កាកបាទក្រហមកម្ពុជា ដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភជាលើកទី៥ នូវថវិកាចំនួន ២ម៉ឺនដុល្លារអាម៉េរិក រួមជាមួយគ្រឿងឧបភោគបរិភោគ និងសម្ភារប្រើប្រាស់មួយចំនួនទៀត ដល់មន្ទីរពេទ្យកុមារអង្គរខេត្តសៀមរាប នៅថ្ងៃទី ២៦ ខែឧសភា ឆ្នាំ២០២៣នេះ តាមរយៈលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងលោកជំទាវ ទៀង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ក្នុងឱកាសដែលមន្ទីរពេទ្យបានប្រារព្ធកម្មវិធីបុណ្យផ្កាប្រាក់មហាសាមគ្គីឆ្នាំទី១០ ដើម្បីរកមូលនិធិសម្រាប់ចូលរួមចំណែកក្នុងការព្យាបាល និងថែទាំសុខភាព កុមារ-ទារក ប្រមាណ ៤០០-៤៥០នាក់ ក្នុងមួយថ្ងៃដោយឥតគិតថ្លៃ ។
មានប្រសាសន៍សំណេះសំណាលក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១ បានពាំនាំប្រសាសន៍ផ្ដាំផ្ញើសួរសុខទុក្ខដោយក្តីនឹករលឹក របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាពិសេស ការថ្លែងនូវអំណរគុណ និងកោតសរសើរដ៏ជ្រាលជ្រៅចំពោះថ្នាក់ដឹកនាំ ក្រុមគ្រូពេទ្យ និងបុគ្គលិកទាំងអស់នៃមន្ទីរពេទ្យកុមារអង្គរ ដែលបានខិតខំលះបង់កម្លាំងកាយ-ចិត្ត ជួយសង្រ្គោះព្យាបាល ផ្តល់ក្តីអាណិតស្រឡាញ់ ភាពកក់ក្តៅ និងក្តីសង្ឃឹមដល់កុមារ ក៏ដូចជាក្រុមគ្រួសារអាណាព្យាបាលទាំងអស់ប្រកបដោយស្នាមញញឹម និងចេញពីបេះដូង។
ព័ត៌មានជាតិ ថ្មីៗ
លោកជំទាវ បន្ថែមថា «ក្នុងឋានៈជាប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរ យកចិត្តទុកដាក់បំផុតលើការលើកកម្ពស់សុខុមាលភាពរបស់ប្រជាពលរដ្ឋងាយរងគ្រោះបំផុត ដែលក្នុងនោះការរួមចំណែកជួយព្យាបាលកុមារកម្ពុជារាប់ម៉ឺននាក់ តាមរយៈការឧបត្ថម្ភដល់មន្ទីរពេទ្យកុមារអង្គរ គិតចាប់តាំងពីឆ្នាំ២០១៩មក និងការឧបត្ថម្ភដល់មន្ទីរពេទ្យកុមារគន្ធបុប្ផា នូវថវិកាចំនួន ១លានដុល្លារអាម៉េរិក ជារៀងរាល់ឆ្នាំ គិតចាប់តាំងពីឆ្នាំ២០១២ មក ហើយសម្រាប់មន្ទីរពេទ្យកុមារគន្ធបុប្ផា កាកបាទក្រហមកម្ពុជា នឹងប្រគល់ថវិកាចំនួន១លានដុល្លារ ជាលើកទី១២ នៅថ្ងៃទី ១ ខែមិថុនា ខាងមុខនេះ ដែលត្រូវជាទិវាកុមារអន្តរជាតិ ។
លោកជំទាវ បញ្ជាក់បន្ថែមថា រាជរដ្ឋាភិបាលកម្ពុជា ក្រោមការដឹកនាំប្រកបដោយគិត្តិបណ្ឌិតរបស់សម្តេចតេជោ ហ៊ុន សែន មានយុទ្ធសាស្ត្រច្បាស់លាស់ក្នុងការគ្រប់គ្រងស្ថានការណ៍នៃវិបត្តិជំងឺកូវីដ-១៩នៅក្នុងប្រទេស ហើយបាននឹងកំពុងជំរុញកំណើនសេដ្ឋកិច្ចឡើងវិញ ពិសេសយុទ្ធសាស្ត្ររបស់រាជរដ្ឋាភិបាល បាននឹងកំពុងយកចិត្តទុកដាក់ផ្តោតលើវិស័យអប់រំ និងវិស័យសុខាភិបាល ដែលគិតគូរពីសុខុមាលភាពរបស់ប្រជាជន ធ្វើយ៉ាងណាឱ្យប្រជាជនមានសុខភាពល្អ ទទួលបានសេវាថែទាំសុខភាពដិតដល់ មានលក្ខណៈងាយស្រួល គ្រួសារមានការរីកចម្រើនក្រោមម្លប់នៃសន្តិភាព។
ជាការឆ្លើយតប លោកស្រី វិសាល ម៉ារ៉ៃ នាយករងមន្ទីរពេទ្យកុមារអង្គរ តំណាងឱ្យថ្នាក់ដឹកនាំ បុគ្គលិក និងក្រុមគ្រូពេទ្យនៃមន្ទីរពេទ្យកុមារអង្គរ ក៏ដូចជាគ្រួសារប្រជាពលរដ្ឋដែលទទួលសេវាសុខាភិបាលពីមន្ទីរពេទ្យកុមារអង្គរ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានគិតគូរឧបត្ថម្ភជាបន្តបន្ទាប់ និងសូមថ្លែងអំណរគុណចំពោះសប្បុរសជនគ្រប់មជ្ឈដ្ឋានដែលបន្តឧបត្ថម្ភគាំទ្រដល់មន្ទីរពេទ្យកុមារអង្គរ ដែលនេះជាការលើកទឹកចិត្តដ៏ថ្លៃថ្លា ក្នុងការបន្តបេសកកម្មរបស់ក្រុមគ្រូពេទ្យ ក្នុងការព្យាបាលកុមារនៅកម្ពុជា។
លោកស្រី វិសាល ម៉ារ៉ៃ ក៏បានអំពាវនាវដល់សប្បុរសជនទាំងអស់ សូមបន្តឧបត្ថម្ភគាំទ្រដល់មន្ទីរពេទ្យកុមារអង្គរ ដើម្បីបន្តជួយសង្គ្រោះដល់កុមារ-ទារកនៅកម្ពុជាយើងបានកាន់តែច្រើនជាងមុន ៕
អត្ថបទ និងរូបភាព៖ សហការី
កែសម្រួលអត្ថបទ ៖ លោក លីវ សាន្ត
