លោកវរៈសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា មនុស្សម្នាក់បានស្លាប់ និង ៤នាក់ទៀតបានរងរបួស និងសត្វគោ៤ក្បាលបានងាប់ ដោយសារគ្រោះធម្មជាតិ រន្ទះបាញ់ ៣ករណី ដែលបានកើតឡើងនៅឃុំមុខប៉ែន និង ឃុំសសរស្ដម្ភ ស្រុកពួក ខេត្តសៀមរាប កាលពីវេលាម៉ោង១៥ និង ៣០នាទី ថ្ងៃទី៤ ខែមិថុនា ឆ្នាំ២០២៣។
លោកវរៈសេនីយ៍ឯក បានបញ្ជាក់ទៀតថា ករណីទី១ បានកើតឡើងនៅចំណុចវាលស្រែរំដេញ ខាងត្បូងភូមិចម្ងាយប្រហែល ១ពាន់ម៉ែត្រ ស្ថិតនៅភូមិត្រកៀត ឃុំមុខប៉ែន ដែលបណ្ដាលឲ្យរងរបួសមនុស្ស ៤នាក់ និងស្លាប់ម្នាក់ ខណ:ពេលពួកគាត់កំពុងភ្ជួរស្រែ និងព្រោះស្រូវ។ ចំពោះករណីទី២ នៅចំណុចវាលស្រែទំនប់៧៨ ស្ថិតក្នុងភូមិមុខប៉ែន ឃុំមុខប៉ែន បណ្ដាលឲ្យងាប់សត្វគោ ៣ក្បាលដែលបានចងនៅវាលស្រែ និងករណីទី៣ នៅចំណុចវាលស្រែថ្នល់ចាស់ ខាងត្បូងភូមិចម្ងាយប្រហែល ៥០០ម៉ែត្រ ស្ថិតក្នុង ភូមិគោកត្លាត ឃុំសសរស្ដម្ភ ស្រុកពួក ខេត្តសៀមរាប បណ្ដាលឲ្យងាប់សត្វគោ ១ក្បាល ខណ:ពេលម្ចាស់ចងនៅវាលស្រែ ហើយម្ចាស់ជ្រកភ្លៀងឆ្ងាយពីសត្វគោ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួលអត្ថបទ ៖ លោក អ៊ុន ណារាជ្យ
