នារសៀលថ្ងៃទី២៩ ខែមីនា ឆ្នាំ២០២៣នេះ ភ្ញៀវទេសចរណ៍បរទេស ចំនួន៦២នាក់ បាននាំគ្នាមកធ្វើការទស្សនា និងឈ្វេងយល់ពីវប្បធម៌ទំនៀមទំលាប់ ប្រពៃណី សាសនា នៅក្នុងបបរិវេនវត្តបារាយមហានទីរតនារាម ហៅវត្តស្វាយរមៀត ស្ថិតក្នុងសង្កាត់ទឹកវិល ក្រុងសៀមរាប។
លោក ខាន់ វ៉ាន់ឆាយ តំណាងបណ្តាញក្រុមភ្ញៀវទេសចរណ៍ប្រចាំខេត្តសៀមរាប បានឲ្យដឹងថា បន្ទាប់ពីជំងឺកូវីដ-១៩ ក្នុងប្តទេសកម្ពុជាមានភាពធូរស្រាល ជាពិសេសខេត្តសៀមរាប នេះជាលើកទី១ហើយ ដែលក្រុមការងាររបស់លោកបានដឹកនាំក្រុមភ្ញៀវបរទេសមកទស្សនា និងឈ្វេងយល់ពីវប្បធម៌ទំនៀមទំលាប់ ប្រពៃណី សាសនា នៅក្នុងវត្តស្វាយរមៀត ដើម្បីឲ្យពួកគាត់បានឃើញពីទិដ្ឋភាពក្នុងទីវត្តអារាមមានការរៀបចំទីធ្លា សួនច្បារ បរិស្ថានអនាម័យល្អ នឹងមានសណ្តាប់ភាពល្អ សាកសមជាកន្លែងទីសក្ការបូជា។
លោក ខាន់ វ៉ាន់ឆាយ បានឲ្យដឹងទៀតថា ក្រុមភ្ញៀវទាំងអស់ដែលបានមកឈ្វេងយល់នៅទីនេះ ពួកគាត់បានសម្តែងសេចក្តីរីករាយឥតឧបមា ពួកគាត់មិននឹកស្មានថា នៅក្នុងទីវត្តអារាមមួយនេះ មានភាពស្រស់ស្អាត ហើយពួកគាត់មានទឹកចិត្តជ្រះថ្លាហួសពីការរំពឹងទុករបស់ពួកគាត់។ ដោយឡែកនៅក្នុងបរិវេណនេះ ក៏មានតាំងនូវពាក្យស្លោកជាភាសាខ្មែរ និងភាសាអង្លេសជាច្រើន ដើម្បីជាការអប់រំ ផ្សព្វផ្សាយ ដល់ប្រជាពុទ្ធបរិស័ទដែលកាន់នូវពុទ្ធសាសនា ហើយក៏បង្ហាញដល់ភ្ញៀវជាតិ និងអន្តរជាតិ ដែលមកទស្សនា ក៏ដូចជាឈ្វេងយល់ពីពុទ្ធសាសនាផងដែរ។ ជាមួយនេះដែរ លោកក៏បានអំពាវនាវដល់ក្រុមហ៊ុនបម្រើសេវាកម្មភ្ញៀវឯកជននៅក្នុងខេត្តសៀមរាប អាចនាំភ្ញៀវមកទស្សនានឹងឈ្វេងយល់ពីវប្បធម៌និងសាសនានៅក្នុងវត្តស្វាយរមៀតបាន ពីព្រោះថានៅទីនេះ ព្រះសង្ឃបានរៀបចំបានល្អប្រសើរណាស់។
គួរបញ្ជាក់ថា នៅក្នុងបរិវេណវត្តស្វាយរមៀត ព្រះសង្ឃបានដាំដើមឈើ រៀបចំសួន ដាំផ្កាជាច្រើន ដោយដើមឈើខ្លះបានដុះនៅក្នុងវត្តស្រាប់យើងគ្រាន់តែអភិរក្ស និងបានដាំបន្ថែម ព្រមទាំងដើមឈើខ្លះទៀតក៏បានទិញពីតាមបណ្តាខេត្តផ្សេងៗទៀតផង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
