ការផ្លាស់ប្តូរឥរិយាបថក្នុងការទុកដាក់សំរាមឲ្យបានត្រឹមត្រូវរបស់ប្រជាពលរដ្ឋនៅតាមមូលដ្ឋាន វានឹងអាចក្លាយទៅជាឱកាសមួយយ៉ាងល្អសម្រាប់ប្រជាពលរដ្ឋខ្លួនឯង តាមរយៈការទាញយកផលប្រយោជន៍ជាច្រើនពីទេសចរណ៍បរិស្ថានតាមតំបន់ និងមូលដ្ឋានរបស់ពួកគាត់។
ក្នុងដំណើរទស្សនកិច្ចសិក្សាពិនិត្យមើលស្ថានភាពទូទៅអំពីវិស័យបរិស្ថាន និងទេសចរណ៍សហគមន៍ នៅក្នុងភូមិសាស្រ្តឃុំកំពង់ភ្លុក ស្រុកប្រាសាទបាគង នៅថ្ងៃទី៣០ ខែឧសភា ឆ្នាំ២០២៣ លោក ឃឹម ហ្វីណង់ អភិបាលរងខេត្តសៀមរាប មានប្រសាសន៍ថា ដើម្បីជម្រុញឲ្យការងារបរិស្ថានក្នុងភូមិសាស្រ្តឃុំកំពង់ភ្លុក ឲ្យកាន់តែមានប្រសិទ្ធភាព លុះត្រាតែមានការជម្រុញឲ្យមានទេសចរណ៍បរិស្ថាន តាមរយៈការផ្សារភ្ជាប់នឹងការរស់នៅរបស់ប្រជាពលរដ្ឋជាមួយបរិស្ថានស្អាត ដោយមានផ្លាស់ប្តូរឥរិយាបថក្នុងការទុកដាក់សំរាមឲ្យបានត្រឹមត្រូវ នោះបងប្អូននឹងអាចទាញយកផលប្រយោជន៍ជាច្រើនពីសក្កានុពលផ្សេងៗក្នុងវិស័យទេសចរណ៍។
លោក ឃឹម ហ្វីណង់ មានប្រសាសន៍ទៀតថា ដើម្បីឲ្យការងារនេះទទួលបានជោគជ័យ លុះត្រាតែមានការដើរទន្ទឹមគ្នារវាងការងារបរិស្ថាន និងទេសចរណ៍។ ក្នុងនោះដែរអ្នកពាក់ព័ន្ធទាំងអស់ ត្រូវចូលរួមក្នុងការបំផុសគំនិតដល់ប្រជាពលរដ្ឋឲ្យចេះស្រលាញ់បរិស្ថាន ព្រោះវាជាឱកាសឲ្យពួកគាត់ទទួលបានផលប្រយោជន៍ជាច្រើនពីបរិស្ថានទេសចរណ៍នេះវិញផងដែរ។ លោកអភិបាលរងខេត្ត ក៏បានជំរុញដល់អាជ្ញាធរមូលដ្ឋាន ជាពិសេសសហគមន៍ សមាគមទេសចរណ៍ ត្រូវពង្រឹងការទទួលខុសត្រូវ ដើម្បីបន្ដការអភិវឌ្ឍតំបន់ទេសចរណ៍ឲ្យកាន់តែមានភាពទាក់ទាញ និងត្រូវរិះរកមធ្យោបាយឲ្យប្រជាពលរដ្ឋអាចរកចំណូលទាំងរដូវប្រាំង និងវស្សា តាមរយៈការចូលរួមថែរក្សាបរិស្ថានឲ្យកាន់តែស្អាត។
បើតាមលោក សូរ ប្លង់ មេឃុំកំពង់ភ្លុក បានឲ្យដឹងថា ក្នុងឃុំកំពង់ភ្លុក មានប្រជាពលរដ្ឋសរុប ១,០០៨គ្រួសារ ក្នុងនោះ ៦៥% ប្រកបរបនេសាទ ៣០% ដឹកភ្ញៀវទេសចរណ៍ កំសាន្តនៅតំបន់ ព្រៃលិចទឹក ដែលជាតំបន់អេកូទេសចរណ៍ធម្មជាតិ និង ៥% ទៀតជាអ្នកលក់ដូរគ្រឿងទេសសម្ភារៈសិក្សា និងជាជាងឈើ៕
អត្ថបទ និងរូបភាព៖ លោក ហ៊ុន ឆៃលាង
កែសម្រួល៖ អ៊ុន ណារាជ្យ
