នៅថ្ងៃទី០៥ ខែមិថុនា ឆ្នាំ២០២៣នេះ ឯកឧត្តម បណ្ឌិត ធឹម សំផូត ទីប្រឹក្សាក្រសួងព័ត៌មាន បានអញ្ជើញសម្ពោធដាក់ឲ្យប្រើប្រាស់សាលាឆទានមួយខ្នង ស្ថិតក្នុងភូមិរវៀង ឃុំស្រណាល ស្រុកក្រឡាញ់ ខេត្តសៀមរាប ដោយមានការចូលរួមពីសំណាក់អាជ្ញាធរមូលដ្ឋាន ប្រជាពលរដ្ឋ លោកគ្រូអ្នកគ្រូ និងសិស្សានុសិស្សជាច្រើនរូប។
លោក ធីញ ថាន អភិបាលរងស្រុកក្រឡាញ់ បានឲ្យដឹងថា សាលាឆទាននៅភូមិរវៀង ដែលសម្ពោធនាពេលនេះ គឺដោយសារមានការស្រុះស្រួលគ្នាពីសំណាក់លោកមេភូមិ និងបងប្អូនប្រជាពលរដ្ឋដែលរស់នៅក្នុងភូមិរវៀង សម្រេចកាត់ឆ្កៀលដីក្នុងភូមិដែលមានទំហំ ៩ម៉ែត្រ គុណនឹង ៨ម៉ែត្រ ត្រង់ចំណុចខ្ទមអ្នកតា តាថាន់ តាដំបងដែក ហនុមាន តាមហាជម្ពូ យាយសក់ក្រអូប យាយចំប៉ីសក់ស និងរូបចន្ទតារារស្មី ដោយការដឹងគុណថា លោកតែងតែតាមជួយថែរក្សាបងប្អូនប្រជាពលរដ្ឋ ឱ្យបានសេចក្ដីសុខចម្រើនតរៀងមកដល់សម័យបច្ចុប្បន្ន។ ការកសាងសាលាឆទាននេះដែរ ក៏ដើម្បីទុកជាទីកន្លែងធ្វើពិធីបុណ្យផ្សេងៗតាមគន្លងប្រពៃណីព្រះពុទ្ធសាសនាសម្រាប់បងប្អូនក្នុងពេលបច្ចុប្បន្ន និងទៅអនាគតទៀតផង។
មានប្រសាសន៍ក្នុងឱកាសនោះ ឯកឧត្តម បណ្ឌិត ធឹម សំផូត បានថ្លែងការកោតសសើរពីទឹកចិត្តរបស់អាជ្ញាធរភូមិឃុំ និងប្រជាពលរដ្ឋទាំងអស់ ដែលបានស្រុះស្រួលមូលមតិគ្នាជាឯកច្ឆ័នម្រេចកាត់ឆ្កៀលដីក្នុងភូមិ ដើម្បីសាងសងនៅសាលាឆទាននេះឡើង សម្រាប់បងប្អូនប្រជាពលរដ្ឋក្នុងភូមិបានធ្វើបុណ្យទានទៅតាមទំនៀមទំលាប់ប្រពៃណីសាសនាផង និងជាទីកន្លែងសម្រាប់ទីសការ:បូជារបស់បងប្អូនផង។ ចំពោះសមិទ្ធិផលថ្មីដែរទើបកើតមាននេះ អាចកើតមានឡើងបានក៏ដោយសារប្រទេសកម្ពុជាយើងមានសុខសន្តិភាព ក្រោមការដឹកនាំដោយសម្តេចតេជោ ហើយបើគ្មានសន្តិភាពទេ ក៏គ្មានថ្ងៃនេះដែរ។
គួរបញ្ជាក់ថា ក្នុងពិធីនេះ ក្រុមការងារចុះជួយស្រុកក្រឡាញ់ ក៏បាននាំយកនូវអំណោយមួយចំនួនដូចជា សារ៉ុង ក្រម៉ា ក្រណាត់ស ប៊ិច សៀវភៅ រួមនឹងថវិកាមួយចំនួន ប្រគេន និងចែកជូនដល់ព្រះសង្ឃ បងប្អូនប្រជាពលរដ្ឋ លោកយាយលោកតា លោកគ្រូអ្នកគ្រូ ប្រជាកាពារភូមិ រួមនឹងសិក្សានុសិស្សដែលបានចូលរួមក្នុងពិធីនោះផងដែរ៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
