អគារសាលាធម្មសភា រួមនឹងផ្លូវថ្នល់ សមិទ្ឋផលនានាជាច្រើនទៀត ឋិតក្នុងវត្តសុវណ្ណព្រឹក្សា ហៅវត្តគគីរ ភូមិស្រិតខាងកើត ឃុំកន្ទ្រាំង ស្រុកប្រាសាទបាគង ខេត្តសៀមរាប ត្រូវបានកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២៨ ខែមេសា ឆ្នាំ២០២៣នេះ ក្រោមអធិបតីភាព ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និង លោកស្រី យូ សុភា អភិបាលរងខេត្ត រួមជាមួយវត្តមានលោកអភិបាលស្រុក អាជ្ញាធរមូលដ្ឋាន ព្រះសង្ឃ ដូនជីតាជី លោកគ្រូអ្នគ្រូ សិស្សានុសិស្ស និងប្រជាពលរដ្ឋជាច្រើនអង្គ/នាក់។
បើតាមគណៈកម្មការបានឲ្យដឹងថា សមិទ្ឋផលថ្មីៗក្នុងវត្តគគីរ ដែលសម្ពោធដាក់ឲ្យប្រើប្រាស់នាពេលនេះមានដូចជា៖ សាលាធម្មសភាមួយខ្នង មានទំហំ ១៦គុណនឹង ៣៧ម៉ែត្រ ផ្លូវថ្នល់មុខវត្តប្រវែង ១.២០០ម៉ែត្រ ទទឹង៨ម៉ែត្រ និងសមិទ្ឋិផលនានាមួយចំនួនទៀតចំណាយក្នុងការកសាងអស់ថវិកាសរុបជាង ៤១ម៉ឺនដុល្លា និងនៅខ្វះថ្លៃជាងនិងសម្ភារៈសំណង់ ៦ម៉ឺន ៨ពាន់ដុល្លារទៀត។
លោកស្រី យូ សុភា អភិបាលរងខេត្ត មានប្រសាសន៍ថា សង្គមខ្មែរយើងបានចាត់ទុកព្រះពុទ្ឋសាសនា ជាវិស័យដ៏មានសារៈសំខាន់ ជាដៃគូអភិវឌ្ឍមិនអាចខ្វះបាន ហើយពុទ្ឋចក្រដែលថ្នាក់ដឹកនាំគ្រប់ជាន់ថ្នាក់តែងបានយកចិត្តទុកដាក់ក្នុងការកសាងហេដ្ឋារចនាសម្ព័ន្ឋនានាក្នុងវិស័យនេះ ដើម្បីបំរើសេចក្តីត្រូវការរបស់ប្រជាពុទ្ឋបរិស័ទ មកបំពេញបុណ្យកុសលតាមសេចក្តីជ្រះថ្លា ជាមួយគ្នានេះវត្តអារាមបានផ្តល់គុណសម្បត្តិដល់ពុទ្ឋបរិស័ទដែលមានព្រះសង្ឃជាតួអង្គសំខាន់ និងបានជួយអភិវឌ្ឍសង្គមកម្ពុជាតាំងពីសម័យមុនរហូតមកដល់បច្ចុប្បន្ន។
មានប្រសាសន៍ក្នុងឱកាសនោះដែរ ឯកឧត្តម អ្នកឧកញ៉ា សៀង ណាំ បានថ្លែងការកោតសរសើរ ចំពោះព្រះចៅអធិការ ព្រះសង្ឃ គណៈកម្មការ អាចារ្យវត្តគគីរ អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋានដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការកសាងសាលាធម្មសភា និងសមិទ្ឋផលមួយចំនួនទៀត បានសម្រេចរួចរាល់ជាស្ថាពរ។
ឯកឧត្តម មានប្រសាសន៍ទៀតថា ប្រទេសកម្ពុជាបានជួបនូវវិបត្តិសង្គ្រាមស៊ីវិលរ៉ាំរ៉ៃអស់ជាច្រើនទសវត្ស ជាពិសេសក្នុងអំឡុង ៣ឆ្នាំ ៨ខែ និង២០ថ្ងៃ ក្នុងរបបប៉ុល ពត កម្ពុជាទាំងមូលរងនូវទុក្ខសោកនាដកម្មយ៉ាងធំធេងដែលមិនត្រឹមតែប្រជាជនសាមញ្ញដែលត្រូវរបបនោះកាប់សម្លាប់ទេ សូម្បីព្រះសង្ឃ និងហេដ្ឋារចនាសម្ពន្ឋ័សង្គមជាតិក៍ត្រូវទទួលរងនូវការបំផ្លិចបំផ្លាញស្ទើរតែសូន្យ ព្រះសង្ឃ វត្តអារាមនិងសាសនាផ្សេងៗទៀត ក៍ត្រូវទទួលរងនូវការកាប់សម្លាប់ និងបំផ្លិចបំផ្លាញស្ទើរគ្មានសល់។ ប៉ុន្តែដោយសារគុណថ្ងៃរំដោះ ៧មករា ឆ្នាំ១៩៧៩ យើងបានរស់រានមានជីវិតឡើងវិញ ដោយសារតែមានប្រមុខដឹកនាំប្រទេស គឺសម្ដេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យប្រទេសជាតិមានសុខសន្តិភាពពេញលេញ និងការអភិវឌ្ឍប្រទេសឡើងវិញជាបន្តបន្ទាប់។ ជាមួយនោះឯកឧត្តម ក៏បានអំពាវនាវដល់លោកតា លោកយាយ បងប្អូនប្រជាពលរដ្ឋដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ។
សូមជម្រាបថា ក្នុងឱកាសនោះដែរ ឯកឧត្តម អ្នកឧកញ៉ា សៀង ណាំ បានប្រគេនព្រះចៅអធិការវត្តនូវថវិកាចំនួនប្រគេនបច្ច័យចំនួន ១០លានរៀល និងចែកជូនតាជីយាយជី២០០នាក់ សិស្សានុសិស្ស១០០នាក់ លោកគ្រូអ្នកគ្រូ១៥នាក់ ប្រជាពលរដ្ឋ១.០០០នាក់ សរុបអស់ថវិកា ១៧លានរៀលផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ អ៊ុន ណារាជ្យ
