នៅរសៀលថ្ងៃទី០៦ ខែមិថុនា ឆ្នាំ២០២៣នេះ ព្រះគ្រូវិចិត្រវង្សា ញាតិធម្មោ ហែម គឹមសាន ព្រះចៅអធិការវត្តប្រាសាទគោកចក សង្កាត់គោកចក ក្រុង/ខេត្តសៀមរាប បាននិមន្តចូលរួមព្រះរាជាគណកិត្តិយស ព្រះគ្រូព្រះចៅអធិការវត្តនានា ដែលដឹកនាំដោយព្រះបវរវិជ្ជា ទេព ភឿន ព្រះរាជាគណកិត្តិយស ព្រះវិន័យគណខេត្តសៀមរាប ជាព្រះគ្រូសារធម្មបាលអនុគណស្រុកជីក្រែង និងជាព្រះចៅអធិការវត្តបុព្វទិសារាម(វត្តកំពង់ក្តី) បាននិមន្តសួរសុខទុក្ខ និងនាំយកនូវគ្រឿងឧបភោគបរិភោគ និងថវិកាប្រគល់ជូនដល់អតីតអ្នកប្រដាល់ជើងខ្លាំងតាំងពីទសវត្សរ៍១៩៩០លោក ក្រាក់ សម្ផស្ស ដែលសព្វថ្ងៃលោកកំពុងតែបើកក្លឹបបង្ហាត់ប្រដាល់ក្បាច់គុនខ្មែរ ដែលស្ថិតនៅភូមិទួលគ្រួស ឃុំទួលគ្រួស ស្រុកបន្ទាយស្រី ខេត្តសៀមរាប ដោយមានកូនសិស្សចំនួនប្រមាណជាង ៣០នាក់។ ព្រះគ្រូវិចិត្រវង្សា ញាតិធម្មោ ហែម គឹមសាន ព្រះគ្រូចៅអធិការវត្តប្រាសាទគោកចក បានមានសង្ឍដីកាអោយដឹងថា ព្រះអង្គ មានការគាំទ្រ និងមានទឹកព្រះទ័យរីករាយ ដើម្បីចូលរួមថែរក្សាប្រដាល់គុនខ្មែរ ដែលជាមរតកដ៏មានតម្លៃរបស់ជាតិទាំងមូល និងដើម្បីលើកកម្ពស់ប្រដាល់គុនខ្មែរលើឆាកអន្តរជាតិផងនោះ ហើយព្រមទាំងបានមើលឃើញអំពីជីវភាពរបស់អតីតអ្នកប្រដាល់ ក្រាក់ សម្ភស្ស ដែលល្បីល្បាញខាងទម្ងន់ជើងផ្តាច់ព្រលឹងមានជីវភាពរស់នៅលំបាកហើយបានយកចិត្តទុកដាក់ខ្ពស់លើកស្ទួយវិស័យកីឡាប្រដាល់ក្បាច់គុណខ្មែរ ដោយរូបលោកកំពុងតែបើកក្លឹបប្រដាល់ ដើម្បីបង្ហាត់ និងបណ្តុះបណ្តាលយុវជន ដែលស្រឡាញ់ និងចូលរួមថែរក្សាប្រដាល់គុនខ្មែរ ដែលជាមរតកដ៏មានតម្លៃរបស់ជាតិ ។ ព្រះគ្រូចៅអធិការវត្តប្រាសាទគោក បានមានសង្ឃដីកាអោយដឹងបន្ថែមទៀតថា ការនិមន្តនាំយកគ្រឿងឧបភោគបរិភោគ និងថវិកាមកជូនដល់លោក ក្រាក់ សម្ភស្ស នាពេលនេះគឺបានមកពីការប្រគេនរបស់ពុទ្ធបរិស័ទ ក្នុងពិធីបុណ្យផ្សេងៗនាពេលកន្លងមក ហើយក៏បានសន្សំ និងប្រមូលបម្រុងទុកសម្រាប់ចែកជូនដល់គ្រួសារបងប្អូនប្រជាពលរដ្ឋណា ដែលមានជីវភាពខ្វះខាត ឬក៏មានការជួបការលំបាក ជួបហានិភ័យគ្រោះថ្នាក់ដោយប្រការផ្សេងៗណាមួយផងដែរ។ ក្នុងឱកាសនោះដែរព្រះគ្រូវិចិត្រវង្សាញាតិធម្មោ ហែម គឹមសាន ក៏បានមានសង្ឃដីកាសំណូមពរឱ្យយុវជននានាចូលរួមហ្វឹកហាត់ឱ្យបានច្រើនកុះករ ដើម្បីសុខភាពផង ថែរក្សាកេរមរតកខ្មែរផង និងដើម្បីធ្វលឲ្យជីវភាពយើងល្អប្រសើរផងដែរ។ ម្យ៉ាងទៀតរួមចំណែកលើកស្ទួយវិស័យកីឡាប្រដាល់គុនខ្មែរឱ្យកាន់តែរីកចម្រើនបន្ថែមតទៅថ្ងៃអនាគត។ គ្រឿងឧបភោគបរិភោគ ដែលព្រះគ្រូចៅអធិការវត្តនានាក្នុងខេត្ត យកទៅជូនលោក ក្រាក់ សម្ផស្ស នាពេលនោះមានដូចជា៖ អង្ករចំនួន ៣០០គីឡូក្រាម, ទឹកត្រី ១កេសនិង១យួរ, អំបិល ៤គីឡូក្រាម, ត្រីខ ៥យួរ, ត្រីផ្អក ១ធុង ព្រមទាំងថវិកាចំនួន ៦០ដុល្លារ និង ១០០,០០០រៀល ផងដែរ៕
អត្ថបទ និងរូបភាព: លោកទ្រា ពន្លឺ កែសម្រួលដោយ លីវ សុខុន!!!