សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ បានការសហការគាំទ្រពីមន្ទីរពាណិជ្ជកម្មខេត្ត និងរដ្ឋបាលបាលខេត្តសៀមរាប បានរៀបចំបោះឆ្នោតជ្រើសតាំងប្រធានមួយរូប និងសមាជិក ១០រូបទៀត ដោយមានអ្នកចុះឈ្មោះបោះឆ្នោតជាង ៣០០នាក់ ជាសមាជិក សមាជិកា មកពីពាណិជ្ជករ អាជីវករក្នុងខេត្ត សម្រាប់បំពេញបន្ថែមសមាសភាព នៃអាណត្តិទី៣។ ក្រោយពីដំណើរការបោះឆ្នោតពេញមួយថ្ងៃ នៅថ្ងៃទី២៦ ខែមករាឆ្នាំ២០២៣ ជាលទ្ធផលឧកញ៉ាបណ្ឌិត ហ៊ុយ ភៀវ ត្រូវបានជាប់ឆ្នោត ជាប្រធានសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យសម្រាប់បន្តដឹកនាំអាណត្តិទី៣នេះ។
ការបោះឆ្នោតនេះ និងការរាប់សន្លឹកឆ្នោត បានប្រព្រឹត្តិទៅនៅមន្ទីរពាណិជ្ជកម្មខេត្តសៀមរាប ក្រោមអធិបតីភាពឯកឧត្តម គឹម មាសសុខសីហា អនុរដ្ឋលេខាធិកាក្រសួងពាណិជ្ជកម្ម, លោក នាក់ ណេរ៉ុន អភិបាលរងខេត្តសៀមរាប ឯកឧត្តមឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា រួមជាមួយ វត្តមាន លោក/លោកស្រី ប្រតិភូក្រសួងពាណិជ្ជកម្ម និងសមាជិកសាមញ្ញ នៃសភាពាណិជ្ជកម្មមណ្ឌលសៀមរាប ឧត្តរមានជ័យជាច្រើនផងដែរ។ នេះជាការបោះឆ្នោតជ្រើសរើសសមាជិកជ្រើសតាំងបង្រ្គប់កូរ៉ុមចំនួន ១៥រូប ជាប្រធាន និងសមាជិក សម្រាប់អាណត្តិទី៣ លើកទី១ មានន័យថាសភាពាណិជ្ជកម្មខេត្ត ក្នុងមួយអាណត្តិមាន ៦ឆ្នាំ ក្នុងរយ:ពេល ៣ឆ្នាំត្រូវបោះឆ្នោតម្តងហៅថាបោះឆ្នោតពាក់កណ្តាលអាណត្តិ ដើម្បីជ្រើសរើសប្រធាន និងសមាជិកជ្រើសតាំង។
ឯកឧត្តមឧកញ៉ា ងួន ម៉េងតិច មានប្រសាសន៍ថា៖ កន្លងមកសភាពាណិជ្ជកម្មកម្ពុជា សម្រេបាននូវសមិទ្ធផលជាច្រើន ដោយសារការយកចិត្តទុកដាក់គាំទ្រពីសំណាក់អាជ្ញាធរពាក់ព័ន្ធគ្រប់លំដាប់ថ្នាក់ ឯកឧត្តមសង្ឃឹមជឿជាក់ថាសភាពាណិជ្ជកម្មខេត្តសៀមរាប ឧត្តរមានជ័យ ក្នុង អាណត្តិថ្មី នៃការដឹកនាំរបស់ឧកញ៉ា ហ៊ុយភៀវ នឹងនាំយកនូវអ្វីដែលថ្មី និងផ្តល់ផលប្រយោជន៍ដល់ការប្រកបអាជីវកម្មជូនដល់សមាជិក សមាជិកា ក៏ដូចជាពាណិជ្ជករ និងសេវាករនៅក្នុងខេត្ត ដើម្បីឆ្លើយតបដល់ការគាំទ្រពីសំណាក់សមាជិក សមាជិកា។ ជាមួយគ្នានេះ សភាពាណិជ្ជខេត្ត ជួយលើកស្ទួយដល់សេដ្ឋកិច្ចក្នុងខេត្ត តាមរយ:ការកៀងគរអ្នកវិនិយោគមកបណ្តាក់ទុន ក៏ដូចជាដើម្បីបង្កើតការងារ បង្កើនប្រាក់ចំណូលដល់ប្រជាពលរដ្ឋក្នុងខេត្តផងដែរ។
