ដើម្បីលើកទឹកចិត្ដដល់កុមារ ក្នុងឱកាសអបអរសាទរខួបលើកទី៧៤ ទិវាកុមារអន្ដរជាតិ ១មិថុនា និងការព្យាបាលជំងឺកុមារដោយមិនគិតថ្លៃរបស់មន្ទីរពេទ្យកុមារអង្គរ នៅព្រឹកថ្ងៃទី១ ខែមិថុនា ឆ្នាំ២០២៣នេះ សាលាកុមារសុវណ្ណភូមិខេត្ដសៀមរាប រួមនឹងអាណាព្យាបាលសិស្ស បាននាំយកសម្ភារៈ និងថវិកាមួយចំនួនជួយឧបត្ថម្ភដល់មន្ទីរពេទ្យកុមារអង្គរ។
កញ្ញា យក់ សុគីម នាយិកាសាលារៀនកុមារសុវណ្ណភូមិ ខេត្ដសៀមរាប បានបញ្ជាក់ថា អំណោយជាសម្ភារៈសិក្សាដែលនាំយកមកប្រគល់ជូននាពេលនេះ ទទួលបានពីសាលារៀនសុវណ្ណភូមិ ហើយថវិកាមួយចំនួនជាមូលនិធិសាលាដែលជាការបរិច្ចាកពីសប្បុរសជនដែលជាអណាព្យាបាលសិស្ស។ កញ្ញាបន្ដថា សម្រាប់មូលិនិធិរបស់សាលាកុមារសុវណ្ណភូមិនេះ ជាលើកទីមួយ ប៉ុន្ដែសកម្មភាពជួយឧបត្ថម្ភថវិកាដល់មន្ទីរពេទ្យកុមារអង្គរ ជាច្រើនលើកមកហើយ ព្រោះមន្ទីរពេទ្យនេះ បានព្យាបាលកុមារដោយមិនគិតថ្លៃរយៈពេលជាច្រើនឆ្នាំមកហើយ ហើយមន្ទីរពេទ្យនេះត្រូវការជំនួយពីសប្បុរសជនដើម្បីបន្ដបេសកម្មព្យាបាលកុមារទៅថ្ងៃអនាគតទៀត។
អ្នកនាង ពិន អមរ៉ា តំណាងឱ្យមន្ទីរពេទ្យកុមារអង្គរ បានថ្លែងអំណរគុណចំពោះ សប្បុរជនដែលបានគិតគូរឧបត្ថម្ភជាបន្តបន្ទាប់ ដល់មន្ទីរពេទ្យកុមារអង្គរ ដែលនេះជាការលើកទឹកចិត្តដ៏ថ្លៃថ្លា ក្នុងការបន្តបេសកកម្មរបស់ក្រុមគ្រូពេទ្យ ក្នុងការព្យាបាលកុមារនៅកម្ពុជា។ មន្ទីរពេទ្យកុមារអង្គរ បានអំពាវនាវដល់សប្បុរសជនទាំងអស់ សូមបន្តឧបត្ថម្ភគាំទ្រដល់មន្ទីរពេទ្យកុមារអង្គរ ដើម្បីបន្តជួយសង្គ្រោះដល់កុមារ-ទារកនៅកម្ពុជាយើងបានកាន់តែច្រើនជាងមុន។មន្ទីរពេទ្យកុមារអង្គរ ជាមន្ទីរពេទ្យដែលព្យាបាលជំងឺកុមារ យកចិត្តទុកដាក់បំផុត ប្រកបដោយវិជ្ជាជីវៈ និងក្រមសីលធម៌ខ្ពស់ ហើយការព្យាបាល គឺមិនយកថវិកាទេតាំងពីឆ្នាំ១៩៩៩មកម្ល៉េះ ដើម្បីរួមចំណែកជួយទ្រទ្រង់កិច្ចដំណើរការរបស់មន្ទីរពេទ្យកុមារបេះដូងមនុស្សធម៌មួយនេះ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
