ក្រុមសប្បុរសជនមកពីប្រទេសកូរ៉េខាងត្បូង តាមរយៈអង្គការមិត្ដកម្ពុជា បានចូលរួមជួយសាងសង់ផ្ទះជាង២៦០ខ្នងផ្ទះ ជូនប្រជាពលរដ្ឋខ្មែរនៅតាមជនបទ នៃស្រុកបន្ទាយស្រី ខេត្ដសៀមរាប ដើម្បីជួយសម្រួលដល់ជីវភាពរបស់ពួកគាត់ ជាពិសេសដើម្បីឱ្យចំណងមិត្ដភាពប្រទេសទាំងពីរ ឱ្យកាន់តែរឹងមាំថែមទៀត។
លោក សាត មាស តំណាងឱ្យអង្គការមិត្ដកម្ពុជា ដឹកនាំក្រុមសប្បុរសជន បានឱ្យដឹងនៅថ្ងៃទី០២ខែមិថុនាឆ្នាំ២០២៣នេះថា ក្រុមសប្បុរសជនប្រទេសកូរ៉េនេះ គឺជាអ្នកស្ម័គ្រចិត្ដជួយរកមូលនិធិនៅក្នុងប្រទេសរបស់ពួកគាត់ យកទៅជួយសាងសង់ផ្ទះជូនប្រជាពលរដ្ឋដោយផ្ទាល់ មានជីវភាពខ្វះខាត ទើបរៀបការបែកចេញពីគ្រួសារឪពុកម្ដាយរបស់ពួកគេ ដែលលំនៅឋាននីមួយៗមានទំហំ៥ម៉ែត្រ គុណនឹង៤ម៉ែត្រ ធ្វើពីឈើប្រក់សង្កសី។
លោកបន្ដថា ផ្ទះទាំងនោះ បើទោះមានទំហំតូចក្ដី ប៉ុន្ដែជាទឹកចិត្ដអាណិតស្រលាញ់ចំពោះប្រជាពលរដ្ឋខ្មែរសម្រាប់ឱ្យពួកគាត់មានទីជម្រកមួយសមរម្យ ពិសេស ក្រុមសប្បុរសជនកូរ៉េ មិនត្រឹមបានជួយសាងសង់ផ្ទះជូនប្រជាពលរដ្ឋខ្មែរប៉ុណ្ណោះទេ ថែមទាំងបានជួយអភិវឌ្ឍន៍លើវិស័យអប់រំ ដូចជា កសាងអគារសិក្សា ធ្វើអណ្ដូងទឹក ខ្លោងទា្វរ និងរបងសាលា រោងបាយសម្រាប់សាលារៀន កន្លែងកំសាន្តសម្រាប់កុមារជាដើម។
លោក វូ តែហាន ( Woo Taehan)តំណាងឱ្យក្រុមសប្បុរសធម៌ស្ម័គ្រចិត្ដប្រទេសកូរ៉េ មានប្រសាសន៍ថា ការជួយសាងសង់ផ្ទះជូនប្រជាពលរដ្ឋខ្មែរនេះ ដោយមើលឃើញប្រជាពលរដ្ឋកម្ពុជាធ្លាប់បានជួយប្រទេសកូរ៉េនាមពេលកន្លងមក ជាពិសេសក្រុមការងារស្ម័គ្រចិត្ដប្រជាជនកូរ៉េ ស្រឡាញ់ប្រជាជនខ្មែរ ស្រឡាញ់វប្បធម៌អរិយធម៌របស់ខ្មែរ និងដើម្បីឱ្យប្រទេសទាំងពីរមានមិត្ដភាពប្រាស្រ័យទាក់ទងគ្នាយូរអង្វែង។ លោកបន្ដទៀតថា ក្រុមរបស់លោកសប្បាយរីករាយនៅពេលបានជួយកសាងផ្ទះជូនប្រជាពលរដ្ឋខ្មែរ ហើយបន្ដរកមូលនិធិពីកូរ៉េជួយដល់ប្រជាពលរដ្ឋខ្មែរបន្ថែមទៀត ព្រមទាំងសន្យាថាយកវប្បធម៌ខ្មែរទៅផ្សព្វផ្សាយនៅប្រទេសរបស់ពួកគាត់។
របាយការណ៍អង្គការមិត្តកម្ពុជា បានបង្ហាញថា ចាប់តាំងពីបង្កើតអង្គការរហូតមកដល់ពេលបច្ចុប្បន្ន អង្គការមិត្តកម្ពុជារួមទាំងម្ចាស់ជំនួយមកពីសាធារណរដ្ឋកូរ៉េ បានចុះមកជួយសាងសង់បានសមិទ្ធផលជាច្រើន ដូចជា ៖ សាងសង់អគារសិក្សាចំនួន ៥ ខ្នង ទីចាត់ការ បណ្ណាល័យ បន្ទប់ទឹក ខ្លោងទា្វរ របងសាលា រោងបាយសម្រាប់សាលារៀន កន្លែងកំសាន្តសម្រាប់កុមារ អណ្តូងទឹកស្អាតចំនួន ៧២៤ អណ្តូង សាងសង់ផ្ទះចំនួន ២៦៤ខ្នង និងសមិទ្ធផលជាច្រើនទៀត បើគិតជាថវិកាប្រហែល ១លាន៥សែនដុល្លារអាមេរិក៕
អត្ថបទ និងរូបភាព៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
