អាជ្ញាធរខេត្តសៀមរាប បានធ្វើការជំរុញដល់ភាគីពាក់ព័ន្ធនានា នៅក្នុងព្រលានយន្តហោះអន្តរជាតិសៀមរាប ត្រូវធ្វើយ៉ាងណាកុំឲ្យមានបាតុភាពមិនល្អ នាំឲ្យមានការថ្នាំងថ្នាក់ដល់អ្នកទេសចរដែលចូលមកកម្សាន្តនៅក្នុងខេត្តបេតិកភណ្ឌមួយនេះ។
ក្នុងកិច្ចប្រជុំផ្សព្វផ្សាយសេចក្តីសម្រេចរបស់រាជរដ្ឋាភិបាល ស្តីពីការតែងតាំងសមាសភាពគណៈកម្មការអន្តរក្រសួង ដើម្បីសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស (គ.អ.ច.ទ) នារសៀលថ្ងៃទី១៦ ខែឧសភា ឆ្នាំ២០២៣ នៅព្រលានយន្តហោះអន្តរជាតិសៀមរាប លោក យុន លីនណេ អភិបាលរងខេត្តសៀមរាប បានលើកឡើងថា ខេត្តសៀមរាប ជាខេត្តទេសចរណ៍ដ៏សំខាន់របស់ប្រទេសកម្ពុជា ដោយមានអ្នកទេសចរទាំងជាតិ និងអន្តរជាតិ ជាច្រើនបានធ្វើដំណើរចូលមកកម្សាន្តទាំងតាមច្រកទ្វារព្រលានយន្តហោះ និងតាមផ្លូវគោក។ កត្តាទាំងអស់នេះហើយ ដើម្បីកុំឲ្យមានបាតុភាពមិនប្រក្រតីកើតឡើង អាជ្ញាធរខេត្តសៀមរាប បានធ្វើការជំរុញយ៉ាងទទូចដល់ភាគីពាក់ព័ន្ធទាំងអស់នៅក្នុងព្រលានយន្តហោះអន្តរជាតិសៀមរាប ត្រូវធ្វើយ៉ាងណាជួយសម្រួលដល់ការធ្វើដំណើរមកដល់អ្នកទេសចរទាំងជាតិ និងអន្តរជាតិ។ មន្ត្រីជួរមុខដែលធ្វើការនៅក្នុងព្រលានយន្តហោះ ជាអ្នកដែលភ្ញៀវទេសចរគ្រប់រូបបានជួបមុនគេបំផុត ដូច្នេះអ្នកទាំងនោះតែងចងចាំនូវអ្វីដែលយើងបានធ្វើ។
យោងតាមប្រធានមន្ទីទេសចរណ៍ខេត្តសៀមរាប លោក ង៉ូវ សេងកាក់ បានឲ្យដឹងថា សម្រាប់ខេត្តសៀមរាប ភ្ញៀវទេសចរអន្តរជាតិភាគច្រើនរហូតដល់៧៣ភាគរយ បានធ្វើដំណើរចូលមកកម្សាន្តតាមច្រកព្រលានយន្តហោះអន្តរជាតិសៀមរាប និងមានតែ២៧ភាគរយប៉ុណ្ណោះដែលធ្វើដំណើរចូលមកតាមផ្លូវគោក។
ជាមួយនឹងការមកដល់របស់អ្នកទេសចរនេះ រាជរដ្ឋាភិបាលមានការព្រួយបារម្ភយ៉ាងខ្លាំងចំពោះការអនុវត្តឆ្គាំឆ្គងរបស់មន្ត្រីជួរមុខទាំងនៅតាមច្រកព្រំដែន និងទាំងនៅតាមច្រកព្រលានយន្តហោះអន្តរជាតិ។
អគ្គនាយកព្រលានយន្តហោះអន្តរជាតិសៀមរាប ឯកឧត្តម ប៊ុន រដ្ឋា បានលើកឡើងថា កាលពីនៅក្នុងប្រអប់សំបុត្ររបស់ព្រលានយន្តហោះ ទទួលបានសំបុត្រធ្វើការរិះគន់ដល់មន្ត្រីនានានៅក្នុងព្រលានយន្តហោះមួយនេះ។ ប៉ុន្តែមួយរយៈចុងក្រោយនេះ អាជ្ញាធរព្រលានយន្តហោះបានសង្កេតឃើញថា ស្ទើរតែលែងឃើញមានការសរសេររិះគន់ទាំងនោះ។
បើទោះបីជាយ៉ាងនេះក្តី លោកយុន លីនណេ បានលើកឡើងថា យ៉ាងណាអាជ្ញាធរខេត្តសៀមរាប នៅតែព្រួយបារម្ភ ជាពិសេសនៅក្នុងឱកាសដែលប្រមុខរាជរដ្ឋាភិបាលអនុញ្ញាតឲ្យក្រុមកីឡាក កីឡាការិនីបរទេសដែលចូលរួមប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជា ធ្វើជាម្ចាស់ផ្ទះ មកទស្សនានៅប្រាសាទអង្គរដោយឥតគិតថ្លៃ។ លោកថា រាជរដ្ឋាភិបាលបានធ្វើអ្វីគ្រប់យ៉ាងដើម្បីកិត្តិយសកម្ពុជា ដូច្នេះប្រសិនបើអាច អ្នកអនុវត្តការងារនៅក្នុងព្រលានយន្តហោះអន្តរជាតិខេត្តសៀមរាប គួររៀបចំច្រកពិសេសណាមួយដល់អ្នកទាំងនោះ ជាពិសេសសម្រាប់ប្រតិភូកីឡា ដែលជាអ្នកមានពិការភាព។
សូមជម្រាបថា រាជរដ្ឋាភិបាល បានសម្រេចបង្កើតគណៈកម្មការអន្តរក្រសួងដើម្បីសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស (គ.អ.ច.ទ) នេះឡើងដើម្បីសិក្សារៀបចំតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេសឱ្យមានហេដ្ឋាវចនា សម្ព័ន្ធ និងរចនាសម្ព័ន្ធគ្រប់គ្រាន់ ដើម្បីសម្រួលដល់ការធ្វើដំណើរនិងដឹកជញ្ជូនអ្នកដំណើរ និង ភ្ញៀវទេសចរ,កាត់បន្ថយរបាំងមិនចាំបាច់ធ្វើឱ្យប៉ះពាល់ដល់ការធ្វើដំណើរចូលនិងចេញរបស់ភ្ញៀវទេសចរ – លុបបំបាត់និងបោសសម្អាតភាពអសកម្មទាំងឡាយ និងភាពអនាធិបតេយ្យគ្រប់បែបយ៉ា ដែលនាំឱ្យប៉ះពាល់ និងរំខានដល់ការធ្វើដំណើរនិងការដឹកជញ្ជូនអ្នកដំណើរនិងភ្ញៀវទេសចរ,ទទួល និងដោះស្រាយរាល់ពាក្យបណ្តឹងរបស់ភ្ញៀវទេសចរនូវរាល់បញ្ហាដែលកើតមានឡើងតា ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស, សហការជាមួយបណ្តាស្ថានទូតនានាក្នុងប្រទេស និងក្រៅប្រទេសក្នុងការផ្សព្វផ្សាយព័ត៌មាននា ដែលទាក់ទងនឹងការសម្រួលការធ្វើដំណើរចូល-ចេញក្នុងប្រទេស ព្រមទាំងបញ្ហាសន្តិសុខសុវត្ថិភាពភ្ញៀវទេសចរ៕
អត្ថបទ និងរូបភាព៖ លោក ជា ស្រស់
