សារមន្ទីរព្រះនរោត្តមសីហនុ-អង្គរ បានរៀបចំពិព័រណ៍មិនអចិន្រ្តៃយ៍រយៈពេល១០ថ្ងៃ ដោយចាប់ពីថ្ងៃទី១៨ រហូតដល់ថ្ងៃទី២៨ ខែឧសភា ឆ្នាំ២០២៣ ដើម្បីបង្ហាញឱ្យភ្ញៀវទេសចរជាតិ អន្ដរជាតិ ក៍ដូចប្រជាពលរដ្ឋចូលរួមទស្សនា និងសិក្សាស្វែងយល់ពីវត្ថុបុរាណ បន្ទាប់ពីរកឃើញពីកំណាយស្រាវជ្រាវ នៅតំបន់រមណីយដ្ឋានអង្គរនាពេលកន្លងមក។
អ្នកស្រី ជន ច័ន្ទណារ័ត្ន ជាមគ្គុទេសក៍សារមន្ទីរ ព្រះនរោត្ដមសីហនុ-អង្គរ បានឱ្យដឹងថា ការតាំងបង្ហាញក្នុងពិព័រណ៍វត្ថុបុរាណនេះ ចែកជា៣ប្រភេទ ក្នុងនោះវត្ថុដែលធ្វើពី ដីឥដ្ឋ លោហៈធាតុ សំរឹទ្ធ ស្ពាន់ ដែកសំណរ សមុច្ច័យវត្ថុបុរាណជាត្បូងគ្រីស្តាល់ និងគ្រាប់ក្វាតជាដើម។
អ្នកស្រីបានបន្តថា វត្ថុបុរាណ វត្ថុសិល្បៈ ឬសមុច្ច័យមានជាច្រើនមុខនោះ ត្រូវបានធ្វើកំណាយស្រាជ្រាវរកឃើញនៅតំបន់អង្គរ រួមនិងកុលាលភាជន៍ មានប្រភពពីឡដុតកុលាលភាជន៍បុរាណ តំបន់ភ្នំគូលែនផងដែរ ត្រូវបានសារមន្ទីរជ្រើសរើសដាក់តាំងបង្ហាញនៅក្នុងសារមន្ទីរនេះ រយៈពេល១០ថ្ងៃដើម្បីឱ្យសារធាណៈជនទស្សនា និងស្វែងយល់ពីវត្ថុបុរាណដែលសល់ពីសម័យអង្គរ។
ព័ត៌មានជាតិ ថ្មីៗ
អ្នកស្រីមានសុទិដ្ឋិនិយមថា៖ ពិព័រណ៍ខាងលើនេះ នឹងផ្តល់ព័ត៌មានថ្មីៗស្ដីពីវឌ្ឍនៈភាព និងភាពរីកចម្រើនក្នុងវិស័យស្រាវជ្រាវ និងកំណាយតាមបែបបុរាណវិទ្យា ក្នុងតំបន់ការពារបេតិកភណ្ឌរមណីយដ្ឋានអង្គរ ដើម្បីឱ្យសាធារណជន ក៏អាចស្វែងយល់បន្ថែមពីការងារថែទាំ និងជួសជុលវត្ថុបុរាណ ក្រោយពេលបញ្ចប់ការងារស្រាវជ្រាវ ពីការដ្ឋានកំណាយផងដែរ។
បើតាមអ្នកស្រី ជន ច័ន្ទណារ័ត្ន បានបញ្ជាក់ថា ពិព័រណ៍វត្ថុបុរាណនេះ ធ្វើឡើងដើម្បីអបអរទិវាសារមន្ទីរអន្ដរជាតិថ្ងៃទី១៨ ខែឧសភា ដោយក្នុងនោះ បានបើកឱ្យ ភ្ញៀវទេសចរជាតិ អន្ដរជាតិអាចចូលទស្សនាបានដោយឥតគិតថ្លៃ។ អ្នកស្រីក៍បានអំពាវឱ្យប្រជាពលរដ្ឋ ភ្ញៀវទេសចរជាតិ និងអន្ដរជាតិ ប្រជាពលរដ្ឋចូលរួមទស្សនាឱ្យបានច្រើន ដើម្បីឱ្យស្គាល់ពីវត្ថុបុរាណពីសម័យអង្គរ៕
អត្តបទ រូបភាព ៖ឈិត សាវី
