ក្រុមយុវជនដែលបានមកទស្សនាការតាំងពិព័រណ៍ការងារ នៅក្នុងខេត្តសៀមរាប បានលើកឡើងថា ព្រឹត្តិការណ៍នេះ ពិតជាមានសារៈសំខាន់ណាស់ សម្រាប់ពួកគេក្នុងការស្វែងរកការងារធ្វើទៅតាមចំណេះជំនាញ និងសំណូមពរដល់រាជរដ្ឋាភិបាលកម្ពុជា រៀបចំឲ្យបានញឹកញាប់បន្ថែមទៀត។
ក្រុមយុវជន បានលើកឡើងថា គាត់មកទីនេះ ដើម្បីរកមើលថា តើមានការងារណាត្រូវជំនាញគាត់ដែរ ឬទេ។ យុវជនរូបនេះបន្តថា ការរៀបចំឲ្យមានពិព័រណ៍បែបនេះ ក៏ជាផ្នែកមួយសម្រាប់ផ្តល់ឱកាសដល់សិស្សនិស្សិតដែលកំពុងសិក្សា អាចស្វែងរកការងារធ្វើនៅក្រៅម៉ោង។ ពួកគាត់ក៏បានយល់ឃើញដូចគ្នានឹងយុវជនដទៃទៀតដែរ ថា ពិព័រណ៍ការងារនេះ ពិតជាមានសារសំខាន់សម្រាប់ពួកគេក្នុងការស្វែងរកការងារធ្វើ។ ពួកគេចង់ឃើញមានការរៀបចំបែបនេះបន្ថែមទៀត គឺរៀបចំកាន់ញឹកកាន់ល្អ។
គួរឲ្យដឹងថា រាជរដ្ឋាភិបាលកម្ពុជា តាមរយៈទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បាននាំយកឱកាសការងារសរុបប្រមាណ ១៥ពាន់កន្លែង ពីក្រុមហ៊ុនជាច្រើនក្នុងវិស័យសំខាន់ៗដូចជា៖ សេវាកម្ម ឧស្សាហកម្ម និងកសិកម្ម ជូនយុវជន សិស្ស/និស្សិត និងអ្នកស្វែងរកការងារ នៅក្នុងវេទិកាទស្សនកិច្ចការងារ ស្តីពីឱកាសការងារ និងការត្រៀមខ្លួនចូលទីផ្សារការងារ ក្នុងខេត្តគោលដៅចំនួន៤ មានខេត្តបាត់ដំបង សៀមរាប កំពង់ធំ និងកំពង់ចាម។ ដោយកម្មវិធី “វេទិកាទស្សនកិច្ចការងារ” នេះ បានចាប់ផ្តើមដំបូងក្នុងខេត្តបាត់ដំបង នាថ្ងៃពុធ ទី៣១ ខែឧសភា នេះ នៅក្នុងទីតាំងសាលមហោស្រពស្ទឹងសង្កែ បន្ទាប់មក នៅខេត្តសៀមរាប នៅថ្ងៃសុក្រ ទី០២ ខែមិថុនា នៅសាកលវិទ្យាល័យបៀលប្រាយ។ ចំណែកឯ ខេត្តកំពង់ធំ នឹងត្រូវរៀបចំនៅថ្ងៃអាទិត្យ ទី០៤ ខែមិថុនា នៅសាកលវិទ្យាល័យឯកទេសនៃកម្ពុជា និងចុងក្រោយនៅខេត្តកំពង់ចាម ថ្ងៃអង្គារ ទី០៦ ខែមិថុនា នៅអគារសហភាពសហព័ន្ធយុវជនកម្ពុជា។
គួរបញ្ជាក់ថា ការរៀបចំ “វេទិកាការងារ” និង “សិក្ខាសាលាអំពីការត្រៀមខ្លួនចូលទីផ្សារការងារ” នេះ គឺយន្តការនៃការផ្តល់សេវាការងារសាធារណៈរបស់រាជរដ្ឋាភិបាលកម្ពុជា តាមរយៈ NEA នៃក្រសួងការងារ និងបណ្តុះបណ្តាលវិជ្ជាជីវៈ ក្នុងការជួយស្វែងការងារធ្វើជូនដល់ប្រជាពលរដ្ឋ ហើយត្រូវបានរៀបចំឡើងជាប្រចាំដោយ NEA ដើម្បីជួយផ្គូរផ្គង និងផ្គត់ផ្គង់កម្លាំងពលកម្មទៅដល់ក្រុមហ៊ុន សហគ្រាស ដែលកំពុងត្រូវការបុគ្គលិកនិងកម្មករនិយោជិត៕
អត្ថបទ និងរូបភាព៖ លោក ជា ស្រស់
កែសម្រួល អ៊ុន ណារាជ្យ
