ពលរដ្ឋស្ម័គ្រចិត្ដចាកចេញពីតំបន់អង្គរទៅកាន់តំបន់ភូមិធម្មជាតិរុនតាឯក ស្រុកបន្ទាយស្រី និងតំបន់ភូមិធម្មជាតិពាក់ស្នែង ស្រុកអង្គរធំ ខេត្ដសៀមរាប ប្រមាណ ៧០០គ្រួសារបន្ថែមទៀត បានទទួលប័ណ្ណសមធម៌ពីរាជរដ្ឋាភិបាល ដែលយុទ្ធនាការនេះបន្តធ្វើឡើងចំនួនបីថ្ងៃ ចាប់ពីថ្ងៃទី៣១ ខែឧសភា ដល់ថ្ងៃទី២ ខែមិថុនា ឆ្នាំ២០២៣ ស្ថិតនៅខាងមុខប្រាសាទអង្គរវត្ដ។
បើតាមឯកឧត្តម កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ នៃក្រសួងផែនការ បានឲ្យដឹងថា អតីតប្រជាពលរដ្ឋនៅតំបន់អង្គរ ដែលបានស្ម័គ្រចិត្ដទៅរស់នៅតំបន់ភូមិធម្មជាតិរុនតាឯក និងតំបន់អភិវឌ្ឍន៍ពាក់ស្នែងថ្មី មានប្រមាណ៧០០គ្រួសារ ហើយសរុបមកដល់យុទ្ធនាការលើកទី៣នេះ មានចំនួនជិតមួយម៉ឺនគ្រួសារហើយ ដែលទទួលបានបណ្ណសមធម៌ និងអត្ថប្រយោជន៍ជាច្រើនពីរាជរដ្ឋាភិបាល។ យុទ្ធនាការនៃការកំណត់ និងផ្ដល់បណ្ណដល់ប្រជាពលរដ្ឋនាពេលនេះ គឺបានរៀបចំជាប្រព័ន្ធ ដោយមិនឱ្យប្រជាពលរដ្ឋរងចាំយូរ គឺយើងផ្ដល់ឱកាសឱ្យពួកគាត់ចូលសម្ភាសន៍ម្ដងៗ ដោយប្រើពេលតែប៉ុន្មាននាទីប៉ុណ្ណោះ នឹងទទួលបានបណ្ណសមធម៌ ដែលមានលោកមេឃចាំចុះហត្ថលេខានៅទីនេះតែម្តង ជាពិសេសទៀតនោះពួក គាត់ក្រោយពីទទួលបានបណ្ណសមធម៌ភ្លាម គឺអាចចុះបញ្ជីទទួលលេខកូដសម្រាប់បើកប្រាក់នៅបញ្ជរវឹងនៅជិតៗទីនេះភ្លាម។
ឯកឧត្ដមបន្ដថា ប្រជាពលរដ្ឋដែលត្រូវមកធ្វើបណ្ណសមធម៍ ត្រូវនាំយកមក ជាប់ខ្លួននូវឯកសារចាំបាច់មួយចំនួន ដូចជាសៀវភៅគ្រួសារ សៀវភៅស្នាក់នៅ បង្កាន់ដៃទីតាំងដីឡូតិ៍ និង អត្តសញ្ញាណបណ្ណសញ្ចាតិខ្មែរ។
សូមជម្រាបថា សម្តេចតេជោ ហ៊ុន សែន នាយករដ្ឋមន្ត្រី បានដាក់ចេញនូវគោលនយោបាយមួយចំនួន សម្រាប់អភិវឌ្ឍនៅតំបន់រុនតាឯក និងតំបន់ពាក់ស្នែង ដើម្បីសម្រួលការលំបាករបស់ប្រជាពលរដ្ឋដែលស្ម័គ្រចិត្តចាកចេញពីតំបន់រមណីយដ្ឋានអង្គរ ទៅតាំងទីលំនៅថ្មីនៅទីនោះ មានដូចជា៖ ការកសាងហេដ្ឋារចនាសម្ព័ន្ធ ផ្លូវថ្នល់ ប្រព័ន្ធលូតាមដងផ្លូវ សាលារៀន មន្ទីរពេទ្យ ផ្សារ ភ្លើងអគ្គិសនី អណ្តូងទឹក ប្រព័ន្ធទឹកស្អាត បង្គន់អនាម័យ ការដឹកជញ្ជូនប្រជាពលរដ្ឋតាមរយៈមធ្យោបាយផ្សេងៗមកកាន់ទីតាំងថ្មី។ ផ្តល់ប្រាក់ ឧបត្ថម្ភមួយគ្រួសារចំនួន ១,៤០០,០០០រៀល សម្រាប់សាងសង់លំនៅដ្ឋាន និងជាពិសេសផ្តល់ជូនប័ណ្ណក្រីក្រីប្រភេទ១ ដើម្បីទទួលបានប្រាក់ឧបត្ថម្ភផ្សេងៗ និងប័ណ្ណសម្រាប់ស្ត្រីមានផ្ទៃពោះ មានរយៈពេល១០ឆ្នាំ សម្រាប់ប្រជាពលរដ្ឋទាំងអស់ ដែលស្ម័គ្រចិត្តចាកចេញពីតំបន់អង្គរ មកសាងលំនៅថ្មីក្នុងឃុំរុនតាឯក និងការផ្តល់ជូន ប័ណ្ណកម្មសិទ្ធិស្របច្បាប់ផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
