គម្រោងសាងសង់ផ្លូវបេតុងអាមេចំនួនមួយខ្សែ ប្រវែង១៥០ម៉ែត្រ ក្នុងឃុំដូនកែវ ស្រុកពួក ខេត្តសៀមរាប ដែលជាគម្រោងមូលនិធិឃុំសង្កាត់ឆ្នាំ២០២៣ ត្រូវបានប្រកាសបញ្ចប់ការដេញថ្លៃជាស្ថាពរ នៅថ្ងៃទី៥ ខែមិថុនា ឆ្នាំ២០២៣ ដោយក្នុងនោះមានការចូលរួមពីមន្ត្រីបច្ចេកទេសសាលាខេត្តសៀមរាប មន្ត្រីបច្ចេកទេសស្រុក គណៈកម្មការលទ្ធកម្មឃុំ និងក្រុមហ៊ុនម៉ៅការផងដែរ។
លោកស្រី ជា សំនៀង ប្រធានគណៈកម្មការលទ្ធកម្មឃុំដូនកែវ បានឲ្យដឹងថា គណៈកម្មការលទ្ធកម្មឃុំ បានដាក់ឲ្យដេញថ្លៃគម្រោងសាងសង់ផ្លូវបេតុងអាមេចំនួនមួយខ្សែ មានប្រវែង១៥០ម៉ែត្រ ទទឹង៥ម៉ែត្រ កម្រាស់បេតុង០.១៥ម៉ែត្រ ស្លាកសញ្ញាគម្រោងចំនួន១ លូមុខកាត់ 0.៨ម៉ែត្រ ចំនួន២កង់ សម្រាប់ដាក់ការពារឡានធំ និងថែទាំរយះពេល៦ខែ ក្រោយបញ្ចប់គម្រោង ក្នុងតម្លៃប៉ានស្មាន ១០៣.៦៦៥.០២៨ រៀល។ គម្រោងនេះទទួលបានសំណើរដេញថ្លៃចំនួន ៦ក្រុមហ៊ុន។ ជាលទ្ធផលបានទៅលើក្រុមហ៊ុន រស់ ចំរើន ក្នុងតម្លៃទាបទី១ ក្នុងចំនួនទឹកប្រាក់ ៦៧.៧៣០.០០០ រៀល។
ជាមួយគ្នានោះ ក្រុមហ៊ុន រស់ ចំរើន ដែលទទួលបានការទទួលម៉ៅការនៅក្នុងគម្រោងសាងសង់ផ្លូវមេតុងអាមេ ដែលស្ថិតនៅក្នុងឃុំដូនកែ បានធ្វើការប្ដេជ្ញាចិត្ត ដោយសន្យាថា នឹងធ្វើឲ្យបានត្រឹមត្រូវទៅតាមគំនូប្លង់បច្ចេកទេស ស្របតាមបទដ្ឋានគតិយុទ្ធនៃការសាងសង់ និងគោរពតាមលក្ខណ្ឌដូចមានចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួលអត្ថបទ ៖ លោក អ៊ុន ណារាជ្យ
