រមទាំងបង្ហាញដល់អាជ្ញាធរ ឱ្យចូលរួមណែនាំដល់សិស្ស កុំឱ្យបោះបង់បោះការសិក្សា និងបញ្ហាប្រឈម នៃការរៀបអាពាហ៍ពិពាហ៍នៅវ័យក្មេង ដែលធ្វើឱ្យបាត់បង់អនាគត ធនធានមនុស្សនៅក្នុងសង្គមជាតិ។ ក្រុមយុវជនទាំងនោះមកពីក្លឹបកុមារ នៅឃុំតាសោម ឃុំនគរភាស និងឃុំស្រែខ្វាវ ស្រុកអង្គរជុំ ខេត្ដសៀមរាប ដែលរៀបចំដោយអង្គការភ្លែនអន្ដរជាតិកម្ពុជា បានធ្វើឡើងនៅតាមសាលាឃុំ និងសាលារៀន។
តំណាងក្លឹបកុមារទាំងបីឃុំ បានលើកឡើងស្រដៀងគ្នាថា បច្ចុប្បន្នយុវជននៅតាមជនបទ មានប្រមាណជាង ១៥ភាគរយ បានបន្ដការបោះបង់ការសិក្សាត្រឹមថ្នាក់អនុវិទ្យាល័យ ទៅធ្វើការងារជាកម្មករ នៅក្រៅប្រទេស ឬទៅរៀបការទាំងវ័យក្មេង ដោយពួកគាត់គិតថា ការរៀនសូត្រប្រើពេលវេលាច្រើនឆ្នាំ ហើយខ្វះថវិកាផ្គត់ផ្គង់រៀនសូត្រ និងទៅធ្វើការបានលុយទិញសម្ភារ:ទំនើបៗដោយមិនគិតអនាគត់។ ពួកគាត់បានបន្ដថា សិស្សានុសិស្សបោះបង់ការសិក្សានេះ មានកត្ដាជាច្រើន ដូចជា សិស្សលែងមានទឹកចិត្តក្នុងការរៀនសូត្រ បញ្ហាជួបប្រទះក្នុងការសិក្សា, កត្តាគ្រួសារ ដែលជីវភាពគ្រួសារក្រីក្រ ក៏ជាបញ្ហាប្រឈមមួយធ្ងន់ធ្ងរដែរ។ កត្តាសាលារៀន ដូចជា សមត្ថភាពគ្រូ កម្រិតនៃកម្មវិធីសិក្សាលំបាកខ្លាំង និងវិធីសាស្ត្របង្រៀនមិនមានភាពទាក់ទាញជាដើម និងកត្តាសហគមន៍ និងអាជ្ញាធរផងដែរ ជាកត្តាមួយដែលទាក់ទងដល់ការសម្រេចចិត្តបោះបង់ការសិក្សារបស់សិស្សានុសិស្ស។ជាមួយគ្នានោះ ការបោះបង់ការសិក្សា នៅតាមប្រព័ន្ធអ៊ីនធ័រណែតផងដែរ។ ពួកគាត់បានបន្ដថា ដោយឡែកយុវជនទៅរៀបការនៅវ័យក្មេងការលូតលាស់ផ្នែករាងកាយមិនទាន់ពេញលេញ, ខ្វះការយល់ដឹង បានធ្វើឱ្យប៉ះពាល់ដល់ការបង្កើតកូន ប៉ះពាល់ដល់សុខភាព អំពើហឹង្សាក្នុងគ្រួសារបាត់បង់ឱកាសចូលរួមអភិវឌ្ឍន៍សង្គមជាតិ ព្រោះពួកគាត់នៅក្មេងខ្ចីបាត់បង់ធនធានមនុស្សជាដើម។ ក្រុមយុវជនបានបន្ថែមថា ដើម្បីទប់ស្កាត់ និងកាត់បន្ថយការបោះបង់ការសិក្សា និងការរៀបការនៅវ័យក្មេង កន្លងមកអាជ្ញាធរមានសមត្ថកិច្ចពាក់ព័ន្ធបានយកចិត្តទុកដាក់ និងខិតខំប្រឹងប្រែងទប់ស្កាត់ការបោះបង់ការសិក្សា ដោយបានដាក់ចេញជាវិធានការនានានៅតាមសហគមន៍ ជាពិសេសនៅតាមសាលារៀន ដែលប្រឈមនឹងការបោះបង់ការសិក្សាខ្ពស់។
លោក លីវ វិន ជំទប់ទីមួយឃុំស្រែខ្វាវ ស្រុកអង្គរជុំ បានទទួលស្គាល់ពីការបោះបង់ការសិក្សារបស់សិស្ស និងការរៀបអាពិពាហ៍នៅវ័យក្មេង ប៉ុន្ដែបច្ចុប្បន្ននេះ មានការធ្លាក់ចុះច្រើន ហើយអាជ្ញាធរបានចូលរួមចំណែកយ៉ាងខ្លាំងជាមួយអង្គការក្រៅរដ្ឋាភិបាល ធ្វើការផ្សព្វផ្សាយអប់រំដល់ប្រជាពលរដ្ឋឱ្យបានយល់ដឹងកាន់តែច្បាស់ពីការអប់រំដល់កុមារ។ លោកបន្ដថា ការរៀបការមិនគ្រប់អាយុ គឺក្រោម ១៦ឆ្នាំ បានកើតឡើងតាមរយ:អាណាព្យាបាលរបស់ក្មេង ដែលមានបញ្ហាប្រឈមខ្លាំង ហើយអាជ្ញាធរមិនមានការចេញច្បាប់ឱ្យរៀបការនោះឡើយ ខណ:ដែលបោះបង់ការសិក្សាត្រូវបានរិតបន្ដឹង។ លោកបានបន្ដថា ការធ្វើខុសបច្ចេកទេសនៃសំបុត្រអត្រានុកូលដ្ឋាន នាំឱ្យមានការរៀបការនៅវ័យក្មេងផងដែរ។
ព័ត៌មានជាតិ ថ្មីៗ
បើតាមតំណាងក្លឹបកុមារ បានលើកឡើងថា ពួកគាត់បានចូលរួមផ្សព្វផ្សាយជាច្រើន តាមរយ:កម្មវិធីស្នូរជួង ក៏ដូចជាការសម្ដែងរឿងខ្លី ស្ដីពីផលប៉ះពាល់នៃការបោះបង់ការសិក្សា ការរៀបការមិនគ្រប់អាយុជាដើម ដើម្បីបំផុសស្មារតីរបស់យុវជនកុំឱ្យបោះបង់ការសិក្សា និងទៅរៀបការទាំងវ័យក្មេង ដែលមកដល់ពេលនេះ មានការយល់ដឹងច្រើន ហើយបញ្ហាខាងលើត្រូវបានថយចុះ។ ពួកគេជឿជាក់ថា ការអប់រំអាចធ្វើឱ្យកុមារក្លាយជាអ្នកដឹកនាំ និងមានអនាគតល្អ នាពេលខាងមុខ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ។
