នៅរសៀលថ្ងៃទី១៥ ខែឧសភា ឆ្នាំ២០២៣នេះ ឯកឧត្ដម ស ថាវី អនុប្រធានក្រុមការងារចុះមូលដ្ឋានស្រុកអង្គរធំ ខេត្តសៀមរាប បានដឹកនាំក្រុមការងារចុះសួរសុខទុក្ខបងប្អូនប្រជាពលរដ្ឋដែលកំពុងសម្រាកព្យាបាលជំងឺនៅមណ្ឌលសុខភាពពាក់ស្នែង និងបាននាំយកអំណោយមួយចំនួនជូនមណ្ឌលសុខភាព និងអ្នកជំងឺ ដើម្បីជួយសម្រួលដល់ការប្រើប្រាស់ប្រចាំថ្ងៃផងដែរ។
មានប្រសាសន៍ក្នុងឱកាសនោះ ឯកឧត្ដម ស ថាវី បាននាំយកនូវការសួរសុខទុក្ខពីសំណាក់សម្ដេចពិជ័យសេនា ទៀ បាញ់ ប្រធានក្រុមការងារចុះមូលដ្ឋានខេត្ដសៀមរាប ជូនចំពោះប្រជាពលរដ្ឋដែលកំពុងសម្រាកព្យាបាលនៅនៅមណ្ឌលសុខភាពពាក់ស្នែងទាំងអស់។ ឯកឧត្ដមបន្ដថា បញ្ហាសុខភាពមានសារៈសំខាន់ខ្លាំងណាស់ក្នុងការរស់នៅប្រចាំថ្ងៃ ដែលត្រូវបានគិតគូរពីរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និងឈ្លាសវៃបំផុតរបស់សម្ដេចតេជោ ហ៊ុន សែន នាយករដ្ឋមន្ត្រី ដែលបានធ្វើឲ្យប្រទេសជាតិយើងទទួលបាននូវសុខសន្តិភាពពេញលេញ មានស្ថេរភាពនយោបាយ និងមានការអភិវឌ្ឍន៍រីកចម្រើនលើគ្រប់វិស័យ។ ក្នុងនោះរាជរដ្ឋាភិបាល បានចូលរួមលើកកម្ពស់ និងគាំទ្រដល់អ្នកក្រីក្រ មកទទួលសេវាប្រកបដោយសមធម៌ ស្របតាមគោលនយោបាយរបស់រាជរដ្ឋាភិបាលកម្ពុជា។
ឯកឧត្ដម បានបង្ហាញថា ជាង៤០ឆ្នាំកន្លងទៅនេះ រាជរដ្ឋាភិបាលបានសម្រេចការងារជាច្រើន ប៉ុន្តែយ៉ាងណាក៏ដោយក៏នៅមានកិច្ចការជាច្រើនទៀតដែលរាជរដ្ឋាភិបាលត្រូវធ្វើការអភិវឌ្ឍ សម្រាប់ការរីកចម្រើនដល់បងប្អូនប្រជាពលរដ្ឋ។ ហើយបញ្ហាសុខភាព ក៏ធ្វើឲ្យមានផលប៉ះពាល់ដល់សេដ្ឋកិច្ចគ្រួសារ និងបាត់បង់នូវពេលវេលាកិច្ចការប្រកបការងារ និងបាត់នូវប្រាក់ចំណូលក្នុងគ្រួសារទៀតផង។ ដើម្បីរក្សាបាននូវសុខភាពល្អ យើងគ្រប់រូបក៏ត្រូវគោរពឲ្យបានក្នុងការថែរក្សាអនាម័យ បរិស្ថាន ការបរិភោគ គឺផឹកស្អាត ហូបស្អាត មានអនាម័យល្អ ក្នុងការកាត់បន្ថយការចំណាយថវិកាក្នុងក្រុមគ្រួសារទៀតផង។ ឯកឧត្ដម ក៏បានណែនាំដល់បងប្អូនដែលកំពុងសម្រាកព្យាបាលជំងឺ ត្រូវគោរពឲ្យបាននូវវេជ្ជបញ្ជារបស់គ្រូពេទ្យឲ្យបានទៀងទាត់ពេលវេលា ដើម្បីឲ្យបងប្អូនបាន ឆាប់ជាផ្សះស្បើយពីជំងឺ នឹងបានវិលត្រលប់ទៅកាន់លំនៅដ្ឋាន ប្រកបមុខរបរចិញ្ចឹមជីវិតក្នុងក្រុមគ្រួសារខ្លួន។ ម្យ៉ាងទៀតសូមបងប្អូន នៅពេលប្រើប្រាស់ឱសថព្យាបាល ក៏ត្រូវមានវេជ្ជបញ្ជាពីគ្រូពេទ្យ ពីព្រោះថា ឱសថគឺជាអាវុធមុខពីរ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
