នៅថ្ងៃទី២៧ ខែមេសា ឆ្នាំ២០២៣ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានបើកកិច្ចប្រជុំត្រួតពិនិត្យការងារប្រចាំខែមេសា ឆ្នាំ២០២៣ និងពិភាក្សាលើបញ្ហាប្រឈម ដឹកនាំរបស់លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត ព្រមទាំងមានតំណាងមន្ទីរអង្គភាព រដ្ឋបាលក្រុងស្រុក និងអង្គការដៃគូជាតិ-អន្តរជាតិជាច្រើនរូប។
កិច្ចប្រជុំនាពេលនោះដែរ ក្រុមការងារបានធ្វើការពិនិត្យ និងពិភាក្សាលើបញ្ហាប្រឈមពាក់ព័ន្ធនឹងការងារប្រយុទ្ធប្រឆាំងអំពើជួញដូរមនុស្ស ដោយបានផ្តោតសំខាន់ទៅលើការងារទប់ស្កាត់ការប្រើប្រាស់កម្លាំងពលកម្ម ករណីគ្រួសារទារកអាយុ១ខែ ដែលម្តាយពុំមានលទ្ធភាពចិញ្ចឹម និង មានបំណងប្រគល់ទៅឲ្យគ្រួសារផ្សេងដើម្បីចិញ្ចឹមជំនួស។
មានប្រសាសន៍ក្នុងឱកាសនោះ លោកស្រី យូ សុភា បានជម្រុញដល់បណ្ដាមន្ទីរអង្គភាពពាក់ព័ន្ធ និងអង្គការដៃគូទាំងអស់ត្រូវពិនិត្យឡើងវិញ និងសហការគ្នាក្នុងការប្រមូលពត៌មាន និងផ្តល់ប្រឹក្សាយោបល់ទៅដល់កុមារីដែលសង្ស័យរងគ្រោះដោយការរំលោភបំពានតាមប្រព័ន្ធអនឡាញ និងដាក់ពាក្យបណ្តឹងមកសមត្ថកិច្ច ដើម្បីអនុវត្តតាមនីតិវិធី។ ជម្រុញដល់អាជ្ញាធរក្រុងស្រុក និងអ្នកពាក់ព័ន្ធត្រូវពិនិត្យ និងផ្សព្វផ្សាយឲ្យបានទូរលំទូរលាយ អំពីកលល្បិចរបស់ជនខិលខូចដែលបានចុះជ្រើសរើសប្រជាពលរដ្ឋ ដើម្បីរៀនភាសារជប៉ុនសម្រាប់នាំចេញទៅធ្វើការនៅប្រទេសជនដោយខុសច្បាប់។
ព័ត៌មានជាតិ ថ្មីៗ
លោកស្រី ក៏បានជម្រុញបន្ថែមដល់រដ្ឋបាលស្រុកស្រីស្នំ និងអង្គការហាការ ដើម្បីសហការរួមគ្នាក្នុងអនុវត្តគម្រោងស្តារជីវៈភាពជូនដល់ពលករដែលរងគ្រោះ និងងាយគ្រោះដោយអំពើជួញដូរមនុស្ស ដោយត្រូវធ្វើការផ្សព្វផ្សាយ និងចុះជួបផ្ទាល់ជាមួយបងប្អូនពលករដែលបានវិលត្រឡប់មកពីក្រៅប្រទេសវិញ និងធ្វើការប៉ាន់ប្រមាណឲ្យបានសមស្រប ព្រមទាំងបានជម្រុញឲ្យមានការរួមពីដៃគូពាក់ព័ន្ធ ក្នុងការរួមបណ្តុះបណ្តាលពង្រឹងសមត្ថភាពដល់មន្រ្តីនគរបាល អាជ្ញាធរមូលដ្ឋាន លើការអនុវត្តច្បាប់ស្តីពី ការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទ ច្បាប់ស្តីពី យុត្តិធម៌អនីតិជន កិច្ចការពារកុមារ ការកំណត់អត្តសញ្ញាណជនរងគ្រោះ និងការផ្តល់សេវាសមស្រប។
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
