គម្រោងសាងសង់ និងជុសជុលផ្លូវបេតុងអាមេ ក្នុងឃុំចំនួន២ នៃស្រុកសូទ្រនិគម គឺដំដែក និងឃុំកៀនសង្កែ ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសដាក់ឲ្យដេញថ្លៃជាស្ថាបពរ នៅថ្ងៃទី៣០ ខែឧសភា ឆ្នាំ២០២៣ ដោយក្នុងនោះមានការចូលរួមពីមន្ត្រីបច្ចេកទេសសាលាខេត្តសៀមរាប មន្ត្រីបច្ចេកទេសក្រុងសៀមរាប គណៈកម្មការលទ្ធកម្មនៃឃុំទាំង២ និងក្រុមហ៊ុនម៉ៅការផងដែរ។
លោក ផាន សាយ ប្រធានគណៈកម្មការលទ្ធកម្ម នៅក្នុងឃុំដំដែក បានឲ្យដឹងថា គណៈកម្មការលទ្ធកម្មឃុំ បានដាក់ឲ្យដេញថ្លៃគម្រោងសាងសង់ផ្លូវបេតុងអាមេចំនួនមួយខ្សែ មានប្រវែង ២៤៥ម៉ែត្រ ទទឹង៥ម៉ែត្រ កម្រាស់គ្រួស០.១៥ម៉ែត្រ ដែលស្ថិតនៅក្នុងក្នុងតម្លៃនៃការប៉ានស្មានគឺ ១៤២,៩៤៦,៣៣៩រៀល ដោយមានក្រុមហ៊ុនម៉ៅការ ដាក់សំណើដេញថ្លៃចំនួន ៤ក្រុមហ៊ុន។ ជាលទ្ធផលបានទៅលើក្រុមហ៊ុន ង៉ោ ឈុត ក្នុងទឹកប្រាក់ចំនួន ១៤១,០០០,០០០រៀល។
ចំណែក លោក ហុង លី ប្រធានគណៈកម្មការលទ្ធកម្មឃុំកៀនសង្កែ បានឲ្យដឹងថា គណៈកម្មការលទ្ធកម្មបានដាក់ឲ្យដេញថ្លៃគម្រោងជួសជុលផ្លូវដីក្រាលក្រួសក្រហមចំនួនមួយខ្សែ ដែលមានប្រវែង ១,១០០ម៉ែត្រ ទទឹង៥ម៉ែត្រ កម្រាសក្រួស០,១៥ម៉ែត្រ និងសាងសង់លូកាត់ផ្លូវ ៨កន្លែង ដែលគម្រោងនេះស្ថិតនៅក្នុងក្នុងតម្លៃនៃការប៉ានស្មានគឺ ១១៤,៦២២,៩០៩រៀល ដោយមានក្រុមហ៊ុនម៉ៅការដាក់សំណើដេញថ្លៃចំនួន ៤ក្រុមហ៊ុន។ ជាលទ្ធផលបានទៅលើក្រុមហ៊ុន អុឹង លីសួរ ក្នុងទឹកប្រាក់ចំនួន ១៣១,៦៤០,០០០រៀល។
ជាមួយគ្នានោះ ក្រុមហ៊ុនទាំងអស់ដែលបានដេញថ្លៃតម្លៃទាបទី១ នៅក្នុងគម្រោងជុសជួលផ្លូវក្រាលគ្រួសក្រហម និងគម្រោងសាងសង់ផ្លូវមេតុងអាមេ ដែលស្ថិតនៅក្នុងឃុំដំដែក និងឃុំកៀនសង្កែ បានធ្វើការប្ដេជ្ញាចិត្ត ដោយសន្យាថា នឹងធ្វើឲ្យបានត្រឹមត្រូវទៅតាមគំនូប្លង់បច្ចេកទេស ស្របតាមបទដ្ឋានគតិយុទ្ធនៃការសាងសង់ និង គោរពតាមលក្ខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ស៊ុន គីន
កែសម្រួល៖ អ៊ុន ណារាជ្យ
