ថ្លែងក្នុងទិវាជាតិនៃការចងចាំ នៅព្រឹកថ្ងៃទី២០ ខែឧសភា ឆ្នាំ២០២៣នេះ លោក រិន ឡូត អភិបាលស្រុកបន្ទាយស្រី
លើកឡើងថា ទោះកន្លងផុតអស់ជិត ៤០ឆ្នាំហើយក្ដី ប៉ុន្តែប្រជាជនកម្ពុជាគ្រប់ៗរូប នៅតែចងចាំមិនអាចបំភ្លេចបាននូវរបបកម្ពុជាប្រជាធិបតេយ្យ ឬរបបប្រល័យពូជសាសន៍ ប៉ុល ពត (១៧ មេសា ១៩៧៥ – ៦ មករា ១៩៧៩) ដែលជាមហាសោកនាដកម្មប្រល័យពូជសាសន៍ជាតិឯងដ៏ឈឺចាប់ និងបានចារទុកជាសច្ចៈធម៌ប្រវិត្តសាស្រ្ត សម្រាប់មនុស្សជំនាន់ក្រោយ។
ទិវាជាតិនៃការចងចាំ ២០ឧសភា រៀបចំដោយរដ្ឋបាលស្រុក បន្ទាយស្រីនាពេលនេះ មានការអញ្ជើញជាអធិបតីពីសំណាក់ ឯកឧត្តម ផល សាមន តំណាងឯកឧត្តម សែម សុវណ្ណនី ប្រធានអចិន្ត្រៃយ៍ក្រុមការងារថ្នាក់ជាតិចុះមូលដ្ឋានស្រុកបន្ទាយស្រី លោក ថាប់ សារ៉ន ប្រធានក្រុមប្រឹក្សាស្រុក ព្រមទាំងវត្តមានព្រះសង្ឃ មន្ត្រីរាជការ លោកគ្រូ អ្នកគ្រូ ប្រជាពលរដ្ឋ និងសិស្សានុសិស្សប្រមាណជាង ៥៥០នាក់។
ព័ត៌មានជាតិ ថ្មីៗ
លោក អភិបាលស្រុក បញ្ជាក់ថា ការរៀបចំទិវានេះដែរ គឺជាការរម្លឹកដល់វិញ្ញាណក្ខន្ធដល់ជនរងគ្រោះជាង៣ លាននាក់ ដែលបានស្លាប់ដោយរបបប្រល័យពូជសាសន៍ ប៉ុល ពត ដែលសោកនាដកម្មនេះ ប្រជាពលរដ្ឋកម្ពុជាភាគច្រើនលើសលប់បានដឹង និងបានយល់ច្បាស់អំពីរឿងរ៉ាវដ៏ជូរចត់ជិត ៣ទសវត្សរ៍ក្នុងភ្នក់ភ្លើងសង្គ្រាម ជាមួយនឹងទុក្ខវេទនាដ៏ឈឺចាប់មិនអាចរាប់អស់ ដោយសារការកាប់សម្លាប់មនុស្សដូចសត្វធាតុ ការព្រាត់ប្រាស់គ្រួសារ ការចាប់បង្ខំផ្សេងៗជាដើម។
លោក អភិបាលស្រុក បញ្ជាក់បន្ថែមថា ដើម្បីកុំឱ្យរបបនេះវិលត្រឡប់មកវិញ យើងត្រូវចូលរួមថែរក្សា ការពារសន្តិភាពឱ្យបានគង់វង្ស យើងមានសន្តិភាព យើងមានឱកាសក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត។ ជាពិសេស សូមប្រជាពលរដ្ឋ ដែលគ្រប់អាយុ និងមានឈ្មោះក្នុងបញ្ជីបោះឆ្នោត សូមបងប្អូនអញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ខាងមុខ ទៅតាមឆន្ទៈ ដើម្បីជ្រើសរើសតំណាងរាស្រ្តនីតិកាលទី៧ បន្តការដឹកនាំអភិវឌ្ឍប្រទេសជាតិឱ្យកាន់តែរីកចំរើនបន្ថែមទៀត។
គួរជម្រាបថា ទិវាជាតិនៃការចងចាំ ត្រូវបានកំណត់ដោយអនុក្រឹត្យ ដែលចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃ ទី១៤ ខែកុម្ភៈ ឆ្នាំ២០១៨ និងបានសម្រេចយកថ្ងៃទី២០ ខែឧសភា ដើម្បីប្រារព្ធទិវានេះជារៀងរាល់ឆ្នាំ។
អត្ថបទ និងរូបភាព៖ លោក ហាំង ម៉េងហួត និងលោក ធន់ ពូថេ
កែសម្រួលអត្ថបទ ៖ លោក សេង ផល្លី
