ក្រុមបវរកញ្ញាឯកភពផែនដីអន្តរជាតិ ប្រមាណជា ២០ប្រទេស បានបង្ហាញថា ពួកគេមានមោទកភាពក្នុងការធ្វើដំណើរមកកាន់កម្ពុជា ជាពិសេសមកកាន់ទឹកដីប្រាង្គប្រាសាទដ៏អច្ឆរិយៈសៀមរាបអង្គរ របស់ប្រទេសនេះ ហើយពួកគេអះអាងថា នឹងប្រើប្រាស់បណ្តាញសង្គមផ្ទាល់ខ្លួនរបស់ពួកគេ ដើម្បីផ្សព្វផ្សាយពីវិស័យទេសចរណ៍របស់កម្ពុជា ជាពិសេសខេត្តសៀមរាប។
នៅក្នុងដំណើរកម្សាន្តនៅតំបន់ផប់ស្ទ្រីត ក្រុងសៀមរាប នារាត្រីថ្ងៃទី២៦ ខែមករា ឆ្នាំ២០២៣ ក្រុមបវរកញ្ញាឯកភពផែនដី (Miss Planet International) បានលើកឡើងប្រហាក់ប្រហែលគ្នាថា ពួកគេពិតជាសប្បាយរីករាយ និងមានមោទកភាពដែលបានមកកាន់ប្រទេសកម្ពុជា។ កម្ពុជាជាទីកន្លែងដែលពួកគេមានអារម្មណ៍ថាកក់ក្តៅ ប្រជាជនមានភាពរួសរាយរាក់ទាក់។ កម្ពុជា ជាពិសេសខេត្តសៀមរាប ពិតជាស្រស់ស្អាត និងសូមអញ្ជើញអ្នកទេសចរចូលមកកម្សាន្តនៅខេត្តនេះឲ្យបានកាន់តែច្រើន។
សូមជម្រាបថា បវរកញ្ញាឯកភពផែនដីអន្តរជាតិ (Miss Planet International) ដែលមកដល់កម្ពូជានាពេលនេះដែរ គឺដើម្បីចូលរួមអបអរពិធីបុណ្យអង្ករ នៅខេត្ដសៀមរាប ដើម្បីផ្សព្វផ្សាយទេសចរបៃតងនៅកម្ពុជា។
ព័ត៌មានជាតិ ថ្មីៗ
បើតាមលោក ហ៊្វីលីព កៅ ប្រធានសមាគមក្លឹបទេសចរណ៍សៀមរាប បានឱ្យដឹងថា វត្តមានរបស់កញ្ញាអន្តរជាតិ (Miss Planet Internatioral) នៅលើទឹកដីខេត្តសៀមរាប ក្នុងកម្មវិធីនៅពេលនេះ គឺពិតជាមានសារៈសំខាន់ណាស់ក្នុងចូលរួមចំណែកផ្សព្វផ្សាយ អំពីគោលដៅទេសចរណ៍ ដ៏មានសក្ដានុពលក្នុងខេត្តសៀមរាប ផលិតផល និងសេវាកម្មទេសចរណ៍ សម្បត្តិធម្មជាតិ ដ៏សម្បូរបែប ព្រមទាំងជាមួយស្នាមញញឹមប្រកបដោយភាពកក់ក្ដៅរួសរាយរាក់ទាក់របស់ប្រជាជនកម្ពុជា ទៅកាន់ភ្ញៀវទេសចរទូទាំងពិភពលោក។ ជាមួយគ្នានោះ វត្តមានរបស់បវរកញ្ញាអន្តរជាតិ (Miss Planet International) ក៏នឹងជួយផ្សព្វផ្សាយសក្តានុពលវិស័យស្រូវអង្ករកម្ពុជា ដែលជា មាស “ស” របស់កម្ពុជា ឱ្យ កាន់តែមានភាពល្បីល្បាញថា ជា “អង្ករល្អដាច់គេរបស់ពិភពលោក”ផងដែរ។
សូមបញ្ជាក់ថា ដោយមានការផ្តួចផ្តើមពីក្លិបទេសចរណ៍ខេត្តសៀមរាប និងសហព័ន្ធស្រូវអង្ករកម្ពុជា និងមានការសហការ និងសម្របសម្រួលពីក្រសួងទេសចរណ៍ ក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម ក្រសួងវប្បធម៌ និងវិចិត្រសិល្បៈ រដ្ឋបាលខេត្តសៀមរាប សហភាពសហព័ន្ធយុវជន កម្ពុជាខេត្តសៀមរាប សភាពាណិជ្ជកម្មសៀមរាប-ឧត្តរមានជ័យ និងសមាគមចុងភៅកម្ពុជា ព្រមទាំងមានការចូលរួមឧបត្ថម្ភគាំទ្រដោយ ក្រុមហ៊ុនផ្សេងទៀត បានបង្កើតកម្មវិធីបុណ្យអង្ករនេះឡើង ក្នុងគោលបំណងដើម្បីផ្សព្វផ្សាយសក្ដានុពលវិស័យស្រូវអង្ករកម្ពុជា ដែលជាមាស “ស” ខណ:ដែលង្ករកម្ពុជាបានឈ្នះពានរង្វាន់ “អង្ករល្អដាច់គេ លើពិភពលោក”៕
អត្ថបទ និងរូបភាព៖ លោក ជា ស្រស់ លោក បូ សាវី
កែសម្រួល៖ លោក អ៊ុន ណារាជ្យ
