ក្នុងឱកាសអញ្ជើញជាអធិបតីក្នុងពិធីបិទវគ្គបណ្ដុះគំនិតនវានុវត្ដន៍អាជីវកម្មឌីជីថល នៃកម្មវិធីយុវជន២១ ក្រោមប្រធានបទសហគ្រិនឌីជីថលនវានុវត្ដន៍អាជីវកម្ម រដូវកាលទី៣ ដែលធ្វើឡើងនៅមជ្ឈមណ្ឌលជាតិយុវជនកម្ពុជា នាខេត្ដសៀមរាប នាថ្ងៃទី២៤ខែឧសភាឆ្នាំ២០២៣នេះ ឯកឧត្ដម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា បច្ចុប្បន្ននេះ រាជរដ្ឋាភិបាលកម្ពុជា បានខិតខំប្រឹងប្រែង ក្នុងការជំរុញ វិស័យឌីជីថលដែលជាកម្លាំងចលករដ៏សំខាន់ ក្នុងការលើកកម្ពស់កំណើនសេដ្ឋកិច្ច ដោយបានដាក់ចេញនូវក្របខណ្ឌគោលនយោបាយសេដ្ឋកិច្ច និងសង្គម ឌីជីថលកម្ពុជា ឆ្នាំ២០២១-២០៣៥ ហើយការជឿជាក់លើប្រព័ន្ធ ឌីជីថល គឺជាការផ្តោតលើការកសាងប្រព័ន្ធច្បាប់ និងការលើកកម្ពស់ការយល់ដឹងអំពីសុវត្ថិភាពឌីជីថល ដូច្នេះការធ្វើពាណិជ្ជកម្មតាមប្រព័ន្ឋអេឡិចត្រូនិច ជាការរួមចំណែកយ៉ាងសំខាន់ ក្នុងការអភិវឌ្ឍសេដ្ឋកិច្ចឌីជីថល ខណៈដែលចំនួនអ្នកប្រើប្រាស់អ៊ីនធឺណែត ក្នុងចំណោមយុវជន និងការកើនឡើងនូវចំណេះដឹង ហេដ្ឋារចនាសម្ព័ន្ធ ក្នុងវិស័យបច្ចេកវិទ្យា មានការកើនឡើងជាបន្ដបន្ទាប់។
ឯកឧត្ដមបន្ដថា បច្ចេកវិទ្យាឌីជីថលបាននិងកំពុងដើរតួនាទី ជាស្នូលក្នុងសកម្មភាពសេដ្ឋកិច្ច និងសង្គម ប្រកបដោយប្រសិទ្ឋភាព និងផលិតភាព ហើយដើម្បីឆ្លើយតបទៅនឹងបរិបទបដិវត្តន៍ឧស្សាកម្ម ៤.០ និងការប្រែប្រួលឥតឈប់ឈរ របស់សង្គមជាតិ យុវជនគប្បីត្រូវមានបំណិនសតវត្សទី២១ ក្នុងនោះត្រូវមានសមត្ថភាព និងឥរិយាបថ ដែលអាចទទួលយកចំណេះដឹង ដើម្បីលើកកម្ពស់ការគិត ការរៀនសូត្រ ការធ្វើការងារ និងការរស់នៅក្នុងសង្គម។ បំណិនទាំងនេះ រួមមាន ភាពច្នៃប្រឌិត និងនវានុវត្តន៍, ការវិភាគបែបស៊ីជម្រៅ ការដោះស្រាយបញ្ហា, ការធ្វើសេចក្តីសម្រេចចិត្ត, ការប្រាស្រ័យទាក់ទង និងសាមគ្គីភាពក្នុងការងារជាក្រុម ។
ឯកឧត្ដមចញ្ជាក់បន្ថែមថា កម្មវិធី “យុវជន២១” ពិតជាបានឆ្លើយតបយ៉ាងពិតប្រាកដទៅនឹងយុទ្ឋសាស្ត្រកំណែទម្រង់វិស័យអប់រំយុវជន និងកីឡា ឆ្នាំ២០១៨-២០២៣ ក្នុងនោះ យុទ្ឋសាស្ត្រ ទី១ គឺ “ការផ្ដល់ឱកាស ឱ្យយុវជនទទួលបានការអប់រំ និងការបណ្ដុះបណ្តាលជំនាញវិជ្ជាជីវៈប្រកបដោយគុណធម៌ និងសមធម៌ និងយុទ្ធសាស្ត្រទី២ គឺ “ការលើកទឹកចិត្តយុវជនឱ្យមានគំនិតផ្តួចផ្តើម គំនិតច្នៃប្រឌិត គំនិតបង្កើតថ្មី និង ស្មារតីសហគ្រិនភាព ដូច្នេះក្នុងឱកាសនេះ សូមឲ្យសិក្ខាកាមត្រូវតែមានមោទនភាព និងមានជំនឿជាក់លើខ្លួនឯង ដើម្បីត្រៀមខ្លួនក្នុងភាពជាអ្នកដឹកនាំធុរកិច្ច និងជាសហគ្រិនលើមុខរបរអាជីវកម្មនានា ក្នុងន័យចូលរួមការអភិវឌ្ឍសេដ្ឋកិច្ច និងសង្គមជាតិឱ្យមានការរីកចម្រើន។
ព័ត៌មានជាតិ ថ្មីៗ
លោក ម៉ិល ផនសីហា ប្រធាននាយកដ្ឋានយុវជន បានឱ្យដឹងថា កម្មវិធីបណ្ដុះគំនិតនវានុវត្ដន៍អាជីវកម្មរបស់កម្មវិធីយុវជន២១នេះ ពួកគាត់ទទួលបានចំណេះដឹងជាច្រើន ទាំងការបង្កើតគំនិតអាជីវកម្ម, ការសរសេរផែនការអាជីវកម្ម និងការរៀបចំសកម្មភាពដើម្បីអនុវត្តអាជីវកម្មរបស់ខ្លួន ហើយការសិក្សាកម្មវិធីយុវជន២១នេះ មានរយៈពេល៧ថ្ងៃ មានបេក្ខជន៨០រូប វាគ្មិនចំនួន១៣រូប មានមេរៀនចំនួន១៧ រួមមាន ៖ ការប្រមូលនិងវិភាគទិន្ន័យ , ការកំណត់គោលដៅ និងគំនិតផ្តួចផ្តើមអាជីវកម្ម , ការបង្កើត និងការគ្រប់គ្រងអាជីវកម្ម , ផែនការអាជីវកម្មបែបឌីជីថល ផលិតវីឌីអូ និងប្រព័ន្ធផ្សព្វផ្សាយ ចម្បាំងខាងក្នុង យុទ្ធសាស្ត្រ ដើម្បីក្លាយខ្លួនជាសហគ្រិនឆ្នើម ការនិយាយជាសារធារណៈ គំនិតអាជីវកម្មឌីជីថល ការកំណត់យុទ្ធសាស្ត្រទីផ្សារ ការវិភាគទីផ្សារបែបឌីជីថល ការវិភាគហិរញ្ញវត្ថុ ការវិភាគថ្លៃដើម និងផលចំណេញ ការគ្រប់គ្រងអាជីវកម្ម ការគ្រប់គ្រងហានិភ័យជាដើម៕
អត្ថបទ និងរូបភាព ៖ លោក បូ សាវី និង លោក ជា ស្រស់
កែសម្រួលអត្ថបទ ៖ លោក លីវ សាន្ត
