អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកអង្គរធំ និងជាអនុរដ្ឋលេខាធិការក្រសួងការពារជាតិ ឯកឧត្ដម ស ថាវី បានជំរុញដល់អាជ្ញាធរមូលដ្ឋាន ត្រូវខិតខំធ្វើការដោះស្រាយសំណូមពររបស់ពលរដ្ឋ ក៏ដូចជាការដោះស្រាយទំនាស់ដីធ្លីក្នុងមូលដ្ឋាន ដោយប្រើយន្តការឈ្នះៗ ដែលដាក់ចេញដោយសម្តេចតេជោប្រមុខរាជរដ្ឋាភិបាល។
ឯកឧត្តម ស ថាវី បានលើកឡើងបែបនេះ នៅក្នុងវេទិការសាធារណៈ កាលពីព្រឹកថ្ងៃទី១៨ ខែឧសភា ឆ្នាំ២០២៣ នៅភូមិ លៀប ឃុំពាក់ស្នែង ស្រុកអង្គរធំ ខេត្តសៀមរាប ដែលវេទិការនេះរៀបចំដោយក្រុមការងាររាជរដ្ឋាភិបាលចុះជួយស្រុកអង្គរធំ ដើម្បីឱ្យប្រជាពលរដ្ឋសំណូមពរ និងដាក់សំណើនូវក្ដីកង្វល់ និងបញ្ហាផ្សេងៗទៀត សម្រាប់ឱ្យអាជ្ញាធរជួយដោះស្រាយ។
ឯកឧត្ដម ស ថាវី លើកឡើងថា តាមរយៈវេទិកាសាធារណៈ ដែលរៀបចំឡើងនៅថ្ងៃនេះ បានលើកយកមកដោះស្រាយជាបន្តបន្ទាប់ ទៅតាមសំណើរ និងសំណូមពរនានារបស់ប្រជាពលរដ្ឋ ទៅតាមស្ថានភាពជាក់ស្តែង ដើម្បីធ្វើយ៉ាងណាឱ្យប្រជាពលរដ្ឋរស់នៅដោយភាពសុខសប្បាយ។ ឯកឧត្ដមក៏បានក្រើនរំលឹកដល់ អាជ្ញាធរភូមិឃុំ មន្ត្រីតាមបណ្តាការិយាល័យស្រុក និងសមាជិក ក្រុមការងារចុះជួយស្រុក ត្រូវបន្តបំរើសេវាសាធារណៈដែលជាតម្រូវការចាំបាច់ជូនប្រជាពលរដ្ឋឱ្យកាន់តែល្អប្រសើរថែមទៀត ដោយប្រកាន់ខ្ជាប់តែអំពើល្អ និងត្រូវអនុវត្តការងារទៅតាមតួនាទីភារកិច្ចរបស់ខ្លួន ចៀសវាងនូវបាតុភាពស៊ីសំណូកសូកប៉ាន់ លើការផ្តល់សេវាសាធារណៈផ្សេងៗ ។ ជាមួយគ្នានេះដែរ ឯកឧត្តម ក៏បានជំរុញឲ្យអាជ្ញាធរឃុំ ស្រុក ត្រូវសហការជាមួយក្រុមការងារថ្នាក់ជាតិ ដើម្បីធ្វើការសម្របសម្រួលដោះស្រាយនូវបញ្ហាទំនាស់ដីធ្លីក្នុងមូលដ្ឋាន ដោយប្រើយន្តការឈ្នះៗ។
ព័ត៌មានជាតិ ថ្មីៗ
ឯកឧត្តម លើកឡើងថា កន្លងទៅថ្មីៗនេះ សម្តេចតេជោប្រមុខរាជរដ្ឋាភិបាល បានណែនាំដល់ថ្នាក់ជាតិ និងអាជ្ញាធរមូលដ្ឋាន ត្រូវខិតខំដោះស្រាយទំនាស់ដីធ្លី នៅក្រៅប្រព័ន្ធតុលាការ តាមយន្តការឈ្នះៗ។ ឯកឧត្តមថា ការដោះស្រាយបាននៅថ្នាក់មូលដ្ឋាន បានជួយសម្រាលទុក្ខលំបាកដល់ប្រជាពលរដ្ឋ មួយចំនួនធំ ព្រោះថា ប្រើយន្តការតុលាការ ជាយន្តការឈ្នះចាញ់ មិនមែនយន្តការឈ្នះៗនោះទេ។
សូមជម្រាបថា នៅក្នុងវេទិការសាធារណៈនេះ ប្រជាពលរដ្ឋក្នុងឃុំពាក់ស្នែង បានលើកឡើងនូវសំណូមពរមួយចំនួន ជាពិសេសការសុំដល់ក្រុមការងារជួយក្នុងការជួសជុលផ្លូវសាធារណៈដើម្បីសម្រួលដល់ការដឹកជញ្ជូនកសិផល។
ពាក់ព័ន្ធសំណូមពរនេះដែរ ឯកឧត្តម ស ថាវី បានលើកឡើងថា រាជរដ្ឋាភិបាល កម្ពុជា បានកំពុងធ្វើការអភិវឌ្ឍជាបន្តបន្ទាប់នៅគ្រប់ទីកន្លែង។ ជាក់ស្តែង នៅក្នុងឃុំពាក់ស្នែងនេះផ្ទាល់ ដែលកាលពីមុនមានការពិបាកធ្វើដំណើរខ្លាំងមែនទែន ប៉ុន្តែពេលនេះមានផ្លូវបេតុងយ៉ាងស្អាត គុណភាពល្អ ដូច្នេះការងារដែលនៅសេសសល់នោះ នឹងត្រូវបានយកចិត្តទុកដាក់សាងសង់ជួសជុលជូនប្រជាពលរដ្ឋជាបន្តបន្ទាប់៕
អត្ថបទ រូបភាព ៖ ជា ស្រស់ និង ស៊ាន សុផាត
