មន្ត្រីជាន់ខ្ពស់ក្រសួងបរិស្ថានបានឲ្យដឹងថា ចាប់តាំងពីមានយុទ្ធនាករអន្ទាក់សូន្យ មានភោជនីយដ្ឋានជាច្រើនបានប្រកាសចូលរួម ដោយពួកគេមិនជួញដូរ ឬធ្វើម្ហូបអំពីសាច់សត្វព្រៃដើម្បីលក់ជូនអតិថិជនឡើយ ហើយជាមួយគ្នានោះយ៉ាងហោចណាស់ ក៏មានភោជនីយដ្ឋានចំនួន១០ នៅក្នុងខេត្តសៀមរាប បានប្តេជ្ញាមិនលក់សាច់សត្វព្រៃ។
ថ្លែងក្នុងសន្និសីទសារព័ត៌មាន ស្តីពីយុទ្ធនាការអន្ទាក់សូន្យ ដំណាក់កាលទី២ នៅមន្ទីរបរិស្ថានខេត្តសៀមរាប កាលពីរសៀលថ្ងៃទី១ ខែមិថុនា ឆ្នាំ២០២៣ រដ្ឋលេខាធិការក្រសួងបរិស្ថាន ឯកឧត្តម នេត្រ ភក្ត្រា បានឲ្យដឹងទៀតថា ការចូលរួមពីសំណាក់ ម្ចាស់ភោជនីយដ្ឋាន គឺជាផ្នែកមួយយ៉ាងសំខាន់ ក្នុងការទប់ស្កាត់ ការសម្លាប់សត្វព្រៃ ក៏ដូចជាការចូលរួមកាត់បន្ថយដាក់អន្ទាក់ក្នុងតំបន់ធម្មជាតិ។ ហើយក្នុងនោះការចូលរួមពីសំណាក់បងប្អូនប្រជាពលរដ្ឋ គឺជាចលករមួយយ៉ាងសំខាន់ក្នុងការអភិរក្សសត្វព្រៃឱ្យបានគង់វង្ស យូរអង្វែងតរៀងទៅ។ ចំពោះយុទ្ធនាការ “អន្ទាក់សូន្យ” នៅក្នុងតំបន់ការពារធម្មជាតិកម្ពុជា . ធនធានធម្មជាតិ នៅក្នុងតំបន់ការពារធម្មជាតិកម្ពុជាមានការកើនឡើង រួមគ្នាទប់ស្កាត់ការលក់ដូរសត្វព្រៃដើម្បីការពារការចម្លងជំងឺបញ្ឈប់តម្រូវការសាច់សត្វព្រៃ និងផលិតផលសត្វព្រៃតាមរយៈការលើកកម្ពស់ការយល់ដឹងអំពីបរិស្ថាន ពង្រឹងការអនុវត្តច្បាប់ប្រឆាំងនឹងការដាក់អន្ទាក់សត្វព្រៃ។
បើតាមលោក ស៊ុន គង់ ប្រធានមន្ទីរបរិស្ថានខេត្តសៀមរាប បានបញ្ជាក់ថា ខេត្តសៀមរាប មានផ្ទៃដីប្រព័ន្ធតំបន់ការពារធម្មជាតិសរុបប្រមាណ ២៨១.៥៣០ហិចតា ដែលតំបន់ការពារធម្មជាតិ ហើយតាមការអង្កេត សិក្សាស្រាវជ្រាវ មានប្រភេទសត្វព្រៃនៅក្នុងតំបន់ការពារធម្មជាតិ ភូមិសាស្ត្រខេត្តសៀមរាប បាននឹងកំពុងថយចុះគួរឱ្យព្រួយបារម្ភ។ ក្នុងនោះប្រភេទសត្វព្រៃមួយចំនួនដូចជា៖ ទន្សោង, សត្វកែះ, ទោច, ខ្លាឃ្មុំ, ប្រើស, ពង្រូល និងសត្វស្លាប គឺកំពុងទទួលរងការគំរាមកំហែង និងបានចាត់ទុកជាប្រភេទសត្វកម្រ និងជិតផុតពូជក្នុងបញ្ជីក្រហម IUCN ។
លោក ឃឹម ហ្វីណង់ អភិបាលរងខេត្តសៀមរាប មានប្រសាសន៍ថា ការបរិភោគសាច់សត្វព្រៃ គឺជារឿងមួយមិនល្អសោះឡើយ ខណៈដែលខេត្តសៀមរាប ជាតំបន់ទេសចរណ៍ដ៏សំខាន់នៃប្រទេសកម្ពុជា។ ដូចនេះយើងត្រូវបញ្ចប់ការដាក់អន្ទាក់ និងបញ្ឈប់ការបរិភោគសាច់សត្វព្រៃ បើយើងមិនបានរឹតបន្តឹង ពាក់ព័ន្ធទៅនឹងការដាក់អន្ទាក់នោះទេ វាហាក់បីដូចជាមិនមានប្រសិទ្ធភាពក្នុងការអនុវត្តនោះឡើយ។ អ្នកពាក់ព័ន្ធទាំងអស់ត្រូវជំរុញយុទ្ធនាការនេះ ឱ្យមានប្រសិទ្ធភាព និងរួមគ្នាបំផុសចលនាឱ្យទទួលបានប្រសិទ្ធភាព កាន់តែប្រសើរនៅថ្ងៃខាងមុខ។
គួរជម្រាបផងដែរថា ខេត្តគោលដៅសម្រាប់យុទ្ធនាការអន្ទាក់សូន្យ ក្នុងដំណាក់កាលទី២ នេះរួមមាន៖ ខេត្តពោធិ៍សាត់, កំពង់ស្ពឺ, កោះកុង, សៀមរាប, បាត់ដំបង និងខេត្តប៉ៃលិន៕
អត្ថបទ និងរូបភាព៖ លោក ឈិត សាវី, ជា ស្រស់
កែសម្រួល អ៊ុន ណារាជ្យ
