នៅថ្ងៃទី០៤ ខែឧសភា ឆ្នាំ២០២៣នេះ សាលាអនុគណក្រុងសៀមរាប សហការជាមួយរដ្ឋបាលខេត្តសៀមរាប បានរៀបចំដង្ហែក្បួនបុណ្យវិសាខបូជាតាមដងផ្លូវសំខាន់ៗមួយចំនួនក្នុងក្រុងសៀមរាប និងពេលរសៀលបានរៀបចំពិធីប្រកាសវិសាខបូជាព.ស ២៥៦៧ ក្នុងបរិវេណវត្តទេពពោធិវង្ស ហៅវត្តថ្មី ក្រុងសៀមរាប ក្រោមការចូលរួមពីលោកស្រីយូ សុភា អភិបាលរងខេត្ត មន្ត្រីសង្ឃខេត្ត-ក្រុង ព្រះចៅអធិការតាមបណ្តាវត្តវ៉ាអារាមក្នុងក្រុង ប្រធានអនុប្រធានមន្ទីរអង្គភាពមួយចំនួន ព្រះសង្ឃ និងប្រជាពលរដ្ឋជាច្រើនអង្គ/នាក់។
ក្នុងឱកាសនោះ លោកស្រី យូ សុភា បានថ្លែងកោតសរសើរប្រគេនចំពោះព្រះតេជព្រះគុណគ្រប់ព្រះអង្គ និងការចូលរួមពីសប្បុរសជនជិតឆ្ងាយ រួមគ្នារៀបចំកម្មវិធីបុណ្យវិសាខបូជានេះឡើង ដើម្បីរំលឹកដល់សម័យទាំងបីរបស់ព្រះសម្មាសម្ពុទ្ធជាម្ចាស់ គឺថ្ងៃទ្រង់ប្រសូត ថ្ងៃត្រាស់ដឹង និងថ្ងៃទ្រង់យាងចូលបរិនិព្វាន និងសម្តែងនូវកតញ្ញូកតវេទិតា ថ្វាយចំពោះព្រះសម្មាសម្ពុទ្ឋបរមគ្រូនៃយើង។ លោកស្រីអភិបាលរងខេត្ត មានប្រសាសន៍ទៀតថា ឆ្នាំនេះយើងបានរៀបចំប្រារព្ធពិធីបុណ្យវិសាខបូជាជាថ្មីម្ដងទៀត ហើយបានប្រព្រឹត្តិទៅយ៉ាងអធិកអធម នៅតាមវត្តអារាមទូទាំងប្រទេស ដោយរាជរដ្ឋាភិបាលបានផ្តល់តួនាទីយ៉ាងសំខាន់ដល់ព្រះពុទ្ធសាសនាក្នុងសង្គមខ្មែរតាំងពីអតីតកាលរហូតមកដល់បច្ចុប្បន្ន និងទៅអនាគតហើយបានចាត់ទុកព្រះពុទ្ធសាសនា ជាសាសនារបស់រដ្ឋ។
ព្រះតេជគុណ តាត មហាទី ព្រះធម្មធរអនុគណក្រុងសៀមរាប និងជាព្រះគ្រូចៅអធិការវត្តព្រឥន្ទកោសា មានសង្ឃដីកាបញ្ជាក់ថា ពិធីបុណ្យវិសាខបូជា គឺការរម្លឹកដល់ព្រឹត្តិការណ៍ដ៏ពិសេសចំនួន៣ ទាក់ទងនឹងព្រះសមា្មសម្ពុទ្ធ រួមមាន ការប្រសូត ការត្រាស់ដឹង និងការចូលបរិនិព្វាន។ ព្រះសមា្មសម្ពុទ្ធ ព្រះអង្គទ្រង់ប្រសូត នៅថ្ងៃសុក្រ ពេញបូណ៌មី ខែវិសាខ មុនគ្រិស្តសករាជចំនួន ៦២៣ឆ្នាំ។ នៅពេលមានព្រះជន្ម ២៩ព្រះវស្សា ព្រះសិទ្ធត្ថ បានយាងទៅសាងផ្នួស។ ក្រោយពីក្លាយខ្លួនជាអ្នកបួសអស់រយៈពេល ៦ឆ្នាំ ព្រះអង្គក៏បានត្រាស់ដឹងកា្លយជាព្រះពុទ្ធ នៅថ្ងៃពុធ ពេញបូណ៌មី ខែវិសាខនាវេលាទៀបភ្លឺ។ ព្រះបរមគ្រូនៃយើងទ្រង់ចូលបរិនិព្វាន នៅថ្ងៃអង្គារ ពេញបូណ៌មី ខែវិសាខ នៅពេលដែលព្រះអង្គមានព្រះជន្ម ៨០ព្រះវស្សា រហូតមកដល់ពេលនេះ ព្រះសក្យមុនីបានរលត់សង្ខារអស់រយៈពេល ២៥៦៧ឆ្នាំហើយ។ សម្រាប់ការប្រារព្ធពិធីក្នុងសាសនាព្រះពុទ្ធនាពេលនេះដែរ គឺជាតួនាទីពុទ្ធបរិសទ្ធគ្រប់រូប ដើម្បីថែរក្សាការពារ និងផ្សព្វផ្សាយនូវគុណតម្លៃរបស់ព្រះពុទ្ធសាសនា និងដើម្បីបញ្ជាក់ពីកតញ្ញូ ចំពោះព្រះពុទ្ធជាម្ចាស់ ដែលជាវិថីឆ្ពោះទៅរកសេចក្តីសុខ សុភមង្គល និងសន្តិភាពសម្រាប់ជីវិតសត្វលោកគ្រប់ស្រទាប់វណ្ណៈដែលមិនអាចកាត់ថ្លៃបាន។
សូមជម្រាបថា សម្រាប់ការដង្ហែពិធីបុណ្យវិសាខបូជានៅថ្ងៃនេះដែរ គឺមានការដង្ហែក្បួនចេញពីបរិវេណវត្តទេពពោធិវង្ស ហៅវត្តថ្មី ទៅតាមផ្លូវសម្ដេចវិបុលបញ្ញា សុខ អាន រួចបន្តទៅកាន់ផ្លូវជាតិលេខ៦ បត់ចូលតាមវត្តរាជបូព៌ បន្តទៅផ្សារចាស់ រួចទៅតាមផ្លូវស៊ីវុត្ថា រហូតដល់វត្តទេពពោធិវង្ស វិញ។ ជាមួយគ្នានោះ ក្នុងពិធីដង្ហែនេះដែរ ក៏មានវត្តមានចូលរួមពីសំណាក់ថ្នាក់ដឹកនាំខេត្ត មន្ត្រីសង្ឃក្នុងខេត្ត ប្រធានអនុប្រធានមន្ទីរអង្គភាពក្នុងខេត្ត ព្រះសង្ឃ និងប្រជាពលរដ្ឋជាច្រើនអង្គ/នាក់ផងដែរ៕
អត្ថបទ និងរូបភាព៖ សហការី
កែសម្រួល៖ អ៊ុន ណារាជ្យ
