ថ្លែងក្នុងពិធីបិទសន្និបាតបូកសរុបការងារប្រចាំឆ្នាំ២០២២ និងលើកទិសដៅអនុវត្តការងារឆ្នាំ២០២៣ របស់រដ្ឋបាលខេត្តសៀមរាប នាថ្ងៃទីទី២៨ ខែមីនា ឆ្នាំ២០២៣នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប បានជំរុញដល់អាជ្ញាធរខេត្តសៀមរាប ត្រូវចាត់វិធានការឲ្យបានម៉ឺងម៉ាត់ ទាំងវិធានការច្បាប់ វិធានការរដ្ឋបាល ក្នុងការការពារព្រៃឈើ និងដីឧទ្យានជាតិ ពីការកាប់ទន្ទ្រានយកធ្វើជាកម្មសិទ្ធិឯកជន។
សម្តេចពិជ័យសេនា ទៀ បាញ់ បានបញ្ជាក់ថា កន្លងមករាជរដ្ឋាភិបាលកម្ពុជា បានដាក់ចេញនូវវិធានការនានា ក្នុងការទប់ស្កាត់ការកាប់ទន្ទ្រានយកដីព្រៃដោយខុសច្បាប់ នៅក្នុងតំបន់ការពារធនធានធម្មជាតិ។ ដូច្នេះដើម្បីបន្តការគ្រប់គ្រងអភិរក្សធនធានធម្មជាតិរបស់យើងឲ្យបានគង់វង្ស រដ្ឋបាលខេត្តសៀមរាប ត្រូវអនុវត្តកិច្ចការសំខាន់ៗមួយចំនួនដូចជា៖ ត្រូវខិតខំយកចិត្តទុកដាក់ ផ្សព្វផ្សាយ អប់រំ និងណែនាំដល់រដ្ឋបាលគ្រប់ថ្នាក់ ដល់ប្រជាពលរដ្ឋក្នុងខេត្តសៀមរាប និងអ្នកពាក់ព័ន្ធនានាដើម្បីចូលរួមសហការក្នុងការការពារបរិស្ថាន និងធនធានធម្មជាតិ របស់ប្រទេសជាតិយើងឲ្យបានស្ថិតស្ថេរគង់វង្ស។ ត្រូវលើកកម្ពស់វិធានការណ៍បង្ការ និងទប់ស្កាត់សកម្មភាពការរុករានទន្ទ្រានកាន់កាប់ដីព្រៃរបស់រដ្ឋ ឬដីនៅក្នុងតំបន់ការពារធនធានធម្មជាតិនិងគម្របព្រៃឈើ។
សម្តេចពិជ័យសេនា បានសង្កត់ធ្ងន់ថា ក្នុងករណីរកឃើញសកម្មភាពខុសច្បាប់ទាំងនោះ អាជ្ញាធរមានសមត្ថកិច្ច និងកងកម្លាំងទាំងអស់ត្រូវចាត់វិធានការរដ្ឋបាល ឬវិធានការច្បាប់ឲ្យបានម៉ឺងម៉ាត់បំផុត។ ជាមួយគ្នានេះដែរ ត្រូវណែនាំដល់អាជ្ញាធរភូមិឃុំមិនត្រូវចុះហត្ថលេខាលើឯកសារទិញលក់ ឬកាន់កាប់ដីព្រៃដែលខុសច្បាប់ទាំងនោះឡើយ។ ជាមួយនោះសម្តេចពិជ័យសេនា ក៏បានជំរុញដល់អាជ្ញាធរខេត្ត ត្រូវសហការជាមួយក្រសួងស្ថាប័ននានា ត្រូវសិក្សារួមគ្នាឲ្យបានម៉ត់ចត់ដោយកំណត់តំបន់ណាដែលត្រូវការពារ ក្នុងន័យសំដៅធ្វើយ៉ាងណាកាត់បន្ថយជម្លោះដីធ្លី និងបញ្ចប់ការទន្ទ្រានតំបន់ការពារធនធានធម្មជាតិ។
បើតាមរបាយការណ៍របស់ ឯកឧត្តម ទៀ សីហា អភិបាលខេត្តសៀមរាប បានឲ្យដឹងថា នៅក្នុង២០២២ និងដើមឆ្នាំ២០២៣នេះ អាជ្ញាធរបានខិតខំសហការជាមួយក្រសួងស្ថាប័ននានា ក្នុងការដោះស្រាយវិវាទនានា ជាពិសេសវិវាទដីធ្លី។ ជាមួយគ្នានេះដែរ ក្រោមការផ្តួចផ្តើមរបស់ប្រមុខរាជរដ្ឋាភិបាលនៅក្នុងការបញ្ចប់លែងឲ្យមានសំណង់ខុសច្បាប់នៅក្នុងតំបន់រមណីយដ្ឋានអង្គរនោះ អាជ្ញាធរខេត្តរួមជាមួយអ្នកពាក់ព័ន្ធ ក៏បានរៀបចំទីតាំងចំនួន២ គឺនៅភូមិរុនតាឯក ស្រុកបន្ទាយស្រី និងតំបន់ពាក់ស្នែង ក្នុងស្រុកអង្គរធំ ដែលមានប្រជាពលរដ្ឋស្ម័គ្រចិត្តផ្លាស់ប្តូរទីលំនៅទៅកាន់ទីតាំងទាំងពីរនេះ ជាង៩ពាន់គ្រួសារ។ ឯកឧត្តមលើកឡើងថា ទន្ទឹមគ្នានេះ អាជ្ញាធរខេត្តក៏បានចុះពិនិត្យ និងកំណត់នូវផ្ទៃដីតំបន់៣ តំបន់២ នៃដែនបឹងទន្លេសាប និងបានដាក់ជូនប្រមុខរាជរដ្ឋាភិបាលដើម្បីពិនិត្យសម្រេចរួចហើយដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ អ៊ុន ណារាជ្យ
