កាលពីរសៀលថ្ងៃទី០៨ ខែមិថុនា ឆ្នាំ២០២៣ម្សិលមិញនេះ នៅសាលប្រជុំសាលាខេត្តសៀមរាប មានបើកអង្គសិក្ខាសាលាផ្សព្វ ផ្សាយ គោលការណ៍ណែនាំបច្ចេកទេស ស្តីពីការធ្វើផែនការ និងការសិក្សាគម្រោងប្រព័ន្ធទឹកកខ្វក់ ព្រះរាជាណាចក្រកម្ពុជា ជូនដល់ថ្នាក់ដឹកនាំមន្ទីរសាធារណការនិង ការិយាល័យគ្រប់គ្រងទឹកកខ្វក់ មកពី២៤ខេត្ត នៃព្រះរាជាណាចក្រកម្ពុជា ចំនួន១២៣នាក់ ក្រោមវត្តមានរបស់ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដោយមានការចូលរួមពីសំណាក់លោក លោកស្រី ជាមន្ត្រីជំនាញមកពីខេត្តទាំង២៤ ក្នុងទូទាំងប្រទេសកម្ពុជា។
ឯកឧត្តម សួន ភារិទ្ធ លើកឡើងថា ក្នុងគោលបំណងនៃអង្គសិក្ខាសាលានេះ គឺការរៀបចំចងក្រងសៀវភៅគោលការណ៍ណែនាំបច្ចេកទេស ដោយផ្តល់នូវគោលការណ៍ វិធីសាស្ត្រ និងស្តង់ដារ ការណែនាំបច្ចេកទេសចាំបាច់នានា ដែលសមស្របទៅតាមស្ថានភាពជាក់ស្តែងរបស់កម្ពុជា ពិសេសសៀវភៅនេះ ត្រូវកំណត់ប្រើប្រាស់ជាឯកសារគោល សម្រាប់រៀបចំនូវផែនការអភិវឌ្ឍ និងការសិក្សាគម្រោងដើម្បីសាងសង់ ប្រតិបត្តិការ និងការថែនាំហេដ្ឋារចនាសម្ព័ន្ធប្រព័ន្ធទឹកកខ្វក់នៅក្នុងប្រទេសកម្ពុជា ដើម្បីឲ្យមានសង្គតិភាពបច្ចេកទេស។
ឯកឧត្តមបន្តទៀតថា ដោយទទួលបានគាំទ្រជាបន្តបន្ទាប់ពីរាជរដ្ឋាភិបាលកម្ពុជា ក្រសួងសាធារណការ និងដឹកជញ្ជូន និងក្រុមជំនាញបច្ចេកទេស JICA បានពួតដៃគ្នារៀបចំសៀវភៅ គោលការណ៍ណែនាំបច្ចេកទេស ស្តីពីការធ្វើផែនការ និងការសិក្សាគម្រោងប្រព័ន្ធទឹកកខ្វក់ក្នុងព្រះរាជាណាចក្រកម្ពុជា ដើម្បីជាជំនួយ និងផ្តល់ការណែនាំបច្ចេកទេស នៅក្នុងការរៀបចំធ្វើផែនការអភិវឌ្ឍ និង ការសិក្សាគម្រោងប្រព័ន្ធទឹកកខ្វក់ ព្រោះវិស័យប្រព័ន្ធចម្រោះទឹកកខ្វក់ គឺផ្តោតលើការកែលម្អបរិស្ថាន និងការថែទាំសុខភាពសម្រាប់ប្រជាពលរដ្ឋ។
ឯកឧត្តមបន្ថែមទៀតថា ក្នុងបរិបទនេះ ក្រសួងកំពុងតែធ្វើការងារយ៉ាងសកម្ម និងមមាញឹក ជាមួយភាគីពាក់ព័ន្ធនានា រួមទាំងស្ថាប័នជាតិ វិស័យឯកជន និងដៃគូអភិវឌ្ឍន៍សំខាន់ៗ ក្នុងការស្វះស្វែង រកនូវដំណោះស្រាយចាំបាច់ រួមទាំងការសាងសង់នូវហេដ្ឋារចនាសម្ព័ន្ធប្រព័ន្ធទឹកកខ្វក់ ស្ថានីយប្រព្រឹត្តកម្មទឹកកខ្វក់ ការរៀបចំនូវគោលនយោបាយយុទ្ធសាស្ត្រ ឯកសារបច្ចេកទេស និងបទដ្ឋានគតិយុត្តិចាំបាច់ សំដៅធ្វើយ៉ាងណាឲ្យការគ្រប់គ្រងទឹកកខ្វក់ និងសំណល់រាវនេះអាចធ្វើទៅបានប្រកបដោយ បរិយាប័ន្ន មានប្រសិទ្ធភាពខ្ពស់ និងមាននិរន្តភាព ពិសេសការអភិវឌ្ឍប្រព័ន្ធគ្រប់គ្រងទិន្នន័យវិស័យប្រព័ន្ធចម្រោះទឹកកខ្វក់ នឹងលើកកំពស់គុណភាព ជីវភាពនៃការរស់នៅរបស់ប្រជាពលរដ្ឋក្នុងទីក្រុង និងទីប្រជុំជន តាមរយៈការគ្រប់គ្រងទឹកកខ្វក់ និងអនាម័យ ឲ្យកាន់តែប្រសើរឡើង ដែលជួយលើកកម្ពស់ការអភិវឌ្ឍក្នុងទីក្រុង។
គួររំលឹកថា នៅក្នុងអង្គសិក្ខាសាលានោះ លោក ចឹក គឹមជុន នាយករងរដ្ឋបាលសាលាខេត្តសៀមរាប បានធ្វើនូវបទបង្ហាញ អំពីសកម្មភាពរបស់ស្ថានីយ៍ប្រព្រឹត្តកម្មប្រព្រឹត្តិកម្មសំណល់ភក់ និងការផលិតជីសរីរាង្គ គឺការកែលម្អអនាម័យសាធារណៈនិងការអភិវឌ្ឍខ្សែសង្វាក់ផលិតកម្មសម្រាប់ជីកសិកម្ម(ជីសរីរាង្គ) ក្នុងនោះក្រោមការគាំទ្រផ្នែកហិរញ្ញវត្ថុនិងបច្ចេកទេស របស់សមាគមអភិបាលក្រុង និយមនិយាយភាសាបារាំង (AIMF) សហជីពអន្តរខេត្ត សម្រាប់ប្រព័ន្ធអនាម័យនៅតំបន់ប៉ារីស(SIAAP) ទីភ្នាក់ងារទឹក សែនណកម៉ង់ឌី (AESN) បានរួមគ្នាអនុវត្តនូវគម្រោងផលិតជីសរីរាង្គក្រោមការសហការដៃគូអភិវឌ្ឍសាធារណៈរដ្ឋបារាំង នៅខេត្តសៀមរាប។
ក្នុងនោះដែរក៏មានធ្វើបទបង្ហាញ អំពីសកម្មភាពលទ្ធផលគ្រប់គ្របប្រព័ន្ធលូទឹកកខ្វក់ និង ការសាងសង់ ថែទាំប្រព័ន្ធចម្រោះទឹកកខ្វក់ របស់នាយកដ្ឋាន និង បណ្តាស្ថានីយ៍បូម និង ចម្រោះទឹកកខ្វក់ ខេត្ត ក្រុង និង អំពីស្ថានភាព បច្ចុប្បន្នភាពរបស់ការិយាល័យលូទឹក និងស្ថានីយចម្រោះទឹកកខ្វក់ ខេត្តសៀមរាប ក្នុងគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ។
ក្នុងឱកាសនោះដែរ ឯកឧត្តម សួន ភារិទ្ធ បានដឹកនាំប្រតិភូសិក្ខាកាមទាំង២៤ខេត្ត ចុះទស្សនកិច្ចសិក្សា ស្វែងយល់នូវស្ថានីយ៍បូមទឹកកខ្វក់ (វត្តចក) និង ស្ថានីយ៍ប្រព្រឹត្តិកម្មប្រព្រឹត្តិកម្មទឹកកខ្វក់ ព្រមទាំងស្ថានីយ៍ប្រព្រឹត្តិកម្មសំណល់ភក់ និងការផលិតជីសរីរាង្គ ដែលទទួលបានគាំទ្រឥណទានពី ទីភ្នាក់ងារទឹក សែនណកម៉ង់ឌី (ASEN)ចំនួន៩សែនអ៊ឺរ៉ូ សមាគមអភិបាលក្រុង និយមនិយាយភាសា បារាំង (AIMF)៤សែនអ៊ឺរ៉ូ និងសហជីពអន្តរខេត្ត សម្រាប់ប្រព័ន្ធអនាម័យនៅតំបន់ប៉ារីស(SIAAP)ចំនួន៤សែនអ៊ឺរ៉ូដែរ សរុបសហហិរញ្ញប្បទានសម្រាប់អនុវត្តគម្រោងចំនួន១លាន៧០០ពាន់អ៊ឺរ៉ូ ហើយនៅពេលដំណើរ នឹងផលិតសរីរាង្គ ក្នុងមួយឆ្នាំបាន ៥០០តោន៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ លោក លីវ សាន្ត
