នៅថ្ងៃទី២៨ ខែមេសា ឆ្នាំ២០២៣នេះ ក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ បានរៀបចំបើកវេទិកាសាធារណៈ ដើម្បីធ្វើការទទួលសំណើរ សំណូមពរ និងដោះស្រាយបញ្ហាជូនប្រជាពលរដ្ឋក្នុងមូលដ្ឋាន ដែលវេទិកានេះធ្វើឡើងនៅក្នុងបរិវេណវត្ដខ្នាចត្រាច ក្នុងឃុំពាក់ស្នែង ស្រុកអង្គរធំ ខេត្ដសៀមរាប។ ជាក់ស្ដែងវេទិកានាពេលនេះដែរ គឺប្រជាពលរដ្ឋ បានស្នើឱ្យអាជ្ញាធរជួយស្ថាបនាផ្លូវ សាងសង់កុដ្ឋព្រះសង្ឃស្នាក់នៅ រនាំងដាក់ធ្វើចរាចរណ៍ការពារតាមផ្លូវ បញ្ហាសណ្តាប់ធ្នាប់ ការជួយដោះស្រាយដល់ជីវភាពអតីតយុវជន និងបញ្ហាភូមិឃុំមានសុវត្ថិភាពក៍ដូចជាសេវាសាធារណៈជាដើម។
មានប្រសាសន៍នាឱកាសនោះ ឯកឧត្ដម ស ថាវី អនុប្រធានក្រុមការងារចុះមូលដ្ឋានស្រុកអង្គធំ បានបញ្ជាក់ថា វេទិកានាពេលនេះធ្វើឡើង ដើម្បីប្រមូលយកនូវរាល់បញ្ហា សំណួរ សំណូមពរពីបងប្អូនប្រជាពលរដ្ឋក្នុងមូលដ្ឋានស្រុកអង្គរធំ យកមកដោះស្រាយជូនពលរដ្ឋ។ ជាក់ស្ដែងចំពោះសំណួរ សំណូមពររបស់ប្រជាពលរដ្ឋនាថ្ងៃនេះដែរ គឺក្រុមការងារបានទទួលយក និងធ្វើការដោះស្រាយជូនប្រជាពលរដ្ឋជាបន្តបន្ទាប់នៅពេលខាងមុខ។
ជាមួយគ្នានោះដែរ ឯកឧត្ដម ក៏បានក្រើនរំលឹកដល់អាជ្ញាធរមូលដ្ឋាន រួមនឹងក្រុមការងារទាំងអស់ ត្រូវបន្តបំរើសេវាសាធារណៈដែលជាតម្រូវការចាំបាច់ជូនប្រជាពលរដ្ឋឱ្យកាន់តែល្អប្រសើរថែមទៀត ដោយត្រូវអនុវត្តការងារទៅតាមតួនាទីភារកិច្ចរបស់ខ្លួន ជៀសវាងនូវបាតុភាពស៊ីសំណូកសូកប៉ាន់ លើការផ្តល់សេវាសាធារណៈផ្សេងៗ។ ក្នុងនោះត្រូវចងចាំថា ការបំពេញតួនាទីភារៈកិច្ចក្នុងការងារ បើមានចំណុចល្អ គឺមិនសូវទទួលបានការកោតសរសើរនោះទេ តែបើភ្លាត់ឱ្យមានលេចចេញចំណុចមិនល្អនោះអ្វីៗដែលខំធ្វើកន្លងមក វានឹងក្លាយទៅជាអសារឥតការ។ ដោយឡេកគោលនយោបាយភូមិឃុំមានសុវត្ថិភាព ក៏ជាគោលដៅដ៏សំខាន់របស់រាជរដ្ឋាភិបាលកម្ពុជា ដោយតម្រូលឲ្យអាជ្ញាធរមូលដ្ឋាន សមត្ថកិច្ចពាក់ព័ន្ធ ត្រូវមានការយកចិត្តទុកដាក់ឲ្យបានខ្ពស់ ធ្វើយ៉ាងណាឲ្យក្នុងមូលដ្ឋានទាំងមូល ជាពិសេសប្រជាពលរដ្ឋទទួលបានសុខសុវត្ថិភាពក្នុងការរស់នៅ និងគ្មានរាល់ភាពអសន្តិសុខទាំងអស់ក្នុងមូលដ្ឋានយើង៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
