នៅព្រឹកថ្ងៃទី១៣ ខែមិថុនា ឆ្នាំ២០២៣នេះ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និង ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប រួមនឹងក្រុមការងារខេត្តចុះជួយឃុំ និងអាជ្ញាធរមូលដ្ឋានបានអញ្ជើញចុះជួបសំណេះសំណាល សួរសុខទុក្ខបងប្អូនប្រជាពលរដ្ឋជាង ៣ពាន់គ្រួសារ ក្នុងឃុំចំនួន២ គឺឃុំសំបួរ និងឃុំកំពង់ថ្លូវ នៃស្រុកក្រឡាញ់ ខេត្តសៀមរាប។
ឯកឧត្តម អ៊ាន ឃុន មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី បានដាក់ចេញនូវយុទ្ធសាស្ត្រចតុកោណទៅលើការងារអាទិភាពជាច្រើនក្នុងគោលដៅបន្តពង្រឹងកិច្ចអភិវឌ្ឍប្រកបដោយចីរភាពទូទាំងប្រទេស។ ដោយឡែកស្រុកក្រឡាញ់ ក៏ទទួលបានពីរាជរដ្ឋាភិបាលជាបន្តបន្ទាប់សម្រាប់អភិវឌ្ឍន៍ហេដ្ឋារចនាសម្ព័ន្ធរូបវ័ន្តនៅមូលដ្ឋាន ដើម្បីបង្រួមគម្លាតពីទីក្រុងទៅទីជនបទ ព្រមទាំងបានធ្វើឱ្យតំបន់ជនបទ និងទីប្រជុំជន ដែលមានជាអាទិ៍សាលារៀនតាំងពីកម្រិតមត្តេយ្យរហូតដល់កម្រិតឧត្តមសិក្សា មណ្ឌសុខភាព មន្ទីរពេទ្យ ផ្លូវថ្នល់ខ្វាត់ខ្វែង ផ្សារលក់ដូរ អគ្គិសនី ព្រះវិហារ ទីវត្តអារាម ស្រះទឹក ប្រឡាយ អណ្តូងទឹក អាង ស្តុកទឹក បង្គន់អនាម័យសាធារណៈ និងឯកជន បណ្តាញផ្លូវគមនាគមន៍ ស្ពាន អគារស្នាក់នៅ មធ្យោបាយបង្កបង្កើនផល និងផលិតកម្មផ្សេងៗ។ល។
មានប្រសាសន៍នាឱកាសនោះដែរ ឯកឧត្តម អ្នកឧកញ៉ា សៀង ណាំ បានថ្លែងប្រទេសកម្ពុជា ក្រោមការដឹកនាំរបស់សម្តេចតេជោ កម្ពុជាពិតជាមានមោទនភាព និងកិត្យានុភាពជាតិជាបន្តបន្ទាប់នៅលើឆាកអន្តរជាតិ។ ជាក់ស្ដែងក្នុងអំឡុងសកលលោកទាំងមូលជួបវិបត្តិធ្ងន់ធ្ងរដោយសារជំងឺកូវីដ-១៩ សម្តេចបានស្វះស្វែងរកវ៉ាក់សាំងយកមកចាក់ការពារជូនបងប្អូនប្រជាពលរដ្ឋដោយឥតគិតថ្លៃនៅទូទាំងប្រទេស។ បន្ថែមពីនេះ កម្ពុជាក៏បានទទួលជោគជ័យក្នុងការរៀបចំកិច្ចប្រជុំកំពូលអាស៊ាន និងអាស៊ានបូកនិងការធ្វើជាម្ចាស់ផ្ទះរៀបចំព្រឹត្តិការ៍កីឡាស៊ីហ្គេមលើកទី៣២ និងកីឡាប៉ារ៉ាហ្គេមលើកទី១២ ទៀតផង។
ឯកឧត្តម សៀង ណាំ មានប្រសាសន៍ទៀតថា ការអភិវឌ្ឍលើសមិទ្ឋផលនានា នៅគ្រប់ទីកន្លែងអាចរីកចម្រើនទៅបាន គឺអាស្រ័យដោយប្រទេសជាតិមានសុខសន្តិភាពពេញលេញ តាមរយៈគោលនយោបាយឈ្នះឈ្នះ របស់សម្តេចតេជោ សែន ដែលជាមគ្គុទេសឯកក្នុងការផ្សះផ្សារ និងបង្រួបបង្រួមជាតិឱ្យរស់នៅក្រោមដំបូលសន្តិភាពតែមួយ។ ហេតុនេះសូមបងប្អូនប្រជាពលរដ្ឋគ្រប់រូប និងអាជ្ញាធរមូលដ្ឋានគ្រប់លំដាប់ថ្នាក់ ត្រូវរួមគ្នាការពារថែរក្សាសន្តិភាព មិនត្រូវឲ្យសន្តិភាពនេះ បំផ្លាញដោយជនណាម្នាក់ ឬបក្សនយោបាយណាមួយនោះទេ។ សូមចូលរួមថែរក្សាការពារនូវរាល់សមិទ្ធផលទាំងឡាយរបស់ជាតិ ធ្វើយ៉ាងណាឲ្យសមិទ្ធផលដែលយើងទាំងអស់គ្នាសម្រេចបានដោយឆ្លងកាត់ការលំបាក និងឧបសគ្គគ្រប់បែបយ៉ាងទម្រាំបានដូចសព្វថ្ងៃនេះ ឲ្យបានស្ថិតនៅគង់វង្សជាអមតៈ ដែលជាបុព្វបទនៃការនាំមកនូវសន្តិភាព និងការអភិវឌ្ឍរីកចម្រើនរបស់ជាតិយើងជាដរាបតរៀងទៅ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
