ថ្លែងក្នុងពិធីបិទសិក្ខាសាលាបណ្តុះបណ្តាលស្តីពីការពង្រឹងសមត្ថភាពអនុវត្តការងារដល់មន្ត្រីថ្នាក់ក្រោមជាតិ ជំហ៊ានទី២ នារសៀលថ្ងៃទី២៧ ខែមេសា ឆ្នាំ២០២៣នេះ ឯកឧត្តម ខាយ ឃុនហេង រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានលើកទឹកចិត្តដល់សិក្ខាកាមទាំងអស់ ត្រូេះបន្តពង្រឹង និងពង្រីកចំណេះដឹងបន្ថែមទៀត សម្រាប់ចូលរួមចំណែកបំពេញតួនាទីភារកិច្ចប្រកបដោយក្រមសីលធម៌វីជ្ជាជីវៈ ក្នុងការអនុវត្តការងារប្រចាំថ្ងៃនៅតាមអង្គភាពរៀងៗខ្លួនឱ្យទទួលបានលទ្ធផលល្អប្រសើរបន្ថែម។
ឯកឧត្តម ខាយ ឃុនហេង មានប្រសាសន៍ថា សិក្ខាសាលារយៈពេល ៣ថ្ងៃនេះ ពិតជាធ្វើអោយយើងទាំងអស់គ្នាកាន់តែយល់ច្បាស់ថា គ្មានភាពជោគជ័យណាមួយអាចកើតឡើងបានទេ បើគ្មានការពង្រឹងសមត្ថភាពចំណេះដឹង ក្នុងការផ្សាភ្ជាប់ទ្រឹស្តីទៅនឹងការអនុវត្តដូចដែលយើងបានឆ្លងកាត់កន្លងមកនេះ។ មួយកម្រិតទៀតស្របតាមការប្តេជ្ញារបស់ថ្នាក់ដឹកនាំក្រសួង ក្រោមគំនិតផ្ដួចផ្ដើមរបស់ ឯកឧត្តមរដ្ឋមន្ត្រី គឺចង់អភិវឌ្ឍធនធានមនុស្ស មានចំណេះដឹង បំណិនជំនាញវិជ្ជាជីវៈ និងគុណវុឌ្ឍគ្រប់គ្រាន់ដើម្បីចូលរួមចំណែកអភិវឌ្ឍវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន និងឌីជីថល ប្រកបដោយប្រសិទ្ធភាពខ្ពស់។ ឯកឧត្តម រដ្ឋលេខាធិការ ក៏បានបង្ហាញនូវភាពជឿជាក់ថា លទ្ធផលដែលទទួលបានក្នុងអង្គសិក្ខាសាលានាប៉ុន្មានថ្ងៃនេះ ពិតជាមិនទាន់បានល្អគ្រប់ជ្រុងជ្រោយទេ ព្រោះការលើកឡើងនូវដំណោះស្រាយខ្លះមិនទាន់ឆ្លើយតបតាមការចង់បានរបស់សិក្ខាកាម ដោយសារលិខិតបទដ្ឋានគតិយុត្តិខ្លះនៅមានភាពមិនច្បាស់លាស់ ដែលទាមទារអោយមានការធ្វើវិសោធនកម្ម និង កសាងបន្ថែម ឬកែលម្អតាមការចាំបាច់។
លោកស្រី កេត គឹមសុទ្ធ តំណាងសិក្ខាកាមមន្ទីរប្រៃសណីយ៍និងទូរគមនាគមន៍ខេត្តក្រចេះ បានឲ្យដឹងថា បន្ទាប់ពីបានចូលរួមក្នុងសិក្ខាសាលាអស់រយៈពេល៣ថ្ងៃកន្លងមកនេះ សិក្ខាកាមទទួលបានចំណេះដឹងនិងបទពិសោធន៍ថ្មីៗ ពីគ្រូឧទ្ទេស វាគ្មិនជាច្រើនក្នុងការលើកកម្ពស់សមត្ថភាពបំពេញការងាររបស់យើងខ្ញុំទាំងអស់គ្នាឱ្យកាន់តែមានប្រសិទ្ធភាពខ្ពស់ ដើម្បីអនុវត្តតួនាទីនិងភារកិច្ចរបស់ខ្លួនអោយបានកាន់តែល្អប្រសើរ។ វគ្គសិក្ខាសាលានេះមិនត្រឹមតែទទួលបានចំណេះដឹងនិងបទពិសោធន៍ថ្មីៗបន្ថែមទៀតប៉ុណ្ណោះទេ គឺបានធ្វើអោយមានទំនាក់ទំនងកាន់តែជិតស្និទ្ធរវាងមន្ត្រីខេត្តមួយទៅខេត្តមួយទៀត និងចែករំលែកបទពិសោធន៍ពីគ្នាទៅវិញទៅមកផងដែរ។ ជាមួយគ្នានោះលោកស្រី បានស្នើសុំដល់ក្រសួងមានវគ្គបណ្តុះបណ្តាលពង្រឹងសមត្ថភាពអនុវត្តការងារមន្ទីរប្រៃសណីយ៍ និងទូរគមនាគមន៍ជារៀងរាល់ឆ្នាំ និងវគ្គបណ្តុះបណ្តាលថ្មីៗផ្សេងទៀតឱ្យស្របតាមការវិវឌ្ឍន៍ និងការរីកចម្រើននៃបច្ចេកវិទ្យានាពេលបច្ចុប្បន្ន។ ស្នើសុំក្រសួងមានការរៀបចំទស្សនកិច្ចសិក្សាសម្រាប់មន្ត្រីតាមមន្ទីរ ឱ្យមកទស្សនកិច្ចសិក្សានៅ បណ្ឌិត្យសភា បច្ចេកវិទ្យាឌីជីថលកម្ពុជា ហើយនឹងបានទស្សនកិច្ចនៅក្រសួងផ្ទាល់។
សូមជម្រាបថា សិក្ខាសាលាស្តីពីការពង្រឹងសមត្ថភាពអនុវត្តការងារមន្ទីរប្រៃសណីយ៍ និងទូរគមនាគមន៍ជំហានទី២ ដែលរៀបចំឡើងនៅខេត្តសៀមរាប មានរយៈពេល៣ថ្ងៃ ពីថ្ងៃទី២៥-២៧ ខែមេសា ឆ្នាំ២០២៣ ដោយមានការចូលរួមពីលោក លោកស្រីប្រធាន អនុប្រធានមន្ទីរ មន្ត្រីរាជការនៃ មន្ទីរប្រៃសណីយ៍ និង ទូរគមនាគមន៍ មកពីបណ្តាខេត្តចំនួន១៤ សរុបជាង ១០០នាក់៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
