នៅព្រឹកថ្ងៃទី២ ខែមិថុនា ឆ្នាំ២០២៣នេះ ក្រសួងបរិស្ថាន សហការជាមួយរដ្ឋបាលខេត្តសៀមរាប រួមនឹងស្ថាប័នពាក់ព័ន្ធ បានចូលរួមក្នុងយុទ្ឋនាការអន្ទាក់សូន្យដំណាក់កាលទី២ ក្នុងខេត្តសៀមរាប ក្នុងគោលបំណងដើម្បីលុបបំបាត់អន្ទាក់គ្រប់ប្រភេទនៅក្នុងព្រៃនៃប្រទេសកម្ពុជា បញ្ឈប់ការដាក់អន្ទាក់ ការបរបាញ់ ការជួញដូរ និងការបរិភោគសត្វព្រៃគ្រប់ប្រភេទ រួមគ្នាអភិរក្ស និងថែទាំធនធានធម្មជាតិប្រកបដោយនិរន្តរភាព។
លោក ស៊ុន គង់ ប្រធានមន្ទីរបរិស្ថានខេត្តសៀមរាប មានប្រសាសន៍ថា ចំពោះការគ្រប់គ្រង ថែរក្សា អភិរក្សធនធានធនធម្មជាតិ ជីវៈចម្រុះ និងការបង្ការ ការទប់ស្កាត់ និងការបង្ក្រាបបទល្មើសធនធានធម្មជាតិ រួមទាំងបទល្មើសបរបាញ់ និងការដាក់អន្ទាក់ចាប់សត្វព្រៃ នៅក្នុងតំបន់ការពារធម្មជាតិ មន្ទីរបរិស្ថាន ដែលមានមន្ត្រីនិងមន្ត្រីឧទ្យានុរក្ស បានអនុវត្តការងារជាប្រចាំ។ កិច្ចការនេះដោយមានការសហការល្អជាមួយគណៈបញ្ជាការឯកភាពខេត្ត អយ្យការអមសាលាដំបូងខេត្ត អង្គភាពពាក់ព័ន្ធ អាជ្ញាធរ ក្រុង ស្រុក ឃុំសង្កាត់ ប្រជាសហគមន៍ និងអង្គការដៃគូក្នុងការទប់ស្កាត់បទល្មើសធនធានធម្មជាតិ ជាពិសេសការបរបាញ់ និងការដាក់អន្ទាក់ចាប់សត្វព្រៃ។
លោកប្រធានមន្ទីរបន្តថា សម្រាប់អាជ្ញាធរមូលដ្ឋានបានដើរតួយ៉ាងសំខាន់ក្នុងការជួយអប់រំផ្សព្វផ្សាយដល់ប្រជាពលរដ្ឋ ស្តីពីសារៈសំខាន់ធនធានធម្មជាតិ ជីវចម្រុះ និងតម្លៃនៃការអភិរក្សសត្វព្រៃ។ ហើយតាមការអង្កេត សិក្សាស្រាវជ្រាវ មានប្រភេទសត្វព្រៃនៅក្នុងតំបន់ការពារធម្មជាតិភូមិសាស្រ្តខេត្តសៀមរាប បាននឹងកំពុងថយចុះគួរឱ្យព្រួយបារម្មណ៍។ ប្រភេទសត្វព្រៃមួយចំនួនដូចជា ទន្សោង តេះ ទោច ខ្លាឃ្មុំ ពង្រូល ប្រើស អណ្តើក និងប្រភេទសត្វស្លាបនៅតំបន់ប្រើប្រាស់ច្រើនយ៉ាងបឹងទន្លសាប បាននឹងកំពុងទទួលរងការគំរាមកំហែង និងបានចាត់ទុកជាប្រភេទសត្វកម្រនិងជិតផុតពូជក្នុងបញ្ចីក្រហម IUCN។
ឯកឧត្តម នេត្រ ភត្រ្តា រដ្ឋលេខាធិការក្រសួងបរិស្ថាន មានប្រសាសន៍ថា យុទ្ធនាការអន្ទាក់សូន្យដំណាក់កាលទី២នៅខេត្តសៀមរាបនេះ គឺដើម្បីផ្លាស់ប្តូរនូវឥរិយាបទជារួមរបស់ប្រជាពលរដ្ឋក្នុងទូទាំងប្រទេស ដើម្បីឱ្យពួកគាត់បោះបង់ចោលនូវគំនិតថាហូបសាច់សត្វព្រៃនាំឱ្យមានសុខភាពល្អឬប្រើប្រាស់សំនាកឈាម និងឆ្អឹងដើម្បីព្យាបាលជំងឺ។ លើសពិនេះ ការរៀបចំយុទ្ឋនាការអន្ទាក់សូន្យក្នុងខេត្តសៀមរាបនេះព្រោះថា ខេត្តសៀមរាបជាប៉ូលទេសចរណ៍ដ៏សំខាន់របស់ជាតិ តាមរយៈយុទ្ឋនាការនេះ គឺចង់បង្ហាញដល់ភ្ញៀវទេសចរណ៍ជាតិ និងអន្តរជាតិ បានដឹងថាខេត្តបានមានវិធានការក្នុងការទប់ស្កាត់ការជួញដូរសត្វព្រៃគ្រប់ប្រភេទ និងជាសារមួយប្រាប់ពួកគាត់ថាយើងបានរួមគ្នាក្នុងការផ្តល់សុវត្ថិភាពទៅឱ្យសត្វព្រៃ បញ្ឈប់ឱ្យមានការដាក់អន្ទាក់ បរបាញ់ និងមិនបរិភោគសាច់សត្វព្រៃនោះឡើយ។
ឯកឧត្តម នេត្រ ភក្ត្រា បានមានប្រសាសន៍ទៀតថា ការបរិភោគសាច់សត្វព្រៃ គឺផ្តល់ហានិភ័យខ្ពស់ណាស់ដល់សុខភាពព្រោះវាសម្បូរដោយមេរោគដែលមិនអាចមើលឃើញដោយភ្នែកទទេរបានទេ ហើយសាច់សត្វព្រៃក៏មិនអាចព្យាបាលជម្ងឺនានាបានដែរ។ យុទ្ឋនាការនេះដែរមានគោលបំណងចម្បងសំខាន់ៗក្នុងការការពារធនាធានធម្មជាតិនៅក្នុងតំបន់ការពារធម្មជាតិឱ្យមានការកើនឡើង។ ទប់ស្កាត់ការលក់ដូរសត្វព្រៃ ដើម្បីការពារពីការចម្លងជំងឺផ្សេងៗ។ បញ្ឍប់តម្រូវការសាច់សត្វព្រៃ និងផលិតផលសត្វព្រៃតាមរយៈការលើកម្ពស់ការយល់ដឹងអំពីសារៈសំខាន់សត្វព្រៃ និងបរិស្ថាន។ អន្ទាក់ គឺជាឃាតករលាក់មុខដែលបាននឹងកំពុងគំរាមកំហែងសត្វព្រៃ និងជីវៈចម្រុះ និងចូលរួមចំណែកទប់ស្កាត់ហានិភ័យនានាដែលអាចមានផលប៉ះពាល់លើសុខភាពសាធារណៈកើតចេញពីការទំនាក់ទងផ្ទាល់ជាមួយសត្វព្រៃ៕
អត្ថបទ និងរូបភាព៖ លោក យូ វង្ស
កែសម្រួល អ៊ុន ណារាជ្យ