លោក នាក់ ណេរ៉ុន អភិបាលរងខេត្ត បង្ហាញថា៖ សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ សម្រាប់អាណត្តិទី៣ នេះនឹងនៅបន្តពង្រឹងសាមគ្គីភាពផ្ទៃក្នុង សហការល្អជាមួយមន្ទីរ-អង្គភាពពាក់ព័ន្ធ ជាតំណាងវិស័យឯកជន ដែលការពារផលប្រយោជន៍ដល់បងប្អូនពាណិជ្ជករ សេវាករ អាជីវករ ក្នុងខេត្ត និងទាក់ទាញវិនិយោគិន ក្នុង និងក្រៅប្រទេស អោយមកវិនិយោគក្នុងខេត្តសៀមរាប សំដៅបង្កើនសកម្មភាពសេដ្ឋកិច្ចក្នុងខេត្ត អោយកាន់តែប្រសើរ។លោកបានជំរុញដល់ថ្នាក់ដឹកនាំ និងសមាជិក សមាជិកានៃសភាពាណិជ្ជកម្មខេត្តនេះបន្តសហការល្អជួយគ្នាទៅវិញទៅមក សំដៅឱ្យវិស័យពាណិជ្ជកម្មរបស់ខេត្តបន្តការរីកចម្រើនឡើងថែមទៀត។ ឯកឧត្តម គឹម មាសសុខសីហា បានអបអរសាទរ និងវាយតម្លៃខ្ពស់ចំពោះការខិតខំប្រឹកប្រែងរបស់ថ្នាក់ដឹកនាំ សមាជិក សមាជិកាសភាពាណិជ្ជកម្មមណ្ឌលសៀមរាប ឧត្តរមានជ័យ ក្នុងកិច្ចសហការជាមួយរដ្ឋបាលខេត្ត អង្គភាពមន្ទីរពាក់ព័ន្ឋ និងដៃគូពាណិជ្ជកម្មនានា ឲ្យសម្រេចបានជោគជ័យជាបន្តនូវការងារស្នូលរបស់ខ្លួន។ ឯកឧត្តម បន្តថា៖ កត្តាជោគជ័យនេះអាចសម្រេចទៅបានគឺដោយសារប្រទេសជាតិ ក្រោមការដឹកនាំដ៏ឈ្លាសវៃនិងប៉ិនប្រសព្វរបស់សម្តេចតេជោសែន នាយករដ្ឋមន្ត្រី តាមរយ:នយោបាយឈ្នះ ឈ្នះ បាននាំមកនូវសុខសន្តិភាព ស្ថេរភាពនយោបាយ និងការអភិវឌ្ឍន៍រីកលូតលាស់លើគ្រប់វិស័យ។ ឯកឧត្តម ថា៖ សភាពាណិជ្ជកម្ម ជាវិស័យឯកជន ចូលរួមក្នុងការលើកកម្ពស់ភាពប្រកួតប្រជែង និងអភិវឌ្ឍន៍ទីផ្សារការងារ និងជាក្បាលម៉ាស៊ីនជំរុញកំណើនសេដ្ឋកិច្ចជាតិ ជួយទាក់ទាញវិនិយោគ បង្កើតការងារក្នុងស្រុក ជាពិសេសបង្កើនប្រាក់ចំណូលជូនប្រជាជន។
ឯកឧត្តម បានពិនិត្យឃើញថា ការបោះឆ្នោតនេះប្រព្រឹត្តិទៅដោយរលូន ត្រឹមត្រូវ និងយុត្តិធម៌ ព្រមទាំងបានលើកទឹកចិត្ត ឲ្យបន្តសហការល្អជាមួយមន្ទីរ-អង្គភាពពាក់ព័ន្ធ ក្នុងការទាក់ទាញវិនិយោគិនក្នុង និងក្រៅប្រទេស អោយមកវិនិយោគក្នុងខេត្តសៀមរាប សំដៅបង្កើនសេដ្ឋកិច្ចក្នុងខេត្តអោយកាន់តែប្រសើរ ។ ឧកញ៉ា បណ្ឌិត ហ៊ុយភៀវ បានឲ្យដឹងថា៖ សភាពាណិជ្ជកម្មមណ្ឌលសៀមរាប -ឧត្តរមានជ័យ បង្កើតឡើង ក្នុងគោលដៅជួយដល់វិស័យឯកជន គ្របដណ្តប់លើវិស័យចំនួន៤ មាន ពាណិជ្ជកម្ម កសិកម្ម ឧស្សាហ៍កម្ម និងទេសចរណ៍។ ក្រោមការយកចិត្តទុកដាក់ដោយរាជរដ្ឋាភិបាល ត្រូវបានបង្កើតជាមណ្ឌលសភាពាណិជ្ជកម្មតែមួយ តាមរយ:អនុក្រឹត្យលេខ ១២៤ អនក្រ.បក ចុះថ្ងៃទី១៧ ខែមិថុនា ឆ្នាំ២០១១៕
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
