សមិទ្ធិផលជាច្រើន ដែលជាជំនួយរបស់សប្បុរសជនប្រទេសសឹង្ហហ្គាពួរ ផ្ដល់ជូនដល់ប្រជាពលរដ្ឋក្នុងភូមិពង្រ ឃុំនគរភាស ស្រុកអង្គរជុំ ខេត្តសៀមរាប មានដូចជា៖ ផ្លូវដីសរ អណ្ដូងទឹក បណ្ណាល័យមួយ និងភ្លើងសូឡាបំភ្លឺផ្លូវ ត្រូវបានសម្ភោធដាក់ឱ្យប្រើប្រាស់ជាផ្លូវការ នៅថ្ងៃទី២៦ ខែមករា ឆ្នាំ២០២៣នេះ។
លោក អ៊ុន ញ៉ាន តំណាងសប្បុរសជនប្រទេសសឹង្ហហ្គាពួរ បានបញ្ជាក់ថា សមិទ្ធិផលដែលបានសម្ពោធដាក់ឲ្យប្រើប្រាស់នាពេលនេះ បានចំណាយថវិកាអស់ជាង ៣ម៉ឺនដុល្លា ដោយកសាងឡើងដើម្បីជួយសម្រួលការធ្វើដំណើរ និងលើកស្ទួយជីវភាពប្រជាពលរដ្ឋនៅស្រុកអង្គរជុំ ខេត្ដសៀមរាប។ ក្នុងនោះរួមមាន៖ បណ្ណាល័យមួយខ្នង នៅសាលាបឋមសិក្សាពង្ស ចំណាយថវិកា ១ម៉ឺន ២ពាន់ដុល្លា, សូឡាបំភ្លឺផ្លូវចំនួន ២៥បង្គោល និងដាំដើមឈើអមសងខាងផ្លូវចំនួន ២០០ដើម ចំណាយថវិកា ៣.៦០០ដុល្លា, សាងសង់ផ្លូវលំចំនួនពីរខ្សែ និងលូទឹកកាត់ថ្នល់ចំនួន ៨កន្លែង ចាប់ពីភូមិពង្រ ទៅភូមិជួយចក្រី សរុបប្រវែង ២.៦៧៥ម៉ែត្រ និងតភ្ជាប់ផ្លូវពីចំណុចគោក បុស្សព្រាលទៅភូមិស្បូវភ្លាំង ប្រវែង ៨០០ម៉ែត្រ ចំណាយថវិកា ៩.៤០០ដុល្លា, អណ្តូងស្នប់ចំនួន៣០ ចំណាយថវិកា ៦ពាន់ដុល្លា។
លោកបន្ដថា ផ្លូវដែលសាងសង់នេះដែរ មានទទឹង ៨ម៉ែត្រ ខ្នងផ្លូវ ៦ម៉ែត្រ និងដាក់លូចំនួ ៨កន្លែង។ ជាមួយគ្នានោះសប្បុរសជនតាមរយៈមូលនិធិរបស់លោក ក៏មានគម្រោងសាងសង់ផ្លូវក្រវាត់ភូមិប្រវែង ៣.៦១២ម៉ែត្រផងដែរ។ សប្បរសជនដែលផ្ដល់ជំនួយអភិវឌ្ឍន៍នៅជនបទនេះ ពួកគាត់ចង់ឱ្យប្រជាជនខ្មែរងាយស្រួលធ្វើដំណើរជាពិសេសការដឹកជញ្ជូនកសិផលដំណាំកសិកម្ម ហើយលោកនឹងបន្ដរកជំនួយពីសប្បុរសជនក្នុង និងក្រៅប្រទេសបន្ថែមទៀត ដើម្បីចួលរួមអភិវឌ្ឍន៍ឃុំនគរភាសនេះ ឱ្យកាន់តែមានភាពរីកចំរើនបន្ថែមទៀត។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោក ភន់ សុខុម អភិបាលស្រុកអង្គរជុំ មានប្រសាសន៍ថា សមិទ្ធិផលជាច្រើននៅមូលដ្ឋានរបស់សប្បុរសជនពីប្រទេសសឹង្ហហ្គាពួរនេះ បានបង្ហាញថា ជាទឹកចិត្ដដ៍ល្អក្នុងក្នុងការចូលរួមអភិវឌ្ឍន៍សង្គមក៍ដូចជាការអភិវឌ្ឍន៍ធនធានមនុស្ស។ លោកបន្ដថា ប្រជាជនកម្ពុជា គឺជាមិត្ដភាពយូរអង្វែងរវាងប្រទេសទាំងពីរ ដែលលោកចង់ឱ្យបណ្ដាសប្បុរសជនផ្សេងៗទៀតចូលរួមអភិវឌ្ឍន៍នៅមូលដ្ឋាន។ ការអភិវឌ្ឍន៍សង្គមជាតិរបស់រាជរដ្ឋាភិបាល មិនអាចខ្វះបានជាមួយវិស័យឯកជន អង្គការនានា និងសប្បុរសជនផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
