ក្រុមអ្នកពាក់ព័ន្ធមកពីខេត្តជាប់បឹងទន្លេសាប ចំនួនបី មានខេត្តកំពង់ធំ កំពង់ឆ្នាំង និងខេត្តពោធិសាត់ រួមនឹងមន្ត្រីអង្គការសង្គមស៊ីវិល បានចូលរួមសម្ពោធនូវគម្រោងថ្មីចំនួន២ ដែលគម្រោងទាំងនេះ ត្រូវបានបង្កើតឡើងដើម្បីលើកកម្ពស់ជីវភាពសហគមន៍និងរក្សានិរន្តភាពធនធានជលផលនៅក្នុងបឹងទន្លេសាប។
ប្រាប់អ្នកសារព័ត៌មានក្នុងសិក្ខាសាលាសម្ពោធគម្រោងថ្មីនេះ នាថ្ងៃទី២៥ ខែមេសា ឆ្នាំ២០២៣នៅសណ្ឋាគារអង្គរផារ៉ាឌី ខេត្តសៀមរាប លោក យុក សេងឡុង នាយកប្រតិបត្តិនៃអង្គការសម្ព័ន្ធភាព ដើម្បីអភិរក្សធនធានជលផល បាន លើកឡើងថា គម្រោងថ្មីទាំង០២ នេះ មានគម្រោងទី១ “លើកកម្ពស់សិទ្ធិសហគមន៍មូលដ្ឋានឆ្ពោះទៅរកនិរន្ដរភាពធនធានជលផលនៅបឹងទន្លេសាប” និង ទី២ ជាគម្រោង“អភិរក្សជីវៈចម្រុះ និងប្រែប្រួលអាកាសធាតុ នៅបឹងទន្លេសាប” ។ លោកបានបន្តថា គម្រោងទាំង២នេះពិតជាមានសារៈសំខាន់ណាស់នៅក្នុងការចូលរួមចំណែកគ្រប់គ្រង និងអភិរក្សនូវធនធានធម្មជាតិ/ធនធានជលផលនៅក្នុងបឹងទន្លេសាប ជាពិសេសគម្រោងនេះ នឹងចូលរួមធ្វើឲ្យប្រសើរឡើងនូវជីវភាពរស់នៅរបស់ប្រជានេសាទ នៅក្នុងតំបន់គោលដៅគម្រោង តាមរយៈការបង្កើតប្រភពមុខរបរចម្រុះ ដូចជាការកែឆ្នៃផលនេសាទ ការកែឆ្នៃកាបូប វត្ថុអនុស្សាវរីយ៍ដែលធ្វើពីកំប្លោក រួមទាំងអនុផលព្រៃលិចទឹក ជាពិសេសគឺការពង្រឹង សេវាកម្មទេសចរណ៍ និងអេកូទេសចរណ៍ ការសាងសង់ផ្សារបណ្តែតទឹកត្រីគល់រាំង ការសាងសង់ផ្ទះលំហែរ បឹងហ្គាឡូបណ្តែត និងការសាងសង់មជ្ឈមណ្ឌលជីវៈចម្រុះ វប្បធម៌ និងសង្គម។
លោក យុក សេងឡុង បញ្ជាក់ថា គម្រោងទាំង២នេះ បានផ្តោតលើ៣ចំណុចធំៗ នោះគឺទី១ផ្តោតលើការអភិរក្សត្រីមេពូជ នៅអតីតឡូតិ៍នេសាទលេខ២ ក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ដែលមានផ្ទៃដី៩២១ហិកតា ទី២ ការបង្កើនជីវភាពជូនប្រជាពលរដ្ឋក្នុងតំបន់គោលដៅគម្រោង តាមរយៈការបង្កើតប្រភពមុខរបរចម្រុះ ជាពិសេសសេវាកម្មអេកូទេសចរណ៍ និងទី៣ ការលើកកម្ពស់សុខមាលភាព និងបរិស្ថាននៅក្នុងសហគមន៍ ដូចជាការគ្រប់គ្រងសំណល់ប្លាស្ទីក ការកែច្នៃសំរាមជាដើម។
ព័ត៌មានជាតិ ថ្មីៗ
