នៅថ្ងៃទី៧ ខែមិថុនា ឆ្នាំ២០២៣ នាសណ្ឋាគារប៉ាស៊ីហ្វិកខេត្តសៀមរាប អគ្គលេខាធិការដ្ឋានវេទិកាសម្ព័ន្ឋសង្គមស៊ីវិល បានរៀបចំពិធីប្រកាសទទួលស្គាល់សមាជិកដៃគូសហប្រតិបត្តិការរបស់វេទិកាសម្ព័ន្ឋសង្គមស៊ីវិលប្រចាំខេត្តសៀមរាប ដើម្បីជាការរឹតចំនងមិត្តភាពសាមគ្គីភាពសំដៅពង្រឹងកិច្ចសហប្រតិបត្តការកាន់តែជិតស្និទ្ឋរវាងវេទិកាសម្ព័ន្ឋសង្គមស៊ីវិលជាមួយអង្គការសង្គមស៊ីវិល សមាគម សហគមន៍នានាដែលកំពុងមានសកម្មភាពក្នុងខេត្តសៀមរាប។
មានប្រសាសន៍ក្នុងឱកាសនោះ ឯកឧត្តម កឹមរ័ត្ន វិសិដ្ឋ ប្រធានក្រុមប្រឹក្សាភិបាលវេទិកាសម្ព័ន្ឋសង្គមស៊ីវិល (វ.ស.ស) បានថ្លែងថា សង្គមស៊ីវិលជាសសរស្តម្ភដ៏សំខាន់មួយដែលទ្រទ្រង់ឱ្យការអភិវឌ្ឍសង្គមជាតិ ជាមួយនឹងការកំណត់គោលនយោបាយធំៗរបស់រាជរដ្ឋាភិបាលសម្រាប់តម្រង់ទិសដឹកនាំប្រទេសទៅមុខដែលទាមទារឱ្យមានការចូលរួមជាចាំបាច់របស់អង្គការសង្គមស៊ីវិល។ ក្នុងនោះរាជរដ្ឋាភិបាលតែងតែផ្តល់សារៈសំខាន់ខ្ពស់ចំពោះតួនាទីនិងការចូលរួមចំណែករបស់អង្គការសង្គមស៊ីវិល ដែលបានបំពេញការងារយ៉ាងសកម្ម ជាមួយគ្រប់ភាគីពាក់ព័ន្ធនិងរាជរដ្ឋាភិបាល ដើម្បីលើកកម្ពស់សុខុមាលភាពប្រជាពលរដ្ឋ និងជំរុញការអភិវឌ្ឍសេដ្ឋកិច្ច សង្គមកិច្ចឲ្យមានការរីកចម្រើនប្រកបដោយចីរភាព។
ឯកឧត្តម បានវាយតម្លៃខ្ពស់ចំពោះការចូលរួមចំណែករបស់ អង្គការសង្គមស៊ីវិលក្នុងខេត្តសៀមរាប ដែលបានសហការល្អជាមួយអាជ្ញាធរថ្នាក់ក្រោមជាតិ និងខិតខំបំពេញការងាររបស់ខ្លួននាពេលកន្លងមក សម្រេចបានលទ្ធផលគួរជាទីមោទនៈ។ ដូច្នេះសូមបន្តកិច្ចសហការឱ្យកាន់តែជិតស្និទ្ធថែមទៀតជាមួយ រាជរដ្ឋាភិបាល ជាពិសេសអាជ្ញាធរមូលដ្ឋាន ដើម្បីកាត់បន្ថយការយល់ច្រឡំចំពោះគ្នា និងត្រូវពង្រឹងសាមគ្គីភាពផ្ទៃក្នុង ឈានទៅបង្កើតភាពជាដៃគូជាមួយគ្នាដោយឆន្ទៈស្មោះត្រង់ និងត្រូវចូលរួមគោរពអនុវត្តន៍ច្បាប់ជាធរមាន ដោយប្រកាន់ខ្ជាប់នូវអព្យាក្រឹតភាពក្នុង ការបំពេញការងាររបស់ខ្លួន មិនប្រកាន់និន្នាការនយោបាយ ដើម្បីចូលរួមបម្រើដល់ បុព្វហេតុជាតិ និងផលប្រយោជន៍ប្រជាពលរដ្ឋនៅថ្នាក់មូលដ្ឋាន ស្របតាមគោលនយោបាយ របស់រាជរដ្ឋាភិបាលកម្ពុជា។
គួរឲ្យដឹងថា វេទិកាសម្ព័ន្ឋសង្គមស៊ីវិល (វ.ស.ស) ក្នុងគោលបំណងសម្របសម្រួលការងារសង្គមស៊ីវិលដើម្បីសម្រេចឱ្យបាននូវសុដុមនីយកម្មសង្គមស៊ីវិលនៅកម្ពុជា។ ប្រមូលផ្តុំទស្សនៈ និងមតិយោបល់ពីសំនាក់ក្រុមបញ្ញាវ័ន្ត ក្រុមអ្នកស្រាវជ្រាវ បណ្ឌិតសភាចារ្យ និងសង្គមស៊ីវិលតាមរយៈការពិភាក្សា និងស្រាវជ្រាវតាមបែបវិទ្យាសាស្ត្រ។ លទ្ឋផលនៃកិច្ចពិភាក្សា និងស្រាវជ្រាវនឹងត្រូវត្រូវប្រើប្រាស់ជាធាតុចូលសម្រាប់ការរៀបចំនូវសំណើរគោលនយោបាយថ្មីៗដែលបំរើឱ្យផលប្រយោជន៍សាធារណៈតាមគោលការណ៍ស្ម័គ្រចិត្ត។ ជាមួយគ្នានេះ វ.ស.ស ជាស្ថាប័នដែលត្រូវបានរាជរដ្ឋាភិបាលប្រគល់តួនាទីឱ្យសម្របសម្រួលការងាររវាងរាជរដ្ឋាភិបាលនិងអង្គការសង្គមស៊ីវិល ដើម្បីសម្រេចឱ្យបាននូវសុខដុមនីយកម្មសង្គមស៊ីវិលនៅកម្ពុជា មានទិសដៅអនុវត្តនឹងបន្តចូលរួមចំណែកកសាងសុខដុមនីយកម្មសង្គម និងពង្រឹងតួនាទីអង្គការសង្គមស៊ីវិល ដើម្បីចូលរួមកាន់តែសកម្មជាមួយរាជរដ្ឋាភិបាលក្នុងការអភិវឌ្ឍសង្គមជាតិ នឹងបន្តកិច្ចសហការយ៉ាងជិតស្និទ្ឋជាមួយ ក្រសួង ស្ថាប័ន និងរដ្ឋបាលរាជធានី ខេត្តដើម្បីបន្តការលើកកម្ពស់សមត្ថភាពនិងការចូលរួមរបស់អង្គការសង្គមស៊ីវិលក្នុងការអភិវឌ្ឍមូលដ្ឋានសម្របតាមតម្រូវការជាក់ស្តែងរបស់ប្រជាពលរដ្ឋ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
