ប្រតិបត្តិករវិស័យទេសចរណ៍ក្នុងខេត្តសៀមរាប បានរំពឹងខ្ពស់ថា ផ្លូវល្បឿនលឿន ភ្នំពេញ-សៀមរាប-ប៉ោយប៉ែត នឹងផ្តល់នូវផ្លែផ្កាល្អដល់កម្ពុជា ជាពិសេសជំរុញដល់វិស័យទេសចរណ៍របស់ខេត្តសៀមរាប កាន់តែមានភាពរស់រវើកគ្រប់រដូវកាល។
ប្រធានសមាគមក្លិបទេសចរណ៍សៀមរាប លោក សែតកៅ ហ្វីលីព បានលើកឡើងនៅថ្ងៃទី៨ ខែមិថុនានេះថា គម្រោងផ្លូវល្បឿនលឿនទី៣ របស់កម្ពុជា ពីភ្នំពេញមកខេត្តសៀមរាប និងបន្តទៅក្រុងប៉ោយប៉ែត ខេត្តបន្ទាយមានជ័យ ជាដំណឹងមួយដ៏ល្អ ជាពិសេសអ្នកខេត្តសៀមរាប ព្រោះថាផ្លូវនេះ នឹងជំរុញឲ្យអ្នកទេសចរក្នុងស្រុកមកលេងខេត្តសៀមរាបច្រើន ដោយពួកគាត់បានចំណាយពេលធ្វើដំណើរក្នុងរយៈពេលខ្លី តែអាចស្នាក់នៅ និងដើរលេងកម្សាន្តបានយូរ។ ជាមួយគ្នានេះផ្លូវល្បឿនលឿននេះ ក៏ជាការជំរុញសកម្មភាពទេសចរតាមផ្លូវគោក ពីច្រកទ្វារអន្តរជាតិប៉ោយប៉ែត រវាងកម្ពុជា និងប្រទេសថៃ មានតម្លាភាព និងមានសកម្មភាពគ្រប់ពេលវេលា ជាពិសេសផ្លូវល្បឿនលឿន ក៏ជួយកាត់បន្ថយគ្រោះថ្នាក់ចរាចរណ៍បានមួយចំណែកផងដែរ។
សូមជម្រាបថា កាលពីថ្ងៃទី០៧ ខែមិថុនាឆ្នាំ២០២៣នេះ រាជរដ្ឋាភិបាលកម្ពុជា បានចុះកិច្ចព្រមព្រៀងលើក្របខ័ណ្ឌគម្រោងសាងសង់ផ្លូវល្បឿនលឿនភ្នំពេញ-សៀមរាប-ប៉ោយប៉ែត ជាមួយក្រុមហ៊ុនសាជីវកម្មស្ពាន និងថ្នល់របស់ចិន ដោយក្នុងនោះឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានបញ្ជាក់ថា យ៉ាងយូរ ៦ខែទៀត ការសិក្សាលម្អិតដោយក្រុមហ៊ុមចិនលើគំរោងផ្លូវល្បឿនលឿនទី៣ របស់កម្ពុជា ជំហានទី១ ពីភ្នំពេញទៅសៀមរាបនឹងត្រូវបញ្ចប់ ដើម្បីដាក់ជូនរាជរដ្ឋាភិបាល ក៏ដូចជាក្រុមការងារអន្តរក្រសួងយើងដើម្បីពិនិត្យលើទម្រង់ផ្លូវថាពីណាទៅណា កន្លែងណាមានស្ពាន រឺក៏ទាក់ទងនឹងផលប៉ះពាល់ជាដើម។ ចំពោះផ្លូវល្បឿនលឿនទី៣កម្ពុជាជំហានទី១ ពីភ្នំពេញទៅខេត្តសៀមរាប ដែលជាផ្លូវថ្មីនេះមានប្រវែងប្រមាណ ២៥០គីឡូម៉ែត្រ អាចនឹងត្រូវប្រើប្រាស់ថវិកាប៉ានស្មានសម្រាប់ការសាងសង់ប្រមាណ ២៥០០លានដុល្លារ ខណៈសម្រាប់ការសាងសង់ផ្លូវល្បឿនលឿននៅកម្ពុជាកន្លងទៅជាមធ្យមគឺអស់ប្រមាណ ១០លានដុល្លារក្នុង១គីឡូម៉ែត្រ។ ឯកឧត្តមរដ្ឋមន្រ្តី បានបញ្ជាក់ដែរថា សម្រាប់ផ្លូវល្បឿនលឿនទី៣នេះ គឺមានការសាងសង់២ដំណាក់កាល ដោយតំណាក់កាលទី១នេះ គឺពីភ្នំពេញទៅសៀមរាបចំងាយប្រមាណ ២៥០គីឡូម៉ែត្រ និងតំណាក់កាលទី២ គឺពីសៀមរាបទៅប៉ោយប៉ែតដែលនឹងមានប្រវែងមាណ ១៥០គីឡូម៉ែត្រ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
