អត្តសញ្ញាណនៃប្រភពដើមផលិតកម្មបិតលើផលិតផល ដែលដាក់លក់នៅលើទីផ្សារ មិនត្រឹមតែផ្ដល់ទំនុកចិត្តដល់អ្នកប្រើប្រាស់ និងពង្រីកទីផ្សារប្រហុកនៅក្រៅប្រទេសនោះទេ ប៉ុន្តែម៉ាកនេះនឹងក្លាយជាកម្លាំងស្រូបទាញទេសចរណ៍ជាតិ និងបរទេស ឱ្យមកធ្វើទស្សនកិច្ចក្នុងតំបន់ផលិតកម្ម ដែលជាឱកាសសម្រាប់សហគមន៍កសិកម្ម ឬយុវជនជូនដល់ភ្ញៀវដែលមកកំសាន្តនៅក្នុងតំបន់របស់សហគមន៍ អាចបង្កើតប្រភពចំណូលបន្ថែមទៀតផង និងផ្សព្វផ្សាយពីវប្បធម៌ប្រពៃណីរបស់កម្ពុជាបន្ថែមទៀត។
ថ្លែងក្នុងសិក្ខាសាលាស្តីពី៖ ទស្សនទាន និងអត្ថប្រយោជន៍នៃការកសាងឈ្មោះប្រហុកសៀមរាប ម៉ាកសម្គាល់ភូមិសាស្ត្រទំនិញខេត្តសៀមរាប នាព្រឹកថ្ងៃទី០២ ខែឧសភា ឆ្នាំ២០២៣ លោក ភឿង គឹមលី ប្រធានមន្ទីរពាណិជ្ជកម្មខេត្តសៀមរាប បានបញ្ជាក់ថា កាលពីថ្ងៃទី២៦ ខែមេសា ឆ្នាំ២០២៣កន្លងទៅនេះ ក្រសួងពាណិជ្ជកម្ម បានរៀបចំពិធីសម្ពោធម៉ាកសម្គាល់ភូមិសាស្ត្រទំនិញចំនួន៣ រួមមាន៖ “អំបិលកំពតកប” “ទឹកត្រីកំពតកែប“ និង “ បង្កងតាកែវ” និងម៉ាកសមូហភាពចំនួន៤ គឺ៖ “នំបញ្ចុកសៀមរាប” “ដូងខ្ទះបាត់ដំបង” “អំបុកកំពង់ធំ” និង “ក្រូចថ្លុងកោះពីរ” ក្នុងទិវាកម្មសិទ្ធិបញ្ញាពិភពលោកឆ្នាំ២០២៣ ដែលជាការបង្ហាញឱ្យឃើញពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាល នៅក្នុងការបង្កើនតម្លៃបន្ថែមដល់ផលិតផលក្នុងស្រុក និងពង្រឹងភាពប្រកួតប្រជែងផលិតផលខ្មែរនៅទីផ្សារក្នុងស្រុក និងទីផ្សារនាំចេញ។ ហើយការចុះបញ្ជីផលិតផលទាំងនេះ គឺជាសមិទ្ធផលដ៏សំខាន់ដែលយើងបានខិតខំរួមគ្នា ដើម្បីបង្កើត ចងក្រង អភិរក្ស ថែរក្សា អភិវឌ្ឍផលិតផលក្នុងស្រុកឱ្យមានតម្លៃខ្ពស់ និងផ្សព្វផ្សាយពីវប្បធម៌របស់ខ្មែរយើងផងដែរ។
ឯកឧត្តម សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធានលេខាធិការដ្ឋាននៃគណៈកម្មាធិការជាតិ គ្រប់គ្រងកម្មសិទ្ធិបញ្ញា និងជាប្រធាននាយកដ្ឋានកម្មសិទ្ធិបញ្ញា បានឲ្យដឹងថា ក្រោមក្របខណ្ឌគម្រោង CAPFish Capture គម្រោងអភិវឌ្ឍន៍ជលផលក្រោយប្រមូលផល បានសហការអនុវត្តក្នុងភាពជាដៃគូរវាងរដ្ឋបាលជលផល និងអង្គការសហប្រជាជាតិអភិវឌ្ឍន៍ឧស្សាហកម្មហៅកាត់ថា UNIDO ។ គម្រោងនេះមានរយៈពេល៥ឆ្នាំ ចាប់ពីឆ្នាំ២០១៩-២០២៤ និងទទួលបានសហហរិញ្ញប្បទានពីសភាពអឺរ៉ុប។ គម្រោង CAPFish Capture មានលទ្ធផលរំពឹងទុកសំខាន់ចំនួន៣ រួមមាន៖១.ការពង្រឹងសមត្ថភាពអជ្ញាធរមានសមត្ថកិច្ច និងប្រព័ន្ធត្រួតពិនិត្យផ្លូវការដែលគាំទ្រដល់ផលិផលជលផល ក្រោយប្រមូលផល, ២.ការពង្រឹងសមត្ថភាពវិស័យឯកជន (ផលិតករ អ្នកកែច្នៃ សហគមន៍ផលិត)ដើម្បីអនុលោមទៅតាម ស្តង់ដា សុវត្ថិភាពចំណីអាហារ និងអនាម័យ បង្កើនភាពប្រកួតប្រជែង និងពង្រីកទីផ្សារក្នុងស្រុក និងអន្តរជាតិ និង៣.ជំរុញការស្រាវជ្រាវ និងអភិវឌ្ឍន៍បច្ចេកវិទ្យា ក្នុងគោលបំណងលើកកម្ពស់ផ្នែកជលផលក្រោយប្រមូលផល សំដៅរួមចំនែកដល់ការអភិវឌ្ឍខ្សែច្រវាក់តម្លៃជលផល។
ព័ត៌មានជាតិ ថ្មីៗ
ឯកឧត្តមទីប្រឹក្សា បានបញ្ជាក់ទៀតថា នៅក្នុងលទ្ធផលទី៣ នៃគម្រោងបានធ្វើសម្មិទ្ធិសិក្សា និងរៀបចំសិក្ខាសាលាពិគ្រោះយោបល់ជាមួយភាគីពាក់ព័ន្ធក្នុងឆ្នាំ២០២២ ដើម្បីកំណត់ស្វែងរកនូវផលិតផលជលផលដែលមានសក្តានុពលសម្រាប់ការចុះបញ្ជី ជាម៉ាកសម្គាល់ ភូមិសាស្ត្រទំនិញ ហៅកាត់ថា GI (Geographical Indication)។ ជាលទ្ធផលគម្រោងបានសម្រេចជ្រើសរើសផលិតផលចំនួន ២មុខ គឺទឹកត្រីកំពតកែប និងប្រហុកសៀមរាប ដើម្បីជំរុញការចុះបញ្ជីជាម៉ាកសម្គាល់ ភូមិសាស្ត្រទំនិញ ដោយហេតុថា គម្រោងនៅសល់រយៈពេល១ឆ្នាំកន្លះ សម្រាប់ការអនុវត្ត យើងបានអញ្ជើញជំនាញការបរទេសផ្នែក GI លោក Peter Damary_ដើម្បីធ្វើការសិក្សាជាមួយភាគីពាក់ព័ន្ធជាពិសេស គឺក្រសួងពាណិជ្ជកម្ម ផលិតករ និង វិស័យឯកជនដើម្បីបង្កើតផែនទីបង្ហាញផ្លូវក្នុងការជំរុញការងារចុះបញ្ជី និងការផ្សព្វផ្សាយ ផលិតផលទឹកត្រីកំពតកែប និងប្រហុកសៀមរាបផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
