អំពូលសូឡាចំនួន២៤០អំពូល បន្ថែមទៀតក្នុងភូមិសាស្រ្តឃុំរុនតាឯក ស្រុកបន្ទាយស្រី ខេត្តសៀមរាប បានដាក់អោយប្រើប្រាស់ ដើម្បីឱ្យ ភូមិ ឃុំ មានសុវត្ថិភាព នៅតាមទីជនបទ ជាពិសេសជួយកាត់បន្ថយគ្រោះថ្នាក់ចរាចរណ៍នៅពេលយប់ ។
ពិធីដាក់អោយប្រើប្រាស់ផ្លូវការអំពូលសូឡា ជាផ្លូវការនេះធ្វើឡើងក្រោមអធិបតីភាពឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី នៅថ្ងៃទី៣១ ខែឧសភា ឆ្នាំ២០២៣នេះ ។
ឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី មានប្រសាសថាការដាក់អោយប្រើប្រាស់ផ្លូវការអំពូលសូឡា ក្នុងភូមិសាស្រ្តឃុំរុនតាឯក ថ្ងៃនេះគឺ បានចូលរួមចំណែកជាមួយរដ្ឋាភិបាល ធ្វើឱ្យប្រសើរឡើងដល់ ភូមិ ឃុំ មានសុវត្ថិភាព នៅតាមទីជនបទ ជាពិសេស ជួយកាត់បន្ថយគ្រោះថ្នាក់ចរាចរណ៍ ងាយស្រួលក្នុងការធ្វើដំណើរទៅប្រកបមុខរបប និងធុរះផ្សេងៗពេលយប់ព្រលប់ ដោយពុំមានការព្រួយបារម្មណ៍ ដែលការដាក់នេះចំងាយ២០ម៉ែត្រ១អំពូល សរុបជិត៥គឺឡូម៉ែត្រ ហើយគម្រោងនេះមិនចប់តែត្រឹមនេះនោះទេគឺធ្វើជាជំហ៊ានៗទៅតាមលទ្ធភាព។ ជាមួយគ្នានោះឯកឧត្តម សុំអោយប្រជាពលរដ្ឋជួយថែរក្សាអោយបានយូ ដើម្បីជាប្រយោជន៍ទៅថ្ងៃខាងមុខទៀត។
តាមរបាយការណ៍លោក ទាវ សម ជំទប់ទី២ឃុំរុនតាឯក បានអោយដឹងថាក្នុងឃុំរុនតាឯក នៅឆ្នាំ២០១៩បានដាក់អំពូលសូឡាចំនួន១៩២អំពូល ស្ថិតក្នុងភូមិថ្នល់៣៩អំពូល ភូមិជ័យ១៥៣អំពូល ដោយមានការឧបត្ថមពីឯកឧត្តម សែម សុវណ្ណនី ប្រធានក្រុមការងារថ្នាក់ជាតិចុះមូលដ្ឋានស្រុកបន្ទាយស្រី ក្នុងឆ្នាំ២០២៣នេះ បានដាក់ ២៤០អំពូលបន្ថែមទៀត ក្នុងនោះ ភូមិស្រែចង្ហូត១១០អំពូល ភូមិថ្នល់១០៧អំពូល ភូមិតានី២៣អំពូល ។
អត្ថបទ រូបភាព៖ ធន់ ពូថេ
