នៅព្រឹកថ្ងៃទី២៩ ខែមីនា ឆ្នាំ២០២៣នេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយ រដ្ឋបាលស្រុកសូទ្រនិគម បានធ្វើការបិទផ្សាយជាសាធារណៈ នូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ របស់កម្មវិធីអនុវិស័យរដ្ឋបាលដីធ្លី ដែលគាំទ្រថវិកាដោយរាជរដ្ឋាភិបាលកម្ពុជា នៅក្នុងវត្តខ្ចាស់ឃុំខ្ចាស់ ស្រុកសូទ្រនិគម ក្រោមអធិបតីភាព លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប និង លោក គិម វណ្ណៈ អភិបាល នៃគណៈអភិបាលស្រុកសូទ្រនិគម ។
លោក ផាត់ ដា មេឃុំខ្ចាស់ បានឲ្យដឹងថា ការបិទផ្សាយជាសាធារណៈនូវឯកសារវិនិច្ឆ័យ ការចុះបញ្ជីដីធ្លីមានលក្ខណៈជាប្រព័ន្ធនៅឃុំខ្ចាស់នាពេលនេះ សរុបក្បាលដីមានចំនួន ៧ ៩៨៦ ក្បាលដី នៅក្នុងភូមិចំនួន៧ រួមមាន ៖ ភូមិថ្លាត , ភូមិថ្មី , ភូមិក្បូន , ភូមិគោកសង្កែ , ភូមិជ្រៃ , ភូមិយាងទេស និងភូមិខ្ចាស់ មានរយៈពេល១៥ថ្ងៃ គឺចាប់ពីថ្ងៃទី២៩ ខែមីនា រហូតដល់ថ្ងៃទី១២ ខែមេសា ឆ្នាំ២០២៣ ដោយគិតរួមទាំងថ្ងៃបុណ្យ និងថ្ងៃឈប់សម្រាក ដូច្នេះក្នុងឱកាសនេះ សូមសំណូមពរដល់បងប្អូនប្រជាពលរដ្ឋដែលជាម្ចាស់ក្បាលដី មកចូលរួមពិនិត្យផ្ទៀងផ្ទាត់ឱ្យបានគ្រប់គ្នា ព្រោះនេះជាលើកចុងក្រោយដែលម្ចាស់ក្បាលដីត្រូវតែពិនិត្យផ្ទៀងផ្ទាត់កុំបីខាន បើអាក់ខានឬយឺតយ៉ាវវានាំឱ្យបាត់បង់ផលប្រយោជន៍របស់បងប្អូន។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត មានប្រសាសន៍ថា៖ ក្រោយពីបញ្ចប់ការបិទផ្សាយជាសាធារណៈ នូវឯកសារនៃការវិនិច្ឆ័យនេះទៅ គណៈកម្មការរដ្ឋបាល នឹងលើកសំណើជូនទៅ ឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ដែលជាម្ចាស់ដី និង អ្នកកាន់កាប់ដីរូបណា ដែលបានបំពេញ លក្ខខណ្ឌ គ្រប់គ្រាន់ តាមនីតិវិធីច្បាប់ និង ជាក្បាលដីមិនមានទំនាស់។
ក្នុងឱកាសនោះដែរ លោក ប៊ូ ជុំសម្បត្តិ បានអំពាវនាវដល់បងប្អូនជាម្ចាស់ដី និងអ្នកកាន់កាប់ដី ព្រមទាំងស្ថាប័ននិងអង្គភាពពាក់ព័ន្ឋទាំងអស់ មកពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា ជាពិសេសផ្ទៀងផ្ទាត់នៅលើឈ្មោះម្ចាស់ដី សាវតា ទំហំដី ប្រភេទទ្រព្យ និងត្រូវពិនិត្យផងដែរនៅលើប្លង់សុរិយោដីនូវទីតាំងដីនិងរូបរាងដី ព្រោះនេះជាឱកាសចុងក្រោយដែលបងប្អូននិងអ្នកពាក់ព័ន្ឋទាំងអស់មានសិទ្ឋិធ្វើការកែតម្រូវឬជំទាស់តវ៉ាក្នុងករណីដែលពិនិត្យទៅឃើញថាមានកំហុសឆ្គង ជូនមកគណៈកម្មការរដ្ឋបាលពិនិត្យនិងកែតម្រូវជូន ទាំងនេះមានសារៈសំខាន់ណាស់ដើម្បីធានានបានភាពសុក្រឹត្យត្រឹមត្រូវក្នុងការចេញវិញ្ញាបនបត្រសម្គាល់ម្ចាស់អចលនវត្ថុ។
លោក គិម វណ្ណៈ អភិបាលស្រុកសូទ្រនិគម មានប្រសាសន៍ថា កន្លងមកស្រុកសូទ្រនិគម បានធ្វើការបិទផ្សាយជាសាធារណៈនូវឯកសារនៃការវិនិច្ឆ័យនិងចែកប័ណ្ណ បានចំនួន៨.៤១៣ប័ណ្ណរួចមកហើយ នៅឃុំដំដែក និងកំពុងដំណើរការប្រមូលទិន្នន័យនៅឃុំខ្ចាស់និងឃុំចាន់ស ហើយការចុះបញ្ជីដីធ្លីមានលក្ខណៈជាប្រព័ន្ឋ ពិតជាអនុវត្តទៅតាមនិតិវិធីនិងបច្ចេកវិទ្យាទំនើប មានតម្លាភាពនិងការទទួលខុសត្រូវដែលប្រទេសជៀណលឿននៅក្នុងពិភពលោកកំពុងអនុវត្តហើយមានប្រសិទ្ឋភាពខ្ពស់ក្នុងការគ្រប់គ្រងដីធ្លី។នេះជាប្រការសមស្របបំផុតដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាលដើម្បីកាត់បន្ថយភាពក្រីក្រនិងទំនាស់ដីធ្លីក្នុងសង្គមជាតិយើង។
លោក អភិបាលស្រុកបន្តថា៖ជាលទ្ធផល រដ្ឋ និងប្រជាពលរដ្ឋជាម្ចាស់ដី ឬនិងអ្នកកាន់កាប់ដី ទទួលបាននូវសារៈប្រយោជន៍ ដូចជា ៖ រដ្ឋគ្រប់គ្រងបានដីធ្លី ទាំងដីរដ្ឋ និងដីឯកជន ដែលធ្វើឲ្យរដ្ឋមានការងាយស្រួលក្នុងការងាររៀបចំ ដែនដីរដ្ឋបាលដីធ្លី ការបែងចែកដី ការលើកស្ទួយកំរិតជីវភាពរស់នៅរបស់ប្រជាពលរដ្ឋ និងការកាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋ ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ និងអាចធ្វើការបង្កបង្កើនផល ឬប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ និងអាចប្រើប្រាស់វិញ្ញាបនបត្រសម្គាល់ម្ចាស់អចលនវត្ថុ ដើម្បីផលប្រយោជន៍ផ្សេងៗក្នុងការប្រកបមុរបរឬអាជីវកម្មរបស់ខ្លួនជាដើម៕
អត្ថបទ និងរូបភាព: លោក យូ វង្ស
កែសម្រួលដោយ លីវ សាន្ត
