ក្រុមប្រឹក្សាមូលនិធិគន្ធបុប្ផាកម្ពុជា នៅរសៀលថ្ងៃទី២៩ ខែឧសភា ឆ្នាំ២០២៣នេះ បានចុះសួរសុខទុក្ខថ្នាក់ដឹកនាំបុគ្គលិក ក្រុមគ្រូពេទ្យ នៅមន្ទីរពេទ្យកុមារគន្ធបុប្ផា ឬមន្ទីរពេទ្យកុមារជ័យវរ្ម័នទី៧ ខេត្ដសៀមរាប ដើម្បីលើកទឹកចិត្ដដល់ក្រុមគ្រូពេទ្យដែលបានលះបង់កម្លាំងកាយចិត្ដក្នុងការស្រោចស្រង់ជីវិតកុមារដោយមិនគិតថ្លៃ។
មានប្រសាសន៍ក្នុងឱកាសនោះ ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជានាយកប្រតិបត្តិនៃមូលនិធិគន្ធបុប្ផាកម្ពុជា បានថ្លែងថា មន្ទីរពេទ្យគន្ធបុប្ផាសៀមរាប គឺជាមន្ទីរពេទ្យដែលមានភាពល្បីល្បាញមួយ ក្នុងការព្យាបាលកុមារនៅកម្ពុជាដោយមិនយកថវិការ រួមជាមួយនឹងគុណភាពខ្ពស់។ ជាមួយគ្នានោះ ការពួតដៃគ្នារបស់ថ្នាក់ដឹកនាំ បុគ្គលិក ក្រុមគ្រូពេទ្យទាំងអស់ចំពោះរាល់ការព្យាយាមឆក់យកអាយុជីវិតកុមារពីដៃបច្ចុរាជមកវិញ គឺកើតចេញពីការលះបង់យ៉ាងធំធេង នូវកំលាំងកាយ-កំលាំងចិត្ត បញ្ញា ស្មារតី យ៉ាងមុសមុត ដោយមិនដែលត្អូញត្អែរ និងមិនថាយប់ មិនថាថ្ងៃឡើយ។
ឯកឧត្ដម មានប្រសាសន៍ទៀតថា កិច្ចដំណើរការជានិរន្តរបស់មន្ទីរពេទ្យដែលព្យាបាលកុមារមិនគិតថ្លៃនេះ អាចដំណើរការបានធម្មតា ដោយមូលនិធិគន្ធបុប្ផាកម្ពុជា នឹងបន្តរឹតបន្តឹងចំណងសាមគ្គីភាពជាមួយ មូលនិធិគន្ធបុប្ផាស្វីស នឹងបង្កើតយុទ្ធនាការផ្សព្វផ្សាយ កៀងគរនានាឱ្យកាន់តែច្រើនបន្ថែមទៀត ដើម្បីបំផុសចលនាចូលរួមទាំងអស់គ្នាពីពលរដ្ឋគ្រប់ស្រទាប់ដើម្បីកុមារនៅកម្ពុជាដែលជាអនាគតដ៏ភ្លឺស្វាងរបស់ប្រទេសយើង ក្នុងស្មារតី “ខ្មែរជួយខ្មែរ”។ ឯកឧត្តម ក៍សូមថ្លែងការកោតសរសើរ ចំពោះថ្នាក់ដឹកនាំ ក្រុមគ្រូពេទ្យ និងបុគ្គលិកនៃមន្ទីរពេទ្យគន្ធបុប្ផាសៀមរាប ក៏ដូចជាមន្ទីរពេទ្យកុមារគន្ធបុប្ផានៅភ្នំពេញទាំងអស់ដែលតែងតែបានជួយសង្រ្គោះព្យាបាល ផ្តល់ក្តីអាណិតស្រឡាញ់ ភាពកក់ក្តៅ និងក្តីសង្ឃឹមដល់កុមារ ក៏ដូចជាក្រុមគ្រួសារអាណាព្យាបាលទាំងអស់ប្រកបដោយស្នាមញញឹម និងចេញពីបេះដូង។ ជាពិសេសចងចាំនូវគុណូបការៈដ៏ថ្លៃថ្លារបស់ឯកឧត្ដម Beat Richner ដែលបានលះបង់កម្លាំងកាយចិត្តពេញមួយជីវិតដើម្បីមន្ទីរពេទ្យនេះ។ហើយទោះបីជាលោកបានទទួលមរណភាពហើយក្តី ដ៏ប៉ុន្តែប្រជាពលរដ្ឋទាំងអស់ នៅតែចងចាំក្នុងបេះដូងជានិច្ច។
សូមជម្រាបថា នៅមន្ទីរពេទ្យជ័យវរ្ម័នទី៧ គិតជាមធ្យមនៃការផ្តល់សេវាប្រចាំថ្ងៃតាមផ្នែកនីមួយៗ រួមមាន៖ពិនិត្យពិគ្រោះជំងឺកុមារចំនួនចន្លោះពី ១,០០០-១,២០០នាក់, អ្នកជំងឺចូលសម្រាកពេទ្យចំនួនពី ២០០-២៥០នាក់, អ្នកបានជាសះស្បើយចេញទៅផ្ទះវិញមានពី ២០០-២២០នាក់, ផ្នែកសម្ភព បានពិនិត្យស្ត្រីមានផ្ទៃពោះ ពី៣៥០-៥០០នាក់, ស្ត្រីសម្រាលកូនមានពី ៥០-៧០នាក់, ផ្នែកវះកាត់កុមារបាន ៣០-៤០នាក់ ក្នុងនោះវះកាត់បេះដូងពី ២-៣នាក់ ក្នុងមួយថ្ងៃ។ជាមួយគ្នានោះដែរ ក្នុងរយៈពេល៥ខែ ឆ្នាំ២០២៣នេះ បានបង្ហាញថា ការពិនិត្យពិគ្រោះជំងឺខាងក្រៅ (OPD) សរុប ៖ ១៤៦,៣៨៤ នាក់ រួមមានពិនិត្យពិគ្រោះជំងឺផ្នែកកុមារ៖ ១០៤,២៨៩នាក់, ពិនិត្យស្រ្តីមានផ្ទៃពោះ៖ ៤២,០៩៥នាក់, អ្នកជំងឺដាក់សម្រាកព្យាបាល(IPD) ៣៧,៥១៧នាក់ កុមារចំនួន២៦,៨២៤នាក់ ស្ត្រីមានផ្ទៃពោះចំនួន ១០,៦៩៣នាក់។ ករណីវះកាត់សរុប ៥,១៤៧នាក់ ក្នុងនោះបានវះកាត់ជំងឺបេះដូងចំនួន ២១៦ករណី។ ដោយឡែកស្រ្តីបានសម្រាលកូនមានចំនួន ៨,៣១៩នាក់ ក្នុងនោះសម្រាលដោយការវះកាត់មានចំនួន ១,៦៥១នាក់ អ្នកជំងឺបានជាសះស្បើយចេញទៅផ្ទះសរុបមានចំនួន ៣២,៨០២នាក់ ក្នុងនោះមានស្ត្រីបាន ទទួលសេវាសម្រាលកូន និងមានស្ត្រីមានផ្ទៃពោះបានចេញទៅផ្ទះចំនួន ៩,៧៨៣នាក់៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
