អ្នកជំនាញគ្រប់គ្រងការជួសជុលការដ្ឋានស្ពានហាលឆ្លងកសិន្ធុទឹករបស់ប្រាសាទអង្គរវត្ត ឱ្យដឹងថា ដំណើរការជួសជុលស្ពានរាលហាលនេះ ជិតរួចរាល់ជាស្ថាពរហើយ ដោយអ្នកជំនាញកំពុងកែលម្អបន្ដិចបន្តួច ដើម្បីសុវត្ថិភាពភ្ញៀវទេសចរ។
លោក អន សុភាព មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានលើកឡើងបែបនេះ នៅក្នុងកិច្ចប្រជុំបច្ចេកទេសអាយស៊ីស៊ីអង្គរលើកទី៣៧ ដែលធ្វើឡើងខេត្ដសៀមរាប កាលពីព្រឹកថ្ងៃទី១២ ខែមិថុនា ឆ្នាំ២០២៣នេះ ។លោកបន្ដថា មកដល់ពេលនេះ ការជួសជុលរចនាសម្ព័ន្ធទូទៅរបស់ស្ពានហាលអង្គរវត្តស្ទើរតែចប់ទាំងស្រុង ប៉ុន្តែនៅសល់តែការងារកែលម្អតិចតួចប៉ុណ្ណោះ។ លោក អន សុភាព មានប្រសាសន៍ទៀតថា ក្រុមអ្នកជំនាញADHOC នៃគណ:កម្មាធិការអន្តរជាតិ ដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរហៅកាត់ថា(អាយ ស៊ី ស៊ី-អង្គរ)បានបានទៅពិនិត្យមើល ដោយបានតម្រូវឱ្យក្រុមការងារជួសជុលកែលម្អត្រង់កន្លែងគ្រលុកមួយចំនួនឱ្យល្អប្រសើរឡើង ដើម្បីសុវត្ថិភាពសម្រាប់ភ្ញៀវទេសចរណ៍ដែលត្រូវដើរឆ្លងកាត់។ ចាប់តាំងពីឆ្នាំ២០១៦មក សាកលវិទ្យាល័យសូហ្វីយ៉ាប្រទេសជប៉ុន បានសហការជាមួយអាជ្ញាធរជាតិអប្សរា ដើម្បីអនុវត្តន៍គំរោងជួសជុលស្ពានហាលរបស់ប្រាសាទអង្គរវត្តដំណាក់កាលទី២ ប្រវែងសរុបជិត ១០០ម៉ែត្រ។
លោក សាតុរឹ មីវ៉ា តំណាងមជ្ឈមណ្ឌលអាស៊ីសូហ្វីយ៉ា មានប្រសាសន៍ថា នៅក្នុងគំរោងជួសជុលស្ពានហាលនៃប្រាសាទអង្គវត្តដំណាក់ទី២នេះ ការជួសជុលគឺធ្វើឡើងតាមអនុសាសន៍របស់ គណ:កម្មាធិការ(អាយ ស៊ី ស៊ី-អង្គរ) ដោយមិនរុះរើជញ្ជាំងថ្មបាយក្រៀមរបស់ស្ពានបុរាណនោះទេ។លោកបញ្ជាក់ទៀតថា ថ្វីត្បិតតែគំរោងជួសជុលស្ពានហាលរបស់ប្រាសាទអង្គរវត្ត គ្រោងនឹងបញ្ចប់ហើយត្រៀមបើកឱ្យភ្ញៀវទេសចរណ៍បានដើរឆ្លងកាត់នៅពេលឆាប់ៗ ហើយក្រុមការងារនៅតែធ្វើការតាមដានអំពីការប្រែប្រួលរបស់វា យ៉ាងហោចណាស់ក៏ប្រើរយ:ពេលពី៣-៥ឆ្នាំទៅមុខទៀតដែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
