យោធភូមិភាគទី៤ នៅថ្ងៃទី២៥ ខែមករា ឆ្នាំ២០២៣ បានបើកកិច្ចប្រជុំបូកសរុបលទ្ធផលការងារយោធា សន្តិសុខ ឆ្នាំ២០២២ និងលើកទិសដៅអនុវត្តបន្តឆ្នាំ២០២៣ ក្រោមអធិបតីភាពឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ រួមនឹងឯកឧត្តម ឧត្តមសេនីយ៍ឯក ទេព សំអាន អគ្គនាយករង អគ្គនាយកដ្ឋានភស្តុភា ហិរញ្ញវត្ថុ ក្រសួងការពារជាតិ ប្រចាំទិសយោធភូមិភាគទី៤ និង ឯកឧត្តម ឧត្តមសេនីយ៍ឯក សេង សារឺ មេបញ្ជាការរងកងទ័ពជើងគោក ប្រធានទីបញ្ជាការមុខប្រចាំទិសយោធភូមិភាគទី៤ រួមនឹងវត្តមាន ឯកឧត្តម មេបញ្ជាការរង នាយសេនាធិការ សេនាធិការរង មេបញ្ជាការកងពលតូចថ្មើរជើង៤១ ៤២ មេបញ្ជាការ តំបន់ប្រតិបត្តិការសឹករងទាំង៤ នាយការិយាល័យទាំង១៨ និងអង្គភាពចំណុះបញ្ជាការដ្ឋានយោធភូមិភាគទី៤ ជាច្រើនរូប។
ឯកឧត្តម ឧត្តមសេនីយ៍ឯក ពៅ ហេង មានប្រសាសន៍ថា ការងារទទួលបានលទ្ធផលល្អ និងសមិទ្ធផល គឺកើតចេញពីការរួមគ្នារបស់យោធិនយើងដែលបានខិតខំអស់ពីកម្លាំងកាយចិត្ត ប្រាជ្ញាស្មារតីក្នុងការបំពេញភារកិច្ចដែលរដ្ឋាភិបាល ក្រសួងការពារជាតិ អគ្គបញ្ជាការ និងបញ្ជាការដ្ឋានកងទ័ពជើងគោកបានប្រគល់ជូន។ ហើយក្រៅពីការងារយោធារក្សាសុខសុវត្តិភាព នៅក្នុងតំបន់ទទួលខុសត្រូវ ជាពិសេសនៅតាមខ្សែរបន្ទាត់ព្រំដែនរបស់ ទិសយោធភូមិភាគទី៤ ក៏បានចូលរួមសហការណ៍បានយ៉ាងល្អនៅក្នុងការចូលរួមយុទ្ធនារការចាក់វ៉ាក់សាំងការពារជំងឺកូវីដ-១៩ ។
ឯកឧត្តមបន្តថា ក្រៅពីនេះកងកម្លាំងយើង ក៏បានសហការការពារក្នុងយុទ្ធនារការបោះឆ្នោតឃុំសង្កាត់កន្លងទៅទទួលបានជោគជ័យ និងសម្រេចបានយ៉ាងល្អនូវការងារជាច្រើនដូចជា៖ ការងារប្រជុំកិច្ចការព្រំដែន RBC កម្ពុជា-ថៃ ការងារការពារថ្នាក់ដឹកនាំកំពូលៗ ក្នុងកិច្ចការប្រជុំអាស៊ានចង្អៀត ដែលរៀបចំឡើងនៅលើទឹកដីនៃខេត្តសៀមរាប ការងារប្រុងប្រៀបជួយសង្គ្រោះគ្រោះមហន្តរាយ ការងារប្រវត្តិសាស្ត្រយោធា ការងារជួយដឹកជញ្ជូនសម្ភារៈ គ្រឿងផ្ទះជូនប្រជាពលរដ្ឋ ដែលស្ម័គ្រចិត្តរើចេញពីតំបន់រមណីយដ្ឋានអង្គរ ទៅរស់នៅតំបន់អភិវឌ្ឍន៍ថ្មី រុនតាឯក និងពាក់ស្នែ និងការងារកសាងប្រៀបការពារជាតិជាដើម។
ក្នុងឱកាសនោះដែរ ឯកឧត្តម ក៏បានជំរុញដល់គ្រប់អង្គភាពទាំងអស់ ត្រូវបន្តយកចិត្តទុកដាក់ហ្វឹកហ្វឺនតាមបណ្តាកងឯកភាព នូវយុទ្ធវិធី ជំនាញជាក់ស្តែង ការងារអប់រំចិត្តសាស្ត្រ សតិអារម្មណ៍ ការងារបំផុសចលនាប្រឡងប្រណាំងទៅតាមបណ្តាអង្គភាព និងមិនអោយមានការប្រើប្រាសគ្រឿងញៀននៅក្នុងជួរកងយោធពលខេមរភូមិន្ទ ជាពិសេសនៅក្នុងអង្គភាពយោធភូមិភាគទី៤ ជាដាច់ខាត៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
