ពុទ្ធភាសិត និងបុរាណភាសិត និងពាក្យស្លោករាប់រយពាក្យ ត្រូវបានព្រះគ្រូចៅអធិការវត្តស្វាយរមៀត រៀបចំដាក់បង្ហាញនៅក្នុងបរិវេណវត្ត សម្រាប់ឱ្យយុវជន និងភ្ញៀវទេសចរបានឈ្វេងយល់ និងសិក្សារៀនសូត្រ ព្រោះពុទ្ធភាសិត បុរាណភាសិតទាំងនេះ បានអប់រំមនុស្សចេះដឹងសុខត្រូវ និងធ្វើតែអំពើល្អ។
ព្រះសច្ចានុបាល នឿម វុទ្ធី ព្រះគ្រូចៅអធិការវត្តស្វាយរមៀត ស្ថិតនៅភូមិបន្ទាយឈើ សង្កាត់ទឹកវិល ក្រុងសៀមរាប ខេត្តសៀមរាប មានសង្ឃដីកាឱ្យដឹងថា មូលហេតុដែលធ្វើឱ្យព្រះអង្គរៀបចំ បុរាណភាសិត ពុទ្ធភាសិត និងពាក្យស្លោក ដាក់បង្ហាញនៅក្នុងបរិវេណវត្តនេះ គឺដោយសារតែទីនេះជាវត្តអារាមមួយដែលមានវ័យចំណាស់ ដែលមានពុទ្ធបរិស័ទ និងភ្ញៀវទេសចរមកទស្សនា និងឈ្វេងយល់ពីព្រះពុទ្ធសាសនាច្រើន ដូចនេះហើយបានជាព្រះអង្គរៀបចំ បុរាណភាសិត ពុទ្ធភាសិត និងពាក្យស្លោក ដែលមានន័យក្នុងការអប់រំដាក់បង្ហាញដើម្បីឱ្យយុវជនកម្ពុជា ក៏ដូចជាភ្ញៀវទេសចរអន្តរជាតិបានឈ្វេងយល់ ព្រោះបុរាណភាសិត ពុទ្ធភាសិត និងពាក្យស្លោក មានទាំងអក្សខ្មែរ និងអង់គ្លេស។
ព្រះតេជគុណបានបន្តថា បច្ចុប្បន្នភ្ញៀវទេសចរអន្តរជាតិ ដែលបានទៅទស្សនាវត្តស្វាយរមៀត គឺមានការចាប់អារម្មណ៍ច្រើនទៅលើក បុរាណភាសិត ពុទ្ធភាសិត និងពាក្យស្លោក ដោយពួកគេបានលើកឡើងថា បុរាណភាសិត ពុទ្ធភាសិត និងពាក្យស្លោកទាំងនេះ មានន័យល្អៗក្នុងការអប់រំមនុស្ស។
លោក ខាន់ វ៉ាន់ឆាយ ជាអ្នករៀបចំបណ្តាញភ្ញៀវទេសចរណ៍សហគមន៍នៅខេត្តសៀមរាប បានលើកឡើងថា ការដាក់បង្ហាញ បុរាណភាសិត ពុទ្ធភាសិត របស់ព្រះសង្ឃនៅវត្តស្វាយរមៀតនេះ ពិតជាមានសារប្រយោជន៍យ៉ាងច្រើន ដូចជាការចូលរួមអភិរក្សភាសិតរបស់ខ្មែរ ការលើកកម្ពស់ភាសិតខ្មែរ និងបានបង្ហាញឱ្យអន្តរជាតិបានឈ្វេងយល់ និងផ្សព្វផ្សាយទៅកាន់ពិភពលោកកាន់តែទូលំទូលាយផងដែរ៕
អត្ថបទ និងរូបភាព៖ លោក ឃុត សៅ
កែសម្រួល អ៊ុន ណារាជ្យ
