នៅព្រឹកថ្ងៃទី២៩ ខែមីនា ឆ្នាំ២០២៣នេះ អង្គភាពអ្នកនាំពាក្យរាជរដ្ឋាភិបាល បានរៀបចំសន្និសីទសារព័ត៌មាន ស្ដីពី «ភាពជោគជ័យរយៈពេល៥ឆ្នាំកន្លងមក របស់រដ្ឋបាលខេត្ដសៀមរាប» នៅទីស្ដីការគណៈរដ្ឋមន្ដ្រី ក្រោមអធិបតីភាពឯកឧត្ដម ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និង ជា ប្រធានអង្គភាពអ្នកនាំពាក្យរាជរដ្ឋាភិបាល ក្នុងគោលដៅបំផុស និងបង្ហាញជាសាធារណៈនូវយន្ដការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងផ្សព្វផ្សាយពីភាពជោគជ័យ ដែលថ្នាក់មូលដ្ឋានខិតខំប្រឹងប្រែងអនុវត្ត និងសម្រេចបានសមិទ្ធផលជាវិជ្ជមាន ក្រោមការដឹកនាំ របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ។
មានប្រសាសន៍ក្នុងឱកាសបើកសន្និសីទសារព័ត៌មាននេះ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានលើកឡើងពីសមិទ្ធផលសំខាន់ៗ ដែលរដ្ឋបាលខេត្តសម្រេចបានគួរជាទីមោទកភាព ដូចជា ការងារទេសចរណ៍ ការងារកសិកម្ម និង ការងារសន្តិសុខសណ្ដាប់ធ្នាប់ ក្នុងនោះ ការងារអភិវឌ្ឍន៍ហេដ្ឋារចនាសម្ព័ន្ធ រដ្ឋបាលខេត្ត បានបន្តស្តារហេដ្ឋារចនាសម្ព័ន្ធទាំងនៅក្នុង ទីក្រុង និងជនបទ ដោយផ្តោតសំខាន់ លើការសាងសង់ ជួសជុល ថែទាំងបណ្តាញផ្លូវថ្នល់នៅ ក្នុងទីក្រុង ពីទីប្រជុំជនទៅជនបទ និងទីជនបទ ដើម្បីចូលរួមចំណែកលើកស្ទួយជីវភាព ប្រជាជន និងជំរុញកំណើនសេដ្ឋកិច្ចខេត្ត ។
ព័ត៌មានជាតិ ថ្មីៗ
ឯកឧត្តម ទៀ សីហា បន្តថា ការរៀបចំសោភ័ណភាពទីក្រុង ត្រូវបានយកចិត្តទុកដាក់ខ្ពស់ ដោយបានរៀបចំឱ្យមានប្រព័ន្ធលូរំដោះទឹកកខ្វក់ លូទឹកភ្លៀង រៀបចំចំណត សាធារណៈ ការបំពាក់កាមេរ៉ាសុវត្ថិភាព ភ្លើងសញ្ញាចរាចរណ៍ និងបំពាក់អំពូលបំភ្លឺតាមដងផ្លូវ សាធារណៈផងដែរ ពិសេសចំពោះការផ្គត់ផ្គង់អគ្គិសនីបានចែកចាយចំនួន ៩៨,៨១% និងបណ្តាញទឹកស្អាត ត្រូវបានគ្របដណ្តប់ ៧៦%។
ឯកឧត្តមអភិបាលខេត្តសៀមរាប មាសនប្រសាសន៍បន្ថែម ជាមួយនឹងសមិទ្ធផលដែលសម្រេចបានកន្លងមក រដ្ឋបាលខេត្តក៏មានផែនការសម្រាប់អនុវត្តបន្តទៀត ដូចជា កសរពង្រីកសក្តានុពលទេសចរណ៍ គុណភាពផលិតផល និងសេវាកម្មទេសចរណ៍ អភិវឌ្ឍធនធាន មនុស្សផ្នែកជំនាញវិជ្ជាជីវៈទេសចរណ៍លើការងារបដិសណ្ឋារកិច្ច សេវាកម្មដឹកជញ្ជូន និងសេវា មគ្គុទ្ទេសក៍ទេសចរណ៍ ព្រមទាំងរៀបចំផែនការអភិវឌ្ឍទេសចណ៍ទៅតាមតំបន់គោលដៅ ទេសចរណ៍ក្នុងក្រុង និងតាមបណ្តាស្រុក ជំរុញការផ្សារភ្ជាប់រវាងវិស័យកសិកម្ម និងទេសចរណ៍ ពិសេសបន្តពង្រឹងការអនុវត្តគោលនយោបាយ “ភូមិ ឃុំ សង្កាត់ មានសុវត្ថិភាព បន្តសហការគ្នាឱ្យបានកាន់តែសកម្ម និងមានប្រសិទ្ធភាព ពង្រឹងការទប់ស្កាត់ និងចាត់វិធានការតាមផ្លូវច្បាប់ចំពោះការបំផ្លាញធនធាន ធម្មជាតិ និងទន្ទ្រានកាន់កាប់ដីព្រៃឈើក្នុងតំបន់ការពារធម្មជាតិ ព្រៃសហគមន៍ ដែនអភិរក្ស និងរបៀងជីវៈចម្រុះ ។
គួររំលឹកថា ដោយជាសមាជិកនៃទីក្រុងវៃឆ្លាតអាស៊ាន ក្រុងសៀមរាបបានអភិវឌ្ឍន៍ហេដ្ឋារចនាសម្ព័ន្ធដោយ ផ្ដោតសំខាន់ទៅលើ ៤វិស័យដូចជាទេសចរណ៍ឆ្លាតវៃ (Smart Tourism) ប្រព័ន្ធចល័តឆ្លាតវៃ (Smart Mobility) សន្តិសុខឆ្លាតវៃ (Smart Security) និងការគ្រប់គ្រងកាកសំណល់ឆ្លាតវៃ (Smart Waste Management) ដែលមានគម្រោងចំនួន៦ បានដាក់ឱ្យអនុវត្តសាកល្បងគឺ គម្រោង ត្រួតពិនិត្យការចតយានយន្តខុសច្បាប់ គម្រោងកែលម្អការប្រមូលសំរាម គម្រោងបំប្លែងឯកសារឬ ព័ត៌មានទេសចរណ៍ឱ្យទៅជាទិន្នន័យឌីជីថល គម្រោងប្រព័ន្ធតាមដានលំហូរឯកសារផ្ទៃក្នុង គម្រោង តាមដានបរិស្ថានទីក្រុងដោយប្រើប្រាស់ Sensor និងគម្រោងកិច្ចសហការរវាងរដ្ឋ និងឯកជនក្នុង វិស័យទេសចរណ៍ ៕
អត្ថបទ ៖ លោក លីវ សាន្ត
