ផ្លូវបេតុងថ្មីមួយខ្សែមានប្រវែងជិត២០គីឡូម៉ែត្រ ចេញពីទីរួមស្រុកអង្គរធំ និងផ្លូវមួយខ្សែទៀតប្រវែងជិត២គីឡូម៉ែត្រ ចូលតំបន់អភិវឌ្ឍន៍ពាក់ស្នែងថ្មី នៃឃុំពាក់ស្នែង បានស្ថាបនាដោយកងវិស្វកម្មសម្ដេចតេជោនាយករដ្ឋមន្ដ្រី មកដល់ពេលនេះបានកសាងជិតរួចរាល់ហើយ។
ប្រជាពលរដ្ឋ រស់នៅឃុំពាក់ស្នែង ស្រុកអង្គរធំ ខេត្ដសៀមរាប បានឱ្យដឹងថា ការស្ថាបនាផ្លូវបេតុងនេះ ក្រោយពេលសម្ដេចតេជោបានប្រកាសអភិវឌ្ឍន៍តំបន់ពាក់ស្នែងថ្មីឱ្យទៅជាទីប្រជុំជនដ៍ធំ សម្រាប់ប្រជាពលរដ្ឋស្ម័គ្រចិត្ដចាកចេញពីតំបន់អង្គរទៅរស់នៅទីនោះ ក៍ដូចជាប្រជាពលរដ្ឋរស់នៅទីនោះផ្ទាល់ដែរផង។
ពួកគាត់ បន្ដថា ផ្លូវនេះជាផ្លូវបេតុងថ្មីហើយធំទូលាយ នឹងជួយសម្រួលការធ្វើដំណើររបស់ប្រជាពលរដ្ឋ ជាពិសេសបានជួយលើកស្ទួយកម្ពស់ជីវភាពរបស់ពលរដ្ឋនៅតំបន់នេះផងដែរ ព្រោះថាផ្លូវនោះ កន្លងមករងការខូចខាត ពិបាកធ្វើចរាចរណ៍ ដោយសាររថយន្ដដឹកធ្ងន់ បណ្ដាលឱ្យខូចខាតផ្លូវ។
ពួកគាត់បានសម្ដែងសប្បាយរីករាយ និងសប្បាចិត្ដព្រោះការធ្វើចរាចរណ៍បានទាន់ពេលវេលា ព្រមទាំងចំណេញទាំងថវិកាធ្វើដំណើរផងដែរ ។ពួកបានថ្លែងអំណរគុណដល់សម្ដេចតេជោ ដែលបានអភិវឌ្ឍន៍តំបន់នោះ ឱ្យក្លាយជាទីកន្លែងរស់នៅដ៍ល្អរបស់ប្រជាពលរដ្ឋ។ ពួកគាត់បានបន្ដថា ផ្លូវបេតុងមួយខ្សែនេះ មានសារសំខាន់ក្នុងការដឹកជញ្ជូនដំណាំកសិកម្មរបស់អ្នកភូមិ ដោយចេញពីចំណុចទីរួមស្រុកអង្គរធំ ឆ្ពោះទៅឃុំពាក់ស្នែង និងឆ្ពោះទៅកាន់តំបន់អភិវឌ្ឍន៍ពាក់ស្នែងថ្មីសម្រាប់ប្រជាពលរដ្ឋស្ម័គ្រចិត្ដចាកចេញពីតំបន់រមណីយដ្ឋានអង្គរ។ការអភិវឌ្ឍរីកចំរើនឥតឈប់ឈរបស់សម្ដេចតេជោ បង្ហាញពីប្រទេសជាតិមានសន្ដិភាព និងការរស់នៅក្រោមដំបូលសន្តិភាព៕
អត្ថបទ រូបភាព ៖ ឈិត សាវី
ព័ត៌មានជាតិ ថ្មីៗ