ប្រធាននាយកដ្ឋាន អភិរក្សតំបន់ដីសើមទឹកសាប នៃក្រសួងបរិស្ថាន លោក ហុង ចំណាន បានលើកឡើងថា គម្រោងទាំងនេះមានសកម្មភាព ស្របទៅតាមទស្សនៈវិស័យ ផែនការ“យុទ្ធសាស្រ្ត និងផែនការសកម្មភាពបរិស្ថានជាតិ ឆ្នាំ២០១៦-២០២៣” “ផែនការយុទ្ធសាស្រ្តជាតិសម្រាប់គ្រប់គ្រងតំបន់ការពារធម្មជាតិ ២០១៧-២០២៦” “យុទ្ធ សាស្រ្ត រេដបូកជាតិ ឆ្នាំ២០១៧-២០២៦” “គោលការណែនាំស្តីពីនិតិវិធី និងដំណើរការ នៃការរៀបចំ សហគមន៍តំបន់ការពារធម្មជាតិ” “គោលការណ៍ណែនាំស្តីពី ការកំណត់បែងចែកតំបន់គ្រប់គ្រងក្នុងតំបន់ការពារធម្មជាតិ” “គោលការណ៍ណែនាំបច្ចេកទេសសម្រាប់ ការរៀបចំផែនការគ្រប់គ្រងតំបន់ការ ពារធម្មជាតិ” “សារាចរណណែនាំលេខ០៥ ចុះថ្ងៃទី២២ ខែកញ្ញា ឆ្នាំ២០១៦ ស្តីពីវិធានការចាំបាច់នានា ក្នុងការពង្រឹងការគ្រប់គ្រងធនធានធម្មជាតិ នៃព្រះរាជាណាចក្រកម្ពុជា” ក៏ដូចជាផែនការយុទ្ធសាស្រ្ត និង កម្មវិធីពាក់ព័ន្ធនានា។
តំបន់ការពារធម្មជាតិក្នុងប្រទេសកម្ពុជាដែលមានក្រសួងបរិស្ថានជាសេនាធិការរបស់រាជរដ្ឋាភិបាលធ្វើសកម្មភាពលើការងារគ្រប់គ្រងតំបន់ការពារធម្មជាតិដែលបានបង្កើតឡើងចំនួន២៣កន្លែង នៅឆ្នាំ១៩៩៣ ៤១កន្លែងនៅឆ្នាំ២០១៦ និង៧៣កន្លែងនៅឆ្នាំ២០២៣ រួមទាំងតំបន់របៀងអភិរក្សជីវៈចម្រុះចំនួន៣កន្លែងដែលស្មើនឹង ៧,២លានហិកតា ស្មើនឹង៤១%នៃផ្ទៃដីទូទាំងប្រទេស ក្នុងនោះ៣០%គឺជាតំបន់ដីសើម នៅក្នុងតំបន់បឹងទន្លេសាប និងតាមដងទន្លេមេគង្គ ។
រាជរដ្ឋាភិបាលកម្ពុជា បានយកចិត្ដទុកដាក់យ៉ាងខ្លាំងលើការអភិរក្សធនធានធម្មជាតិ និងការប្រើប្រាស់ធនធានធម្មជាតិរបស់ប្រជាពលរដ្ឋប្រកបដោយនិរន្តរភាពដោយមានចែងនៅក្នុងយុទ្ធសាស្រ្ដចតុកោណ ក្នុងការឈានទៅសម្រេចគោលដៅនយោបាយអភិវឌ្ឍន៍សង្គម និងសេដ្ឋកិច្ចជាតិ។កន្លងមកនាយកដ្ឋានអភិរក្សតំបន់ដីសើមទឹកសាប នៃអគ្គនាយកដ្ឋានតំបន់ការពារធម្មជាតិ បានចូលរួមការពារធនធានធម្មជាតិយ៉ាងល្អប្រសើរដែលរួមមានការបង្កើតតំបន់រ៉ាមសារចំនួន ៥កន្លែង មានដូចជា តំបន់រ៉ាមសារបឹងទន្លេឆ្មារ តំបន់រ៉ាមសារកោះកាពិ តំបន់រ៉ាមសារស្ទឹងត្រែង តំបន់រ៉ាមសារព្រែកទាល់ និងតំបន់រ៉ាមសារស្ទឹងសែន ដែលស្ថិតនៅក្នុងឃុំផាត់សណ្ដាយ។ ជាមួយគ្នានោះដែរ តំបន់រ៉ាមសារនីមួយៗ មានធនធានធម្មជាតិ និងជីវៈចម្រុះដែលមានសក្តានុពលសម្រាប់ប្រជាពលរដ្ឋ និងវិស័យទេសចរណ៍ នៅក្នុងតំបន់ សហគមន៍ និងមានតម្លៃរួមលើកិច្ចការពារ និងអភិរក្សបរិស្ថានជុំវិញ៕
អត្ថបទ និងរូបភាព៖ លោក ជា ស្រស់
